Ijila 13 - O Mikanda Ikola

Jingonge jatokala ni uhaxi ua dibhute

¹ Jihova anga uambela dingi Mozé ni Alá, uixi:

² Se umona muthu, kikonda kiê kia fuluma, mba kua muiza kasanga-dimbu, mba-phe kijêla kia zele phéé, kia tula ku kikonda kiê kala dife dia dibhute, aie-nê-phe kiá kua Alá, o nganga, mba ku muthu umoxi ku anʼê, ala jinganga,

³ o nganga a tonginine kiambote o dife dia mu tula ku kikonda kia xitu iê; se katé ni kindemba kiala bhu kaẋi ka dife kia zeluluka ue, anga o dife di beta kutomboka, o kikonda kiê-muène ndenge, diodio dibhute dia mu tula; o nganga kia mu mona kiá kiókio, a mu kole kuamba ua kasana.

⁴ Maji-phe hé o dife mu kuzela ki dia lomboloka kiambote, mba di tunda o kikonda kiê mu kulujela, o kindemba kiala-bhu ue ki kia zeluluka, inda-phe o nganga a mu sondolole, muthu ió a di kalele hanji katé mu sambuadi dia izuua.

⁵ Mu kizuua kia sambuadi-phe, nganga a mu tonginine dingi; o kia sanga kuila o dife bhene bhu dia suku bhene, kana, ki dia sanhe, ki dia zalata ku kikonda kiê, nganga a mu tubhule, muthu ió a di kalele dingi sambuadi dia mukuá dia izuua.

⁶ Bhenhobho-phe mu kizuua kia kasambuadi, nganga a mu tonginine dingi lua mukuá; o kia talesa-pahe se dife dia jimuka, ki dia di mendala, euá, a mu kole kuamba ua zediê; manhi diveve ngó, dia somboka, maiê. Hé kima, a sukule ngó izuatu iê, kuabhu, kuma ua zediê.

⁷ O kʼikala-phe o dife díʼvula, o nganga muene a mu idikiza-diu kiá, mu ku mu bhela umbangi, ua kuila ki kima, iú ua mu bhela-u kiá, a mu idikize-diu dingi;

⁸ o nganga a mu tekule, o muene kia mona kuila, kidi kiene, dife díʼkula, a mu jimbule kuamba haxi muene; dibhute diene dia mu kuata.

⁹ Muthu-phe, se kua mu tula dibhute, a mu bheke kua nganga,

¹⁰ o nganga a mu tale. O kia mona kuila sai dife dia mu zalala ku kikonda kia xitu iê, diexi muene phéé, anga kindemba ue kizeluluka-bhu, hé bhuila kala jixitu ja beta kuboba-bhu,

¹¹ diodio dibhute dia miáka dia mu kuata; nganga-phe a mu jimbule kuamba haxi; ka bhinge hanji dingi ku mu talela lua mukuá, ua lomboloka kiá muene kuma ua kasana.

¹² Bhenhobho-phe, se dibhute dia tomboka mu mukutu uoso, anga kikonda kioso muene ki di minha mu dibhute, tunde ku mútue katé ku inama, kioso kia kiatena nganga o kumona, mu kutongolola kuê,

¹³ o nganga a mu tonginine-phe, o kiela dibhute dia sambuka muene mu mukutu uoso ua haxi, mukutu uoso iu uala kiá kífua kimoxi, a mu jimbule kuamba ueluka kiá; talesa, kuma kikonda kiê kioso kiedi phéé; ueluka-phe.

¹⁴ Maji bhuoso-phe hádia bhua mu muena dingi ni jixitu jala kulujela, kala ua ubhe, dia vutuka-phe dingi;

¹⁵ kioso nganga kia mu mona dingi ni ʻxitu ja ubhe, ua kasanʼê dingi, ʼxitu jê ja tambula dingi uhaxi; kuma diodio dibhute.

¹⁶ Sai bhabha-phe xitu jitomboka, o ku pholo kuaia anga jizela, kibhinga-phe u di bhakula kua nganga.

¹⁷ O nganga hé u mu kengelela o kia mona-phe kuamba o kitôto kia zele kiá, nganga-phe a mu jimbule kuamba, ua kexe ni dibhute; ueluka muene, ka kasana dingi.

¹⁸ Lua mukuá ue, se muthu ua kexe ni dibhuna, o ki dʼiluka,

¹⁹ anga bhu bhingana dijiji, hé di hangula, anga dʼila phéé, kala diveve dia-nda kuzela, diʼandeka kukusuka, a dʼidikize-phe kua nganga.

²⁰ O muene kiela sui, se ua sange kuma dia beta kutona, o kikonda kiê-muène kiala ndenge, o kindemba kiala-bhu ue kia zeluluka, nganga a mu jimbule kuamba haxi, ua kasana muene; dibhute dia mu tundila bhu dijiji dia dibhuna.

²¹ Maji o nganga-phe kia di mona kuila, ki bhuala kindemba kizela, diene ue ki diaʼnguluka kiavulu, inda dia fefetela ngó, muthu ió a mu jikile hanji sambuadi dia izuua ku mbalelu.

²² Se diene diala ku di bandekeza ni nguzu ioso mu kikonda, nganga a mu jimbule muene kuamba haxi; dibhute diene.

²³ Maji diene hé dia suku kiá, o dijiji ki diala kusânha, dijiji ngó dia nanuka, nganga a mu jimbule kuamba ua zediʼê.

²⁴ O kʼikala-phe uene ni kítoto kia túbhia, kia zubha kiá o kuiluka, anga bhu zabuka difefe, di zela, di nomona ku husu, mba ku nzela.

²⁵ O nganga kia mona-bhu bhuala kindemba kia zeluluka, o dibakʼedi dia beta kutomboka xitu jê joso ndenge, diodio dibhute diene; dia fuafuela bhu kítoto kia túbhia; kala kiki nganga a mu jimbule muene kuamba haxi; dibhute dia mu tula.

²⁶ O kʼikala-phe nganga uedi uzongola-bhu, dijiji ki diala kubheka kindemba kizela, o diene ue ki dia tomboka kinéne, inda diala kujikinina, muthu ió nganga a mu bhake hanji mu sambuadi dia izuua ku mbalelu.

²⁷ O ki i bhita, mu kizuua kia kasambuadi nganga a mu kengelele lua mukuá se dibaka dia zanze kinène, nganga a mu jimbule kuamba haxi; dibhute diene dia mu tula.

²⁸ Maji hé difefe dia suku kiá, ki diala dingi ku di bandekeza, dia mu jima; ioio hangakambo ia kitoto kia túbhia; nganga a mu jimbule kuamba uazele, kiókio kijêla kia túbhia ngó.

²⁹ O ki bhu kala-phe diiala mba muhatu u kala ni kijêla mu mútue mba ku muezu,

³⁰ o nganga kia kengelela-bhu, umona kuila kijêla kiki kia tomboka kinêne, o kidifua kia kikonda kiê-muène ndenge, bhene ue bhuala ndemba ia kusuluka, nganga a mu jimbule muene kuamba ua kasana; ngònga kíá iala-na-iu, kifua dibhute dia mútue, mba dia muezu, dia mu kuata.

³¹ Maji hé o nganga ua kengelela dibaka dia ngònga, ka sange kuila dia beta kutomboka, bhene ka sange-bhu ue ndemba ia xiketela, nganga a bhake hanji muthu ió sambuadi dia izuua.

³² O mu kizuua kia kasambuadi a mu tonginine lua mukuá, o kia sanga kuila dibakʼodio dia ngònga ki dia sanhe dingi, ki dia bhana ue ndemba ia kusuluka, ki dia tomboka ue kinéne o kikonda ki kiala ndenge,

³³ a mu bhute-phe; maji o ngònga ka i bhute; o nganga-phe a mu sueke dingi mu sambuadi dia izuua.

³⁴ O ki ibhua, a mu kengelele dingi lua mukuá; o kia mu sanga bhene bhuʼokulu bhene, ki kua di te kima, kuabu, a mu tange kuamba ueluka, a sukule izuua iê, ueluka muene.

³⁵ O kiela-phe, o a mu edi ueluka kiki, o ku pholo ku aia, se a mu mona kuila dibaka dia ngonga di disânha kiaiibha ku kikonda,

³⁶ nganga a mu kengelele, o kia mona kuma ngònga ia di zale, kana ngó kusota-bhu dingi ndemba ia kusuka; ió ua kasana muene.

³⁷ O kʼikala-phe ngònga ia suku, kua sabhuka kiá ndemba ia xiketela ngònga-phe ia di sanze, muthu ió ueluka; nganga-phe a mu kole kuila ueluka.

³⁸ Se diiala mba muhatu u kala ni majiji ma zela ku mukutu uê,

³⁹ nganga-phe a mu talese, o kia mona ku kikonda kia mukutu uê kua mu sabhuka majiji mazela ma ngoho, ió-phe mabhumbu mazela, ma di sabukila ku mukutu uê; ki mʼediê kima, muene ua zediê.

⁴⁰ Kioso ki u mona diiala ua mu vuzujuka jindemba mu mútue, diodio dibhala ngó; muene ua zediʼê.

⁴¹ O ki di vuza ngó, sasa-mutue, ku pholo bhu dibhomo, koko-phe kabhala kala na-ku, muene ueluka kiá muene.

⁴² Maji-phe, se mu dibhala mba mu kabhala, mu moneka dixaka dizela, anga diia ni kukusuluka, diodio dibhute kiá dia mu fuafuela mu dibhala, mba mu kabhala.

⁴³ O nganga kia zubha ku mu tonginina, o hanga-kambo ia fuluma mu dibhala mba mu kabhala, anga ifikisa ku husu, kala kiene kutomboka o dibhute ku mukutu,

⁴⁴ muthu ió mukua-dibhute kiá muene, ua kasana-phe; nganga a ki tange muene kuamba muthu iú haxi; dibhute dia mu bhela mu mútue.

⁴⁵ Izuatu ia mukua-dibhute, ua tambula dibhebhu, tandulenu-iu, o kindemba kiê mu mútue kile ni kiene fuandu-fuandu, a mu vungine o muzumbu ua thunda ni kithethele, ende ni ku di kola, uixi: Nga xidi! Nga xidi!

⁴⁶ Anga u xalela kienhókio izuua ioso ni kukasana kuê, kiosuiki dibhute dia mu naminina; kuma ua xidi, a tunge ubheka uê; dibhata diê dia kà kala ku mikáu kuema dia kibangu.

O dibhute ku izuatu

⁴⁷ Se bhu kala ue dixaka dia dibhute di kuatela ku kizuatu, kia kindemba kia mbudi mba kia linho,

⁴⁸ mba di kuatela mu jidinha jóleke hanji ngó, mba fazenda iótunge kiá thanga, ikale ia linho, ikale ia kindemba kia mbudi, mba-phe dia kuatela mu kibha mba mu ufunu uoso-uoso a u tungu ni iibha,

⁴⁹ o jidinha jóleke ngó, mba thanga iótunge kiá, mba kima kiʼókalakale ni ibha, anga u i mona ia kondoka, hé i kituka kiangu kia uisu mba ikusuluka, diódio-phe dibaka dia dibhute dia tula-ku, idikizenu-iu kua nganga.

⁵⁰ Nganga-phe a funjike kizuatuʼokio mu sambuadi dia izuua,

⁵¹ o mu kizuua kia kasambuadi a tonginine o dibaka; se dibaka diaii ni kusambuka ku thanga, mba ku jidinha jóleke, mba ku thanga, mba kima kioso-kioso kia ufunu ua iibha, diódio-phe dibhute dia kajeja; kimʼokio-phe kia kasana;

⁵² kizuatu kiókio, mba o jidinhʼojo jóleke, mba thanga ia kindemba kia mbudi, mba ia linho, mba ufunu ua iibha jikatesenu-iu mu túbhia, mbata dibhute dia kajeja dia I kuata; iene ioso mu ioha, mukonda kúbhua kuê túbhia.

⁵³ O kʼikala-phe, nganga ki edi-ku sui, kajeja ki ka salânha ku kizuatu, mba ku jidinha jóleke, mba ku thanga, mba ku ufunu uos-uoso mu iibha,

⁵⁴ nganga-phe a tume kusukula kizuatu kienhókio, a ki sueke dingi mu sambuadi dia izuua;

⁵⁵ o nganga-phe kia talela o kizuatu, se ua mono kuma o dibaka dia jiji muene, sumbala a di sukula kiá, ki dia di sanhe maji bhene bhu dia tela bhene, kizuatu kiókio mba kima kiókio jikatesenu-kiu mu túbhia; kia tambula bhute dia kajiki-jiki, né diala ngó mbandu imoxi, mba dia tundidila ku mbandu ia mukuá.

⁵⁶ Maji hé nganga ua sange kuma dia kunguka, kia zubha kusukula-bhu, a di ẋuune-ku kiá ku kizuatuʼokio, mba ku kibha, mba jidinha jóleke, mba ku thanga.

⁵⁷ Se-phe dia fuafe dingi ku kizuatu, mba ku jidinha jóleke ngó, mba ku thanga iòtunge kiá, mba ku ufunu uoso-uoso ua iibha, dibhute dia ngolongo-phe diodio; buidisenu o kizuatuʼokio mba o kimʼokio mu túbhia.

⁵⁸ Maji-phe, hé o kizuatu, mba jidinha jòleke, mba thanga iòtunge kiá mba kima kiòtunge ni ibha, a ki sukule dingi lua kaiadi, kuabhu, kia di xala kiua, kia zele.

⁵⁹ Iii-phe iene o ngonge ia dibaka dia dibhute ku kizuatu kia kindemba kia mbudi, mba kia linho, mba ku jidinha jóeke ngó, mba ku thanga iòtunge kiá, mba ku ufunu uókalakale ni iibha ia iama, phala mu tungule jinge kioso kia bhingi ku ki tanga kuila kia zele ni kioso kia kasana.