Ijila 11 - O Mikanda Ikola

O iama ia kùdia ni iii ki ia kùdia

¹ Jihova anga uambela Mozé ni Alá, uixi:

² Tangelenu anʼa Izalaiele, kuamba: Ku iama ioso iene kʼulu dia mundu, ienda ni inama iuana, jixitu ji mu tokala kudia-ku, jiji:

³ Joso kiá o jixitu jala ni ikoto ia di uane mu kaẋi, anga kikoto kimoxi ki uanunuka mu iiadi, anga jenda ue ni ku di andununa mu kanu, jojo-phe jene o ʼxitu ja kúdia.

⁴ O jedi kabasa ji di andununa ngó mu kanu kuabhu, mba-phe jitanduka ngó o kikoto, kuabhu, jojo ki mu ji die; kala o kamelu, o ku di andununa iú na-ku, maji ki ka batuka kikoto; ió-phe musékanda.

⁵ Ni sele, kuma mukua ku di andununa ue, maji ka batuka kikoto, ki xitu-phe ia kúdia.

⁶ Ni dibhulu mukua ku di andununa ue, mu kanu, maji ka uanunuka kikoto, ió-phe ue musékanda.

⁷ Ngulu ue ia uanunuka kikoto, o mbatu iê ia uanuna o kikoto mu mbandu jiiadi, maji ki i tena ku di andununa mu kanu; ʼió ue xitu ia musékanda.

⁸ Xitu iâ ki mu i die, o kimbi kiâ ue né ngó ki mu ki babate; kuma iosuʼiii misékanda phala enu.

O jimbiji ja menha

⁹ Ku iama ioso-phe iene mu menha, mu dia-ku iii: ioso kiá iala ni ibhebhe ni ibhèla mu menhʼomo, kixi mu kalunga mba mu jingiji, ioio mu dienunu.

¹⁰ Maji ioso ia kambe o ibhebhe mba ibhèla, mu musanza ua kalunga mba mu jihonga mu jingiji, ibamba, ioso ia menha, mba o iama ioso i bhuima mu menha, ioio ia di bhange lufuku kokuenu.

¹¹ Kitenu-iu-phe lufuku; kana ku i dia xitu, o kimbi kiê ngó ki mi kuate muene disanga.

¹² Iama ioso kiá ia kambe o ibhebhe ni ibalabala, mu menha, i mi kale lufuku.

O jinjila

¹³ O ku jinjila ue sai-ku joso ji mu kita lufuku; jiji kene ku ji dia, ji mi kale lufuku: o holokoko, ni bula-ifuba, ni kimbânze.

¹⁴ Ni kikuambi ni kinhungu, ni akua kidifua kiê.

¹⁵ O kilombelombe, ni akua kidifua kiê,

¹⁶ ni kihendembumba, ni kangimbi, ni mukuku, ni kaháula, ni oso akua kidifua kiê.

¹⁷ Ni kâhombo, ni munzoue, ni kinzunzu,

¹⁸ ni kitate, ni kahumba ni kambonja.

¹⁹ Ni dibânda, ni dituua, ni akua kidifua kiê, ni kaluuiui, ni dima.

O ibamba i zanzala bhoxi ni iii i tuka ni mabhabha

²⁰ O tu-ibamba tuoso tu tena kutuka bhulu, anga tu kala ni mikoto iuana, tu mi kale lufuku.

²¹ Hé kima mu dia-mu ngó, ku tu-ibamba tu tuka, imoxi-mu kala iii, ku akua mikoto iuana: ioso iala dingi ku dima ni tu-mikonzo tua lebha phala kuia ni kusumbuka ku thanduʼa mavu.

²² Tungulenu-mu-phe iii phala kúdia: o kihoho kia kaxeneta, ni idifua iê; ni kingenji, ni idifua iê; o kiènze ni idifua iê; ni mahoho oso ni idifua iê.

²³ Maji o tu-ibamba tumoxi-mu dingiʼoto tuene kutuka anga tu enda ue ni inama iuana, tu mi kale kiá lufuku.

²⁴ Tuenhutu tu xidisa muthu; uoso u kuata-ku kamoxi kafu kiá, u kasana kumbi dioso dia kambamba katé ku ngoloxi.

²⁵ Uoso u ambata o imbi iâ, a sukule izuatu iê, kutula ku ngoloxi kukasana kuê kuabhu kiua.

²⁶ O iama ioso-phe i jikuka kikoto maji ki kia uanunuka mu iiadi, ioso muene misékanda; ni iama ioso i kamba ku di andununa mu kanu, ioio ue misekanda; uoso u di bhiáuna-ku ngó ua di kasanesa muene.

²⁷ Ioso dingi iama i enda ni inama iuana bhoxi, ioio misekanda; kimbi kiê uoso ngó u di bhiáuna-ku, ukasana katé ku ngoloxi.

²⁸ Uoso u ambata o imbi iâ, a sukule izuatu iê, kutula mu ngoloxi kukasana kuê kuabhu kiua; inda o iene, phala enu kitenu-iu muene misekanda.

O iama i huhuta ni ku di koka mala bhoxi

²⁹ Ku iama iezala ku mavu a kanga, sai-ku ue ni tubamba tuzanzalela ni kuhuhuta mala ku mavu, tu mi kala ue tumisekanda: o kangamba, o dibengu, o mbaẋi, o sute, ni idifua iâ;

³⁰ ni kisaka, ni ditatu, ni dikalanga, ni ditende, ni nzengédia, ni huelendende, ni dinônguena,

³¹ iama iii i mi kale misekanda muene iahatu; kuila iafu kiá, uoso ngó u di bhiáuna-ku ua di kasanesa kiá, katé ku ngoloxi.

³² Katé ni ku imbamba ienu, se kua sonokena kama ka tokala ku tubamba tutu, kuila tuafu kiá, kienhókio ue kia kasana muene; kikale kitutu kia muẋi, mba kizuatu, mba kibha, mba saku, mba kiselengenhe kioso-kioso kia kukalakela, i bhinga kiá ku i bhitisa mu menha, anga i kala kienhiki katé ku ngoloxi; kuabhu-phe, ia dʼiẋika kiua.

³³ Se bhu kala kitabhu kioso-kioso kia mavu, anga ki sonokena kama ka tunda ku imbi ia tubamba toto ima ioso iala mu kitabhu kiókio ia kasana kiá; o kitabhu kiene ue mu ki bula kiá.

³⁴ O mákudia ue, se ma mbombena menha ma tokala ku tubamba toto tuafu, mákudia momo ma kasana kiá; hé maluvu, moso muene mu itutu iâ, ma kasana ue.

³⁵ Kima kioso ki sonokena hé ki tula kama ka kimbi kia tubamba toto tua musekanda, kikasana muene; hé forno mba kitutu kia utuma mu ki bula; kuma kia kasana kiá; enu uenu ima ioio kitenu-iu kiá kukasana muene.

³⁶ Se-phe fixi mba kixima, athu bhua mu teka menha, ioio ki idié kima; uoso ua tombola-mu o kibamba kia fuila-mu muene ngó u kasana.

³⁷ Se ima-phe ia di fuila kiki, kua laúka kama anga ka tula ku mbutu ia kukuna, mbutuʼoio ki idié kima;

³⁸ maji o mu ku tekela o mbutu, se menha ma sonokena kima kia tundu ku iimbiʼoio, mbutu ioio ia di boto, kuma ia mi kala kiá kikâsane.

³⁹ O ki kala-phe kibhaku kia tokala ku ki dia xitu, kia di fuila kiene, uoso ua ki kuata, unanga ni dise katé ku ngoloxi.

⁴⁰ Uoso udia ku xitu ia di fuila kiki, a sukule izuatu iê, o kukasana kuê-phe hé u kala na-ku katé ku ngoloxi; o uoso ue u ambata o kimbi kia kibhaku kia di fuila, a sukule izuatu iê, maji u kasana muene katé ku ngoloxi.

⁴¹ Tuiama tuoso-phe tuene ku zanzala ni kuhuhuta ku mavu bhoxi, lufuku luoso; kana ku tu dia.

⁴² Ioso iendela mala bhoxi, ni ioso ue iendela ku inama iuana, mba ku inama iuana kua di te, ioso ia tokala tubamba tuene kuzanzala bhoxi kiki, kana ku i-dia, mukonda lufuku luoso.

⁴³ Mienhu ienu kana ku i tambuisa lufuku, mba mu kutoualela tubamba tu zanzala bhoxi, mu di kasanesa na-tu, phala ki mu kale ni lufuku anga mu kasana.

⁴⁴ Mbata Eme ngi Jihova Nzambi, ienu; di bhakienu-phe ni kuzela kuma Eme nga zela; kana ku di kasanesa o muenhu uenu ni tubamba tuoso tu zanzala ni kuendela ku mavu bhoxi.

⁴⁵ Mukonda Eme-eme Jihova, ngala ku mi batesa mu kutunda kʼoxi ia Ijitu, phala ngi kale ngi Nzambi ienu; kala kiki enu mu di zelesa, mbata Eme nga zela.

⁴⁶ Kiki kiene o kijila kia tokala ni iama, ni jinjila, ni ioso kiá i bhuima, kixi mu menha mu i kala, kixi kʼulu dia mundu ku mavu a kanga ku ia di texe;

⁴⁷ mbé bhu kale o kutungula kiki kia zele ni kiki kia xidi; ni kutungula o iama ia fuama ku i dia mu iama ioio ki i fuama ku i dia.