Ijila 10 - O Mikanda Ikola

Nadabe ni Abihu a fua ku túbhia tua Ngana

¹ Nadabe ni Abihu, anʼa Alá, anga a ta-bhu túbhia, o ku túbhia a ta-ku o uasu ua dizumba, anga a bheka túbhia tuengi bhu pholo ia Jihova, ki tuene tua tumu muene.

² Bhenhobho anga ku fuafua túbhia bhu pholo ia Jihova, ene hé a jokota, a fuila bhobho bhu pholo ia Jihova.

³ Mozé anga uambela Alá, uixi: Kiki kiene kia tange Jihovaʼiki, kuila: kuzela kuami nga-nda ku ku londekeza ku ió oso a ngi zukama anga bhu pholo ia mundu uoso ngi kala ni kijingo. Maji Alá-phe ua di xibhʼê.

⁴ Mozé anga u ixana Mixaele ni Elizafane, anʼa Uziiele, sekuluʼa Alá, u a ambela, uixi: Bhixilenu, mu zangule o jiphange jenu mu dibhezelu, mu a bheke ku mukáu ku kanga dia kibangu.

⁵ Ene anga a bhikila, hé a a zanguila mu mavunga mâ, anga aia-nâ ku kanga dia kibangu, kala kia tumu Mozé.

⁶ Mozé anga u ambela Alá, ni anʼê Eliiezale ni Itamale, uixi: Kana kuehela ndemba ienu kuila ngó fuandu-fuandu, kana kutandula ue o izuatu ienu, phala ki mu fue, mba kuiza njinda ia Jihova ia dikota ku thandu dia kilômbo kioso; maji ehelenu akuenu, o dibhata dioso dia Izalaiele, ene a dila o thambi ia kujokota kuenhuku kua túbhia tua tundu kua Jihova.

⁷ Enu ki mu tunde bhu muelu ua balaka ia kutakanena, phala ki mu fue; kuma maji a Jihova, a ku mi unda, iá ku thandu dienu. Ene anga a tumaka o kizuelu kia Mozé.

Ngonge ia kukamba kúnua vinhu

⁸ Jihova anga u ambela Alá, uixi:

⁹ Kana kúnua vinhu, mba kúnua kuoso-kuoso ku kodiuisa, né eie mba o anʼê oso u uala-nâ kioso ki muia mu balaka ia kutakanena, phala ki mu fue; ki kala kijila ku miji ienu ioso katé ku hádia ni hádia;

¹⁰ phala mu tene kuenda ni kutungula kiki ki kôla, ni kiki kia ngoho ki ki kôlo kima, ni kiki kiaxidi ni kiki kiazele;

¹¹ phala muende ni kulonga ue anʼa Izalaiele o ijiia ioso ia tange Jihova kua Mozé.

Ngonge ia ima ikola iangene

¹² Mozé anga u ambela Alá, ni Eliiazale, ni Itamale, anʼê a xala-ku, uixi: Tambulenu o mubhaku ua makudia ua xala ku maujitu ma Jihova a kubhakula ni túbhia, mu u die sé felemendu bhu mbandu ia kalatódio; kuma u kôla kinéne.

¹³ Kala kiki, mu u dila bhu kididi kikôla; mukonda diene o dikânda dié ni dia anʼé, ku maujitu a Jihova a kubhakula ni túbhia; kuma kiene kia ngi tumu.

¹⁴ Ni phetu ia kubhukila, ni kinama kia taku kia ujitu ua kuzangumuna, mu i dila ue bhu kididi kiazele, ni eie ni anʼé a mala, ni anʼé a ahatu; mukonda diene o dikânda dié ni dia anʼé dia mi bhana ku jisata ja kutululuka ja bheka anʼa Izalaiele.

¹⁵ Ni kinama kia taku kia munomo, ni phetu ia kubhukila, a i bheka kumoxi ni maujitu ma kuoha ni túbhia ma banha, anga a i bhuka hanji kuma ujitu ua kubhukila bhu pholo ia Jihova: anga i kala ié, ni ia anʼé, kuma dikanda dienu dia izuua ioso sé thembu; mukonda kiene kia tumu Jihova.

¹⁶ Mozé anga u kala mu sota ni muanu o hombo ia sata ia kituxi, u sanga-phe a i oha kiá, anga u temena Eliiazale ni Itamale anʼa Alá a xala-bhu ni muenhu, uixi:

¹⁷ Phalahi o sata ia kituxi ki mu i dila bhu kididi kia zele kia dibhezelu? Kuma iene i kôla kinéne; kima kia mi bhana Jihova mu kuambata o ikuma ia kilômbo kioso, ni ku a bhangela kiamenga bhu pholo ia Jihova.

¹⁸ Mua mono-ze, ni manhinga mé ngoho ka a bheka dingi moxʼia dibheze-lu; mua tokalele-phe mu i dila mu dibhezelu kala ki nga mi tumu.

¹⁹ Alá anga u vutuila Mozé, uixi: Anʼami lelu a bhana sata iâ ia kituxi ni sata iâ ia kuoha, bhu pholo ia Jihova; maji ua mono kua ngi bhiti ima kala iii; se ngedile ni sata ia kituxi ngi i dia lelu ki ngala ni dilambʼiki, manhi kieje kuuabha ku mesu a Jihova?

²⁰ Mozé-phe ki evu kiókio, kia mu uabhela; kuma ua mu mono ua lungu.