II Timote 4 - O Mikanda Ikola

¹ Nga ku tendelela ku mesu ma Nzambi ni ma Kristu Jezú ua kà fundisa athu a muenhu ni madifundu, mu kuiza kué ni mu Utuminu uê, kuila:

² Enda ni kutanga o maka; sakalala mu ku a jimbula bhu kala kithangana, ni mú kamba kithangana. A tolole miẋima, a bazele, a longese, ni kuxididika kuoso ni kulombolola.

³ Kuma kuanda kuiza thembu athu ka kà xikana dingi ulongelu uadisanze, mbé o kukaiela jihânji jâ jaiibha. Mokonda-phe dia kuzanzala mu matui, a kà lunjika ndumba dia jimesene ja vondadi iâ, jenda ni ku a tangela ioso ia solo ene kuivua.

⁴ Athu enhá a kà katula matui mâ mu kuivua o kidi, hé a kà lunga ku maka ma kusabhula.

⁵ Eie-phe enda ni ku di langa mu ima ioso. Kolokota o kutala hadi, kalakala kia tokala o mukunji ua Njimbu Iambote, kumbidila kiambote o ungunza ué kua Nzambi.

⁶ Kuma eme kithangana kia bhixila, nga kinga kiá ku ngi sata. Thembu iami ia kukatuka ia zukama, kumbi diami dieza-bhu dia kuxisa kiá o muenhu iú.

⁷ Ngalu ita iambote, dikanga dia ngi xindile nga di zubha, o kuxikana ki nga ku eha.

⁸ Tundé kiki, kua ngi xikamena kiá kitundu kia kuiuka, Ngana, o Mufundixi uaiuka, ua kà ngi bhana-kiu bhu kizuua kiná; ki eme ngó a ngi bhana, maji ni ene oso kiá a zola o ku di mona mi Muène kià kèza.

Timote a mu tumu kuiza bhuala Phaulu. Kubhana jilekalu ni kulekela

⁹ Bhanga kioso ki ua tena phala ku ngi sanga kunu kindala.

¹⁰ Mukonda Demase ua ngi xi, iú uaii ku Tesalonika, mukonda dia kuzola mundu uenhú. Kelesende uaii ku Ngalásia, Titu ku Ndalamaxia.

¹¹ Luka ngó nga xala-nê. Katula ue Marku, uize-nê, kuma u ngi kuatekesa ku sedivisu.

¹² Tixiko-phe nga mu tumu ku Efezo.

¹³ O kapote ku nga xile bhu Tolouade, mʼonzo ia Karpu, ngi kbhekele-ku ki uanda kuiza. Ngi bhekele ue ni madivulu, kota-kota-phe o mikanda ia malânda.

¹⁴ Xandele dia musudi ua ngi bhange phulu iavulu. Ngana u mu vutuila kia fuama mu imbamba iê iene kubhanga.

¹⁵ Eie-phe di lange kioso ki uendanê, kuma muène ua fudisa kiavulu maka metu.

¹⁶ Ku dimanda diami, ki nga diangele kufunda, kana muthu ua ngi bandele. Ene oso a ngi xile. Nzambi tamanu ka a tela na-kiu mu konda iâ!

¹⁷ Bhenhobho-phe Ngana ua ngʼimanena, ua ngi bhana nguzu, phala ngi tene kuzubha kubhana o Ngolokela, akua jixi joso, ka tokala ue mu muiji ua Jijudé, nʼévue. Iu ua ngi kudila mu kanu dia hoji.

¹⁸ Ngana hanji u ngi kudila ku phulu ioso i ambe ku ngi bhanga, hé u ngi bhulula katé ku Mbanza iê ia diulu. O fuma ioso i kale ia Muène katé ku hádia ni hádia. Amén.

Maumenekenu ma sukidila-ku

¹⁹ Menekena Pidisila ni Akuila, ni akua bhata dia Onezifolo.

²⁰ Erasto ua xala mu Kolindo. Tolofimo-phe nga mu xi bhu Mileto ni kukata.

²¹ Bhanga lusolo phala ku ngi sanga, kiosuʼiki kiluua thembu ia mbàmbi i bhixila. Eubulu ua tumu ku ku menekena, ni Pude, ni Lino, ni Kalaudia, ni jiphange joso.

²² Ngana Jezú Kristu, akale ni nzumbi ié. O kiadi kia Ngana Nzambi ki kale ni enu oso koko.