II Timote 3 - O Mikanda Ikola

Jithembu jabhonzo ja kèza-ku

¹ Ijiia na-kiu-phe, kuma: Mu izuua isukidila-ku kuanda kuiza jithembu jabhonzo.

² Kuma athu a kà kala azodi a ene ngó, injenji, akua ukumbu, a tènda akuâ, a nonga, a xikbhaka tata ni mama, a kamba kusakidila, a kamba ujitu ua Maka ma Nzambi.

³ Ka moneka henda ia muthu, kene kuloloka, akua kutatela ngó akuâ, keji kufikisa jihanji, a kaka, a di zemba ni ima iambote.

⁴ Enʼiá a bhanga ufe, a thathamana, a vula izala. A kala azodi i jivondadi jâ, ki azodi a Nzambi, kana!

⁵ Ku kanga a kuata kidifua kala kia kuxila Nzambi, maji ki kalakala o kutena kua Nzambi-phe, a ditunu-kiu. Athu a kala kiki ue, a sondoloke.

⁶ Kuma enhá ene akua kubokona jinzu ni kuzomba, ambata-mu jisemenhi ja ahatu, jezala ni ituxi, ja senduka ni jihânhi javulu jaiibha.

⁷ Ahatu enhá andeka okulu ni ku di longa, maji nuka a tena kuijiia o kidi.

⁸ Mukuâ ni Jane ni Jambele a fudisile Mozé, enhá ue a fidisa o kidi. Athu a bolo ilunji, kuxikana a ku tokoka.

⁹ Bhene bhezʼabha-phe, a suku, ka-nda kuia dingi dikanga! Kuma o uoua uâ uandù tukuluka ku athu oso, uila kia tukulukile ua Jane ni Jambele.

Kujijila ulongelu uambote

¹⁰ Eie-phe ua kaiela jinga ulongelu uami, ni uendelu, ni ukanenu ua muenhu uami. Uene mu kaiela ue ni kuxikana kuami ni kuxididika, ni henda, ni kinhenge, ni mu malebhu, ni mu jiphaxi.

¹¹ Eie uejiia kiambote ioso ia ngi bhitile mu Andiokia, ni mu Ikonio, ni ku Listra; jihadi jahi ngó ji nga talele! Maji mu ima ioso-phe Ngana ua ngi kudila-mu.

¹² Kiene muene! Ene oso kiá a sola kuenda mu ukidistá kala ki andala Nzambi mua Kristu Jezú, andù tala hadi ni ku a zukutisa!

¹³ Maji athu aiibha-phe, akua makutu, jindunge jâ jiia ni ku di bandekeza, a nganala athu, maji ene uâ aia ni ku a nganala.

¹⁴ Eie-phe, xikama mu ima ioso i ua di longa jinga, i ua mono ia kidi. Kuma ene uâ, o jimesene jé mu kuxikana, a ku longoio, ua a tongolola.

¹⁵ Mukonda eiemuène tundé undenge uejiia Mikanda Ikôla i tena ku ku ijidisa o kubhuluka, mu kuxikanʼoko kuene mua Kristu Jezú.

¹⁶ Kuma Mikanda ioso ia bhusu Nzambi, mikanda ia kubhandulula, ni mu kulonga o kidi, ni mu kubazela itondalu, ni mu kuiukisa iabhengalala, ni mu kuijidisa uendelu uambote.

¹⁷ Iene iosuʼii phala muthu ua Nzambi a tenene, ua di lungu kiasoko, mu kubhanga madimu moso mambote.