II Timote 2 - O Mikanda Ikola

Undanda ua mukunji ua Ngana

¹ Eie-phe, u monʼami, kala u kindanda mu kiadi ki tuene na-kiu mu ukamba ni Kristu Jezú.

² Ima i uévua jinga ko-kuami bhu pholo ia jimbangi javulu, lûndisa-iu ku athu ala jifiiele, a tena ue kulonga akuâ.

³ Kolokota o kutala hadi kumoxi ni eme-muène, kala u dikuenze diambote dia Kristu jezú.

⁴ Kana muthu uaii mu usoladi u landukila dingi maunji a bhata, phala a tene kuuabhela kumandande ió uoso ua mu sendalesa o usoladi.

⁵ Se muthu ue u di xina ni akuá bhu ididi ia matonokenu, ka mu zuika kitundu, se ua kambe kualuka o ijila ia ku di xina.

⁶ Kidimakaji u tala hadi ni kukalakala mu kudima, muène u dianga kutomona ku idima iê.

⁷ Xinganeka kioso ki nga mu zuela, mukonda Ngana uanda ku ku bhana kilunji mu ima ioso.

⁸ Lembalala kuma Jezú Kristu, ku mbutu ia Davidi, ua fukunuka ku madifundu, uila ki ngene kutanga mu Njimbu Iambote i ngene mu kuboka.

⁹ O mu kutanga Njimbu Iambote kì kia bhinga ngi ki talela hadi, katé ku ngi kuika malubhambu kala ngi kisueia. Maji o maka ma Nzambi-phe kene ku ma kuika.

¹⁰ Uila kiki, ima ioso ngi kolokota na-iu, mukonda dia athu a ngene a Nzambi òsole. Ngi ki bhangela phala a tambule ubhulukilu uene mua Kristu Jezú, kumoxi ni kijîngo ki kié-kiene kutunuka dingi.

¹¹ Makʼ ama ma fiiele, ma kidi: Se Kristu tua fuila-nê kumoxi, tua kà kala-nê kumoxi ku muenhu.

¹² Se tua jiji ni kukolokota mu hadi, tua kà hinga-nê kumoxi o ungana. Se etu tua mu ditunu, Muene ue ua kà tu dituna.

¹³ Se tua kambe kukala jifiiele, Muène hanji u xala fiiele, Kuma muène ka tena kualuluka.

Kana ku kaiela akua ulongelu uengi

¹⁴ Athu oso u ua kexila ku pholo, ima ienhii enda ni ku a tendelela-iu! U a tendelele ku mesu na Ngana, kuma ka di kuatele maka ma ngoho. Mbata ki ki bhandulula kima, maji ki juualesa ngó athu oso évua, mukonda o kudikuata ki kia fuama.

¹⁵ Kala ni muanu ua ku dʼidikiza kua Nzambi u muthu a ku lola, a ku mono kuiuka; u mukalakadi kua bhange kima kia tena ku ku kuatesa jisonhi; u mukua kulonga kiambote o maka ma kidi.

¹⁶ O kubuabuala kua ulalu-phe kua ibhila Nzambi, eie lenga-ku! Kuma kuenhoko kubheka kubhuma kusandula dingi kiavulu athu mu njila ia Ngana Nzambi.

¹⁷ Sai-ku athu, o maka mâ ma longa, ma seka kala ki bhanga o fidila ku mukutu. Ku jimesene jê ji longa kienhiki, kiiadi-ku ene a Himenu ni Filetu.

¹⁸ Athu o kidi a ki lueza, exi difukunukinu dia bhiti kiá, hé a diangula o kuxikana kuala na-ku akuá amoxi-mu.

¹⁹ Maji o dimanenu dia te Nzambi-phe hanji dia kolo, ki di tunguta. O ku dimikinu dienhidi dia te Nzambi, a soneka-ku exi: Ngana uejiia oso a mu tokala. Exi dingi: Muthu uoso u amba kuila ua tokala Ngana, ki bhinga ituxi u i ambula.

²⁰ Mʼonzo ia dikota-phe ki mu kala ngó itutu ia ulu ni phalata, mu kala ue ni ia mixi ni ia mavu. O ii ia ujitu phala ngó ku i katula bhu ithangana ia tokala, o iamukua-phe iene ia izuua ioso.

²¹ Se muthu-phe u di zelesa ku ima ioso iii iaiibha, u kala kitutu kia ujitu, kiazele, kia fuama muadiʼê, kia xikamena kubhanga na-kiu kimbamba kioso kiambote.

²² Jihânji-phe ja unzangala, lenga-ju, u kaiele o kuiuka, ni kuxikana, ni henda, ni paze, kumoxi ni ene oso kiá a dikola kua Nzambi ni muẋima uazele.

²³ O kudikuata ni athu jiphata ja usemenhi-phe, ja uoua, ditune-ju. Eie kuma ua kʼijiia, ku dizubhilu diê ji bheka jimvunda.

²⁴ Ngunza ia Ngana-phe ka fuama u kuata mvunda. Maji u kala muthu u lendukila athu oso, u ijiia kulonga kiambote, u xididika.

²⁵ U longesa ni kubelesela oso a ẋinuka, né kiá a mu xinukina muène. Sumba Nzambi u a bhana o kithangana kia kudiela, nʼeze mu kujiia o kidi.

²⁶ Mbe a tambule kilunji kia kusukunuka mu mubhetu ua Diabhu, mukua ku a kuika ni ku a bhangesa kutumaka o vondadi iê.