II Tesalonika 3 - O Mikanda Ikola

Phaulu ni akuá a bhinga ku a sambela

¹ O kia xala-ku, enu jiphange, tu sambedienu, phala o maka ma Ngana ma sambuke lusolo, ma fumane, kala ki kia bhiti ku mualʼoko.

² Sambenu ue phala etu Nzambi a tu kudile ku athu a thathamana, akua phulu, kuma ene oso ka sokela-ku mu kuxikana.

³ Maji o Ngana-phe uala fiiele. Muène u mi suinisa, u mi langa, phala o Mudiangudi ió ka mi kuate.

⁴ Tua mi dielela ue mua Ngana, kuma mua bhange ima ioso i tua mi tendelela, ni ku pholo iene i mu bhanga.

⁵ Ngana-phe a mi lungise miẋima mu henda ia kuzola jinga Nzambi, ni mu kinhenge ki tunda kua Kristu.

Muthu ua tokala kukalakala

⁶ Kiki-phe tua mi tendelela, enu jiphange, mu dijina dia Ngana ietu Jezú Kristu, kuma mu di kalelela ku uphange ni muthu uoso u enda ngó ni ulalu, u kamba kukalakala hé ufula kukaiela dilunda di tua mi bhana.

⁷ Mukonda enʼuenu mua kʼijiia kioso ki mua tokala o ku tu fikisa etu. Kuma athu etu ka tu muene ni usonde ua ku kamba kukalakala ki tua kexile muʼaxaxi kenu.

⁸ Kana ue muthu tua mu dila ngó o kudia kuê, etu tua kambe ku mu futa. Maji, bhu kididi kia kukamba kukalakala, etu tua fubuka ni kututumba katé tua bhuila. Mu kukalakala, ki tu zumbuka usuku mba muanha, phala kana muthu tu mu nemena.

⁹ Ki tua ki bhangela-phe mukonda tua kambe ukota ua kutambula ujitu uoso-uoso bhu maku enu, ni mu tu kuatekese, maji tua ki bhangela o ku mi bhana phangu, phala mu tu fikise.

¹⁰ Mukonda ni ki tua kexile hanji kuenhoko, tua mi tendelela, tuexi: Muthu se nguê kukalakala, kana ku mu bhana kudia.

¹¹ Kuma tuevu-ku a moxi mudienu asonde, kuma ala kuenda ngó ulalu, kene kukalakala, a kala ngó itoka mu imbamba ia akuá.

¹² Kienhiki, oso akua kubhanga kiki, tua a tumu, etu tua jijila ku a ambela kuma, a kalakale ni kubatâma, a die kudia mu konda ia ene.

¹³ Maji enu-phe, jiphange, kana kukuata usudi mu kubhanga kiambote.

¹⁴ Se bhu kala muthu nguê kutumaka o njimbu ietu iii mu mukanda uenhú, muenhó mu tungudienu. Kana ku di lunga-nê, phala sonhi ji mu kuate.

¹⁵ Maji kana-phe ku mu kita nguma ienu, inda mu mu bazela kala phangʼienu.

Kulekela

¹⁶ Kiki muène, Ngana ia kutululuka, a mi bhane jinge kutululuka mu ima ioso.

¹⁷ Umenekenu uami eme ngi Phaulu, nga u soneka ni lukuaku luami muene, kiene o kijimbuete mu mikanda iami ioso. Kiene ki nga mu di sonekʼokio.

¹⁸ O kiadi kia Ngana ietu Jezú Kristu ki kale ni enu oso.