II Samuuele 9 - O Mikanda Ikola

Davidi u bhanga mbote ku mon ʼa Jonata

¹ Davidi anga u ibhula, uixi: Hanji kua xala muthu ku dibhata dia Saúlo, phala ni ngi mu idikiza henda mukonda dia Jonata?

² Tala, ku dibhata dia Saúlo anga ku kala mukua-mbèle, dijina diê Nziba. Anga a mu ixana kuiza kua Davidi; muenexi anga u mu ibhula, uixi: Eie muene Nziba? Uixi; Eme-muène, Muadi, ngi mubhikʼé.

³ Muenexi uixi: Ku dibhata dia Saúlo hanji kua xala muthu, ni ngi mu idikize henda ia Nzambi? Nziba anga u ambela muenexi, uixi: Sai hanji monʼa Jonata ua diiala, ua nemana inama iê iiadi ioso.

⁴ Muenexi anga u mu ambela, uixi: Muene, iú kuebhi? Nziba anga u ambela muenexi, uixi: Iú monzo ia Makidi, monʼa Amiiele, bhu Lodebale.

⁵ Muenexi Davidi anga u tuma ku mu takana mʼonzo ia Makidi, monʼa Amiiele bhu Lodebale.

⁶ Mefibozete monʼa Jonata, monʼa Saúlo, anga uiza kua Davidi, u dibhala pholo bhoxi, u diunda. Davidi uixi: Mefibozete! Muene uixi: Emʼiú, Ngana, ngi mubhikʼé!

⁷ Davidi hé u mu ambela, uixi: Ku kale ni uoma; kuma ngi ku idikiza henda muene, mukonda dia Jonata, tatʼenu; ngi ku bhana dingi mikáu ioso ia kukuʼenu Saúlo; eie-muène u kala jinga mu kúdia mbolo ku meza mami izuua ioso.

⁸ Muene anga u bhetamena bhoxi, u diunda, uixi: Eme muene nga soko kiebhi, ngi mubhikʼé, kuila eie u ngi ta mesu kiki, ngedi kala ímbua ia di fuila?

⁹ Bhenhobho muenexi anga u ixana Nziba, mukua-mbèle ia Saúlo, hé u mu ambela, uixi: Ioso ia tokalele kua Saúlo, ni dibhata diê dioso, nga i bhana kua monʼa muadiʼé.

¹⁰ Eie u mu dimina jinga mábhia ê, ni eie, ni anʼé, ni abhikʼé; u mu bhekela jinga ku idima, phala monʼa muadiʼé a kale ni kúdia; maji Mefibozete muene-phe, monʼa muadiʼé, u dia jinga ku meza mami. Nziba muenhú anga u kala ni kuinhi dia mona ni kitanu, ni makuinhi aiadi a abhika.

¹¹ Nziba anga u ambela muenexi, uixi: Kùku, kioso ki ua tange, ngi ki bhanga muene, ngi mubhikʼé. Muenexi-phe, uixi: Eie u Mefibozete, udia jinga ku meza mami, kala kiene kúdia anʼa sobha.

¹² Mefibozete anga u kala ni monʼê muene, hanji mona-ndenge, dijina diê Mika. Ene oso-phe mu dibhata dia Nziba a kala mu bhikila Mefibozete.

¹³ Mefibozete anga u tunga kienhiki mu Jeluzaleme; u kala mu kúdia jinga ku meza a muenexi. Muene-phe ua nemana inama iê iiadi ioso.