II Samuuele 8 - O Mikanda Ikola

Jixi jamukuá ji toloka kuma ki ji tena kubhânga ni Davidi

¹ Kia bhiti imʼii, Davidi u beta akua Fidíxia, hé u a tolola; o kijingo kia kutumina mbanza iâ ia dikota, u ki tambula bhu maku ma akua Fidíxia.

² Anga u beta akua Mouabhe ni ku a zonga ni mukolo; u a zekesa bhoxi, anga u zonga mikolo iiadi ia ku jibha, mukolo umoxi ua ku a xisa ni muenhu. Akua Mouabhe anga a kala mu bhikila Davidi, enda ni ku mu bhakuila madijimu.

³ Davidi anga u beta ue Hadadezele, monʼa Lehobo, sobha ia Zoba, kia sotele kusambukisa utuminu uê katé ku ngiji ia Eufalate.

⁴ Davidi anga u mu bua midi ia muthu ni hâma sambuadi, akua kumondala jikabalo, ni makuinhi aiadi a midi, makuenze akua kuenda bhoxi; Davidi anga u batula mixibha ia jikabalo, u xia-ku ngó ji tokala mu hâma ia makalu.

⁵ Akua Sídia ue, mu Damasku, ki eza mu ku banda Hadadezele, sobha ia Zoba, Davidi u buidisa ku akua Sídia makuinhi aiadi a midi ia mala, ni midi jiiadi.

⁶ Davidi anga u ta jipoxto mu Sídia ia Damasku, akua Sídia anga a kala mu bhikila Davidi, enda ni ku mu bhakuila madijimu. Jihova anga u bhana uzonda kua Davidi, kuoso-kuoso kuambe kulunga ni kúlua, u kala mu tolola.

⁷ Davidi anga u tambula jingubu ja ulu, ja zakelele o makuenze a Hadadezele, anga u ji bheka mu Jeluzaleme.

⁸ Ni ku Beta, ni ku Belotai, o jisanzala ja Hadadezele, sobha Davidi u tambula-ku ue ngôndo ia nzungule muene.

⁹ O ki evu Toi, sobha ia Hamate, kuila Davidi ua beta kifuxi kia Hadadezele,

¹⁰ Toi u katula monʼê Jolamu, u mu tuma kua sobha Davidi, ku mu kunda, ni ku mu tanesa, mukonda ualu ni Hadadezele, iu ua mu beta; kuma Hadadezele ua kexile izuua ioso mu kúlua ni Toi. Jolamu anga u mu bhekela malonga a phalata, ni malonga a ulu, ni malonga a ngôndo.

¹¹ Malonga enhá Davidi anga u a lumbila Jihova, anga u mu lumbila ue ni phalata ni ulu ia tambula ku jixi jamukuá joso ja tolola, o jixi kala jiji:

¹² ni ku Sídia, ni ku Mouabhe, ni ku anʼa Amone, ni ku akua Fidíxia, ni ku Amaleke, kumoxi ni iii ia tambula madibhundila kua Hadadezele, monʼa Lehobo, sobha ia Zoba.

¹³ Davidi anga u fumana dingi o dijina kiavulu, kuma o kia vutuka mu beta akua Sídia, mu Kibota kia honga ia Môngua, ua beta-mu ue dingi kuinhi dia midi ni nake dia midi ia muthu akua Edomo.

¹⁴ Anga u ta jipoxto mu Edomo, akua Edomo oso anga a kala mu bhikila Davidi.

O jifixiiadi ja Davidi

¹⁵ Davidi anga u kala mu tumina Izalaiele ioso; Davidi u batula milonga, u kumbidisa o kidi muʼaxaxi ka mundu uê uoso.

¹⁶ O Jouabe, monʼa Zeluia, muene o komanande u tumina o kifuxi kioso kia makuenze a ita; Jozafate, monʼa Ahiludi, u kala musoneki a jindunda ja malunda;

¹⁷ o Zadoko, monʼa Ahithube, ni Ahimeleke, monʼa Abiiatale, a kala jinganga;

¹⁸ o Selaia u kala kidivá; o Benaia, monʼa Jehoiada, muene komanande u tumina o masoladi ene kulangidila muenexi, o Makeleti ni Mapelete; anʼa Davidi anga akala ue ene o makota ku mbanza.