II Samuuele 7 - O Mikanda Ikola

Davidi u mesena kutunga Tembulu ia Nzambi. Njimbu ia mu tudila polofeta

¹ Anga ki bhita kuila, Sobha Davidi kia zubha kukala kiá mʼonzo iê, Jihova ue ua mu bhana kunhoha, ku jinguma ja tokala ku mbandu joso;

² Muenexi u ambela polofeta Natane, uixi: Talesa, eme nga tungu mʼonzo ia musédulu, o álaka ia Nzambi phe hanji ia tungu mu jilona ja balaka.

³ Natane anga u ambela muenexi, uixi: Ndeie, u bhange kioso kia ku kala ku muẋima, kuma Jihova uala nʼeie.

⁴ Anga ki bhita usuku uenhó, kizuelu kia Jihova kʼiza kua Natane, uixi:

⁵ Ndeie, kà tangele selevende iami Davidi: Eme Jihova uambe kiki: Manhi eie u ngi tungila inzo mu ngi kala?

⁶ Kuma kiluua ngi tunga mʼonzo tunde kizuua ki nga katula anʼa Izalaiele mu Ijito, katé kizuua kia lelu, ngene kukala-phe mu balaka ni mu fundu.

⁷ Mu ididi ioso mu nga nhungana ni anʼa Izalaiele, ua ngiʼvua ni ku ki zuela ku miji ia Izalaiele ioso i nga tuma jinga kuinga mundu uami ua Izalaiele, kuila: Mua kambela-hi ku ngi tungila inzo ia misédulo?

⁸ Ki tualʼiki-phe, kà tangele selevende iami Davidi, uixi: Eme Jihova dia Ifuẋi, uambe kiki: Nga ku katula mu kuinga ibhaku mu iangu, mu kombola jimbudi, phala u kale ku pholo mu tambula konda ia mundu uami ua Izalaiele.

⁹ Eme ngende ni eie kuoso-kuoso ku ua di tela jinga, jinguma jé nga ji buikisa bhu pholo ié; nga ku jîngisa o dijina, kala o majina ma athu ónene a fumana mu ngongo.

¹⁰ Mundu uami ua Izalaiele nga a bhana kididi, nga-nda ku a phapha phala a tunge a some, ka bhingi dingi kutáula; isuéia ki i kala dingi mu ku a tatesa kala mʼokulu,

¹¹ kala mu izuua i nga tumine afundixi kutambula konda ia mundu uami ua Izalaiele. Eie ngi ku bhana kunhoha-ku ku izudidiku ia jinguma jé joso. O Jihova ue, ua te-ku dingi o ku ku tangela, kuma, Jihova muene ua-nda ku ku tungila eie o inzo.

¹² O kia kà tenena izuua ié, ki ua kʼàia ku kilu ni a-tatʼenu, nga kà zangeleka o mbutu ié i ku bhingana ku dima, i tunda mu divumu dié muene, o utuminu uê ngi u kuatesa, u kola kiambote.

¹³ Muenhú muene hinu u ngi tungila inzo ia dijina diami, o kiandu kia utuminu uê ngi ki kolesa bhu kididi, anga kia kà xalela.

¹⁴ Eme ngi mu kala ngi tata iê, o muene u ngi kala monʼami. Se u bhukumuka anga u tondala, ngi mu beta ni mbangala ia kubeta athu, ngi mu bha jixikote ja anʼa athu.

¹⁵ Maji o henda iami-phe ki ngi mu katula-iu, kala ki nga i katula kua Saúlo, eme nga mu katula-ku bhu pholo ié.

¹⁶ Dibhata dié-phe ni utuminu ué uà kola ku pholo ku uia, kiandu kié kià xala sé dizubhilu.

¹⁷ Kala kioso kia mu ambela Ngana mu maka mosoʼama, ni kioso kia a mono mu kisukila kiki, kiene muene kia tangela Natane kua Davidi.

Davidi u sakidila

¹⁸ Davidi, muenexi, bhenhobho u bokona hé u xikama bhu pholo ia Jihova, uixi: emeʼeme nanhi, Ngana iami, Jihova, tata! dibhata diami akuahi, phala u ngi bheke ditala kala didi?

¹⁹ Kienhiki ue ua ki mono kima kiofele, Ngana iami, Jihova, tata! Maji hanji ua tange ue ni dibhata dia mubhikʼé uixi di xalela katé ku hádia ni hádia! Kifua athu kiene kiene kubhangʼokio Jihova, Ngana iami, tata!

²⁰ Eme-phe ngi Davidi, ngi zuela dingi kiebhi ko kué? kuma eie ua ngʼijiia ngi mubhikʼé, Ngana iami, Jihova!

²¹ Mukonda dia kizuelu kié, mukonda kia ku kala ku muẋima ué, kiene ki ua kalakela ima iónene ioso iii, ni ku i ijidisa mubhikʼé.

²² Kala kiki, eie ukôla, Ngana iami, Jihova! ku moneka mukuenu u soka-nê, ki kuene dingi Nzambi iengi, kala ki tua mu kʼivua jinga mu mátui metu.

²³ Mundu uahi ue mu ngongʼumu u soka ni mundu ué ua Izalaiele, ene ngó ubheka uâ ku mundu, a bhingi Nzambi iâ uia ni ku a kudila, ni ku a bhangesa kukala mundu uê uangene, muene, nʼa di bhangela dijina, nʼa mi bhangela ue ima iónene, ni ima i kuatesa uoma mʼoxi ienu, bhu pholo ia mundu ué katé ki ua a kula mu Ijito ku akuaʼxi iengi ni ku nzambi jâ, hé u a bheka dingi ku mukutu uê.

²⁴ Mundu ué ua Izalaiele anga u a tungisa mu kala mundu ué ua di kalela mu mivu ia kambe dizubhilu; eie muene Jihova, ua di bhange u Nzambi iâ.

²⁵ O kiki-phe, u Jihova Nzambi, kizuelu kié ki ua bhana, kia tokala kua mubhikʼé, ni kia tokala ku dibhata diê, kumbidila-kiu mu mivu ia kambe dizubhilu, u bhange muene kioso ki ua tange.

²⁶ Dijina dié di fumane jinge sé dizubhilu, phala aie ni ku ki tanga kuma: Jihova dia Ifuẋi, muene Nzambi ia tambula konda ia Izalaiele; o dibhata dia mubhikʼé Davidi dià tungiua bhu pholo ié.

²⁷ Kuma eie, u Jihova dia Ifuẋi, u Nzambi ia Izalaiele, ua kʼivisa mu mátui ma mubhikʼé, uixi; Eme nganda ku ku tungila dibhata; kiene ki nga ki sangela mu muẋima, ngi mubhikʼé, o ku ku sambela musambu uenhú.

²⁸ Kiki-phe, u Ngana, Jihova, eiemuène u Nzambi imoxi, o maka mé ma kidi, eie-muène ua bangana ni mubhikʼé o kima kiambote kiki.

²⁹ Kiki-phe ki ku uabhele, Ngana Nzambi, o kuzediuisa dibhata dia mubhikʼé, phala di xalele ni di nangenene bhu pholo ié, mu mivu ia kambe dizubhilu; kuma eie-muène Ngana, u Jihova, ua ki tange. O dibhata dia mubhikʼé nda di zediue ni dibesá dié mu mivu iakambe dizubhilu.