II Samuuele 5 - O Mikanda Ikola

Davidi a mu hingisa ungana ua Izalaiele ioso

¹ Thembu ioso-phe miji ioso ia Izalaiele anga eza kua Davidi bhu Hebolone, exi: Etu-ze tu kifuba kié, tu xitu ié.

² Mu thembu iabhiti, kia kexi hanji Saúlo ku ungana, eie muene ua kexe mu tuamenena Izalaiele mu kutunda ni mu kubokona; Jihova ue ua ku ambelele, kuma: Eie uà kala u mubidi ua mundu uami Izalaiele, eie uà kala u mutuameneni ua Izalaiele.

³ Kienhiki adiakimi oso a Izalaiele anga eza kua muenexi bhu Hebolone, muenexi Davidi anga u ta-nâ kikutu bhu Hebolone bhu pholo ia Jihova; Davidi anga a mu unda ku ungana ua Izalaiele.

⁴ Davidi u kala mu makuinhi atatu a mivu kia hingi ungana, anga u bhanga makuinhi auana a mivu ku ungana.

⁵ Mu Hebolone ua bhange sambuadi dia mivu ni mbeji jisamanu ku ungana ua Juda; mu Jeluzaleme ua bhange makuinhi atatu a mivu ni itatu ku ungana ua Izalaiele ioso ni Juda kumoxi.

Davidi u tambula mbanza ia Ziione

⁶ Muenexi ni makuenze mê anga a katuka aia ku Jeluzaleme, kúlua ni akua Jebuzi ene akua ʼxi mʼokulu. Ene anga ambela Davidi, exi: Ki u kamba kutolola hanji o ifôfo ni inema, mumu kutena kubokona-mu. Kuma a fika Davidi u lémbua kukobona.

⁷ Sumbala kiene, maji Davidi mbonge iâ ia Ziione, ua a tambula-iu; iene kiá o mbânza ia Davidi.

⁸ Kizuua kienhokio Davidi u zuela, uixi: Uoso u beta akua Jebuzi, a bandele ku njila ia mulombo ua menha, a bete o inema ienhoio ni ifôfo ia di kuma ni muẋima ua Davidi. Kiene ki kia xalela mu Sabhu, exi: Ifôfo ni inema ii bhobho, ka tena kubokona mʼonzo.

⁹ Davidi anga u tunga kiá mu mbonge ienhiʼii, hé u i luka uixi: Mbânza ia Davidi. Davidi anga u bhitisa-bhu lumbu tunde bhu Milo hé uia ni kutunga katé moxi.

¹⁰ Ukota ua Davidi anga uia ni ku di bandekeza ni kukula; kuma o Jihova, Nzambi ia ifuẋi, uala-nê.

Hilamu ni utuminu ua Davidi

¹¹ Hilamu, sobha ia Tilu, anga u tuma jiphunga kua Davidi, ni miẋi ia misédulu, ni jikalupindelu ni jipedelelu, Davidi anga a mu tungila inzo.

¹² Davidi anga ki mu tongolokela kuma Jihova ua mu kuatesa bhu kididi mu ku tumina Izalaiele, kuma ua fumanesa ungana uê mukonda dia henda ia mundu uê Izalaiele.

O Família ia Davidi

¹³ Davidi anga u lumba dingi akama, u bhenga ue dingi ahetuʼê mu Jeluzaleme, kia zubha kutunda mu Hebolone; anga a vuala dingi anʼa mala ni anʼa ahatu a Davidi.

¹⁴ Majina a anʼê a a vualela mu Jeluzaleme, enhá: Ni Samuua, ni Sobabe, ni Natane, ni Solomá,

¹⁵ ni Ibhale, ni Elixuua, ni Nefeke, ni jafiia,

¹⁶ ni Elixama, ni Eliiada, ni Elifelete.

Davidi u tolola akua Fidíxia

¹⁷ Akua Fidíxia-phe kia kʼivu kuila Davidi a mu undu ku ungana ua Izalaiele, akua Fidíxia oso eza mu sota Davidi phala ku mu kuta; Davidi kia kʼivu u kulumuka ku mbonge ia kimbaka.

¹⁸ Akua Fidíxia-phe a diangele kuiza, ia a di zale mu honga ia Jilefaime.

¹⁹ Davidi anga u ibhula kua Jihova, uixi: Ngi banda mu kúlua ni akua Fidíxia, inga kana? Manhi ua-nda ku ngi thelekala-nâ bhu lukuaku luami? Jihova anga u ambela Davidi, uixi: Banda, kuma ni kidi kiene akua Fidíxia nga kà a thelekala muene bhu lukuaku lué.

²⁰ Davidi anga uiza bhu Bahalepelazimi anga u a betela bhenhobho; anga u zuela, uamba, uixi: Jihova ua muanganesa jinguma jami kala kixitu kia menha kia baze. Kiene kia lukila-bhu dijina dia Bahale-pelazimi.

²¹ Iteka iâ anga a i xia bhoxi bhenhobho; Davidi ni makuenze-mê a i zangula aia na-iu.

²² Akua Fidíxia-phe anga a banda dingi luamukuá, a di zala mu honga ia Jilefaími.

²³ Davidi-phe ki ebhula kua Jihova, Jihova uizi: Kana kubanda; inda u ta honda, hé u a kondela ku dima, ua a zombela bhu miẋi ia jimolela.

²⁴ Kioso-phe eie ki uivua mulokoso mu mafue ma jimolela kala athu a mu kuenda, kienhokio kiá eie mateka kúlua, kuma kithanganʼokio Jihova ua ku tuamenena muene ku pholo mu kubeta kifuxi kia akua Fidíxia.

²⁵ Davidi anga u bhanga kala kioso kia mu tumu Jihova, anga u beta akua Fidíxia tunde bhu Ngibeia katé bhu Ngezele.