II Samuuele 4 - O Mikanda Ikola

Akua mbèle ia Ixi-bozete a mu jibha, hé a bheka mútue uê kua Davidi

¹ Ixi-bozete, monʼa Saúlo, ki evu kuila Abinele ua fuila ku Hebolone, ua botomoka, mu maku mua mu bhuila; akua Izalaiele oso a kumbikinha.

² Ixi-bozete, monʼa Saúlo, anga u kala ni malʼaiadi, jikabhitango ja ibuka; iú dijina diê Bahana, o mukuá dijina diê Lekabe, ene oso anʼa Dimone mukua Belote, anʼa Bejamí (kuma Belote ia tokala ue kua Bejamí.

³ Suke akua Belote-phe a lengela ku Ngitaímu, ia a biluka jinzuàngiza koko katé mu kizuua kia lelu).

⁴ O Jonata-phe, monʼa Saúlo, u kala ue ni monʼê ua diiala, ua nemana inama iê iiadi. Monʼú u kala mu mivu itanu kioso ki ejiie o njimbu ja Saúlu ni Jonata ja tundu ku Jezalele; kiledi kiê anga u mu zangula, u lenga-nê; kioso-phe kiala kubhanga lusolo lua kulenga, mona ua laúka, anga u xala ni unema, Monʼú dijina diê Mefi-bozete.

⁵ Anʼa Dimone mukua Belote, Lekabe ni Bahana, anga eza, mu muanha uatu, a tula bhu kanga dia Ixibozete kioso kiala kunhoha mu kumbi dia mediia.

⁶ Anga a bokona mʼonzo, kala a-ndu katula tiliku; muene anga a mu ta mukuale mu jimbanji; Lekabe ni phangʼiê Bahana anga a lenga.

⁷ Kuma kia bokona mʼonzo a sange ua zeka bhu hama mu xilu, anga a mu toma, a mu jibha, hé a mu batula mútue, mútue uê a u ambata, ela njila ia honga ia Halaba, anga enda usuku uoso.

⁸ Anga a bheka mútue ua Ixibozete kua Davidi bhu Hebolone, ambela muenexi, exi: Talesa mútue iú ua Ixibozete, monʼa Saúlo, nguma ié, ua sota jinga ku ku tambula o muenhu ué; Jihova phe ua ku zokela mvunda ié, u muenexi, kua Saúlo ni mbutu iê.

⁹ Davidi anga u vutuila Lekabe ni Bahana phangʼiê, anʼa Dimone mukua Belote, uixi: Jihova a nangenene! Ua ngi kudila o muenhu uami mu jiphaxi, kuma kia ngi sangele muthu, uixi:

¹⁰ Talesa Saúlo uafu, ku muẋima uê ua fikile kuila njimbu iambote ia ngi tudila, maji nga mu kuatela bhenhobho, eme nga mu jibhila bhu Zikilake; kiene kisakidilu ki nga mu bhana kia njimbu iê.

¹¹ Kuambe dingi o athu iá, o isuéia a jibhila o muthu ua iuka mʼonzo iê, bhu hama iê bhua zeka; manhi o manhinga mê ngi kamba ku mʼebhula bhu lukuaku luenu, ni ku mi jimisa ue o mbutu mu ngongo?

¹² Davidi anga u tuma makuenze mê, kuila a a jibhe, anga a a batula maku ni inama, hé a a nhengena bhu dijiia, mu Hebolone. Mútue ua Ixibozete-phe a u tambula, hé a u fûnda mu mbila ia Abinele bhu Hebolone.