II Samuuele 24 - O Mikanda Ikola

Davidi u alula Izalaiele ni Juda

¹ Njinda ia Jihova anga i uamena Izalaiele luamukuá dingi, anga u vunza Davidi ku a bhanga-kiu, uixi: Ndeie, ka kuate konda ia Izalaiele ni Juda.

² Muenexi anga u ambela Jouabe, kabhitangu ka kifuxi aia-nê, uixi: Ndeie kiá ubhite ku mbandu ni mbandu ma miiji ioso ia Izalaiele tunde ku Dane katé ku Beleseba, u kuate konda ia mundu phala ngʼijiie mba mundu uoso u tena kikuẋi.

³ Jouabe anga u ambela muenexi, uixi: Jihova Nzambi ié a bandekeze mundu iú, né a tena konda iahi, phala a vule dingi luhâma, nda eie muene kùku, ngana iami, nʼu ki mone mesu. Maji phala-hi-phe, kùku, ngana iami, kia ku uabhela o kubhanga kima kiki?

⁴ Sumbala ua zuela kiki, maji kizuelu kia muenexi kiasuína, katé Jouabe ni jikabhitangu ja kifuxi etaia ku ki bhanga. Jouabe ni jikabhitangu ja kifuxi anga a tunda bhu pholo ia muenexi, mu kuia kukuata konda ia mundú ua Izalaiele.

⁵ Anga a zaúka Njolodá, a ta kibangu mu Alouele, bhua zukama ku mbandu ia kùdia ni dibhata mu kaẋi ka honga, anga a lunga ku Ngadi, ni ku Jezele;

⁶ anga a bhita ku Ngileiade, ni mʼoxi ia makôlo ia Tatimi-hodixi; a bhita mu Dani-Jahana, a kondoloka katé ku Sidonia.

⁷ A bhiẋla bhu mbonge ia Tilu, ni mu mabhata moso ma Mahivi ni Makanana; anga a tundila ku sulu ia Juda, bhu Bele-seba.

⁸ Kienhiki kia zubha kubhita ni kunhunga ku mbandu ni mbandu mʼoxi iene ioso, hé a bhixila mu Jeluzaleme mu dívua dia mbeji ni makuinhi aiadi a kizuua.

⁹ Jouabe anga u bhana konda kua muenexi ia mundu a a kondala mua Izalaiele, anga mu kala hâma nake ia midi ia makuenze a tena kusunga xibhata; o akua Juda hâma jitanu ja midi ia makuenze.

¹⁰ Muẋima ua Davidi-phe u mu êlesa, kia zubha kukuata konda ia mundu. Davidi anga u ambela Jihova, uixi: Nga te kituxi kiavulu mu kubhanga kima kiki. Kiki-phe, u Jihova, mulonga ngi katule-u, ngi mubhikʼé, nga ku diondo; kuma nga bhange uoua uavulu.

¹¹ Kúkia ni kimene Davidi u balumuka, kizuelu kia Jihova anga kʼiza kua polofeta Ngadi, thoni, ia Davidi, kixi:

¹² Ndeie ua kʼàmbele Davidi: Eme Jihova uedi kiki: Nga ku bhana ima itatu; sola-bhu kima kimoxi kioso ki ngi ku bhanga.

¹³ Ngadi anga u iza kua Davidi, u mu tangela, uixi: Eie ua mesena ku kala sambuadi dia mivu ia nzala di ku iza mʼoxi ié? Inga u bhanga mbeji jitatu ni kulenga jinguma ja ku langata, jenda ni ku ku kaia? Inga ku kala kibuika mʼoxi ié, ki bhanga izuua itatu? Tongolola kiambote kioso ki u vutula, phala ngi ki tule kua ió uoso ua ngi tumu.

¹⁴ Davidi anga u ambela Ngadi, uixi: Ngala bhu kíbhidi kia dikota! Maji kota ngi dibhalela bhu lukuaku lua Jihova, kuma muene o jihenda jê jivula; nguami kudibhalela bhu lukuaku lua muthu!

¹⁵ Kienhiki, Jihova u tumikisa kibuika mua Izalaiele tunde mu kimene katé bhu kumbi dioso dia mu xindi; ku mundu anga kufua tunde ku Dane katé ku Bele-seba makuinhi sambuadi a midi ia muthu.

¹⁶ Kioso kia zenga anjo lukuaku luê ku thandu dia Jeluzaleme mu ku i buikisa, Jihova u diela divuua dia bheka, anga u ambela anjo iala ku buikisa, uixi: Kuabhu! Lukuaku lué lu suke bhenhobho! Anjo ia Jihova anga i suka bhu dibhiatelu dia Alauna, mukua Jebusi.

¹⁷ Davidi anga u ambela Jihova, kia mono o anjo iala kubeta o mundu, uixi: Tala, nga te kituxi eme, eme nga bhange kuthathamana; jimbudi jiji-phe ja bhange kima kiahi? Nga ku diondo, lukuaku lué lu ngi nemene eme, ni dibhata dia tatʼetu.

¹⁸ Ngadi anga u iza kua Davidi kizuua kienhokio, uixi: Banda ku thala, u tunge kalatódkio ka Jihova bhu dibhiatelu dia Alauna, mukua Jebuzi.

¹⁹ Davidi anga u banda ku thala mu kaiela kizuelu kia Ngadi, kala kia mu tumu Jihova.

²⁰ Alauna anga u tala mu kanga, u mona muenexi ni mbèle iê ala mu kuiza bhuoso bhuala muene; Alauna anga u tunda, u bhetemena bhu pholo ia muenexi, u tula pholo mu mavu.

²¹ Alauna anga u zuela, uixi: Kùku, ihi ia ku bheka kiki kua mubhikʼé? Davidi uixi: Kia ngi bheka o kusumba dibhiatelu ko kué, ngi tunge-bhu kalatódio ka Jihova, phala kibuika kiki ki batuke ku thandu dia mundu iú.

²² Alauna anga u ambela Davidi, uixi: Kùku, tambula u bhakule ioso i ua mono ia tokala; jingombe jiji ja sata ia kuoha, mabaia ma kuhuhila iá, ni jijiungu ja jingombe ji kale jihuinhi,

²³ Kùku, iene ioso iii nga ku bhana-iu, ngana iami. Alauna anga u ambela dingi muenexi, uixi: Jihova Nzambi ié a ku tambulule, kùku!

²⁴ Muenexi anga u ambela Alauna, uixi: Ki kiene; kikale ngi i sumba muene ko kué mu kitadi kioso kia tokala. Ki ngi xikina kubhakula kua Jihova Nzambi iami, jisata ja kuoha ji nga tambula mu ngoho, nga kambe kuta-mu kima. Kienhiki Davidi u sumba dibhiatelu ni jingombe, mu makuinhi atanu a xikulu ja phalata.

²⁵ Davidi anga u tungila-bhu kalatódio ka Jihova, hé u bhakuila-bhu jisata ja kuoha ni jisata ja kuluulula. Kienhiki Jihova anga u xikina o kudionda kuâ, kuala kudiondela oxi, kibuika kia kexe mu buikisa Izalaiele anga ki batuka.