II Samuuele 23 - O Mikanda Ikola

Muimbu ua Davidi ua kulekela.

¹ Enhá ene o maka ma sukidila-ku ma Davidi. Davidi monʼa Jese uambe kiki; muthu ió a mu zangeleka ditala dia dikota, a mu undu ni maji kuala Nzambi ia Jakobo, uixi:

² Nzumbi ia Jihova ua zuelela moxi diami, maka mê ma ngi tula bhu dimi.

³ Nzambi ia Izalaiele ua zuela ditadi dia Izalaiele muene ua ngʼambela: muthu u tumina athu mu uiukilu uê, ió u tumina mu uoma ua Nzambi,

⁴ U kala mukuâ ni kuma kúkia, ki kala mu tunda o dikumbi, mu kimene kia kambe o matuta; mukua ni iangu iauisu i sabhuluka mu ngongo kitua o muanha ua zele, kuila mvula ia tundu mu kunoka.

⁵ Dibhata diami manhi ki kiene ki dia tungiua ku mesu ma Nzambi? Kuma ua te ni eme kikutu ki nangenena, kia jimbuluka mu ima ioso, kiókondeke; ioso ia kubhanduluka kuami, ioso ia mbote i ngʼinda, manhi ki muene u i buingitisa?

⁶ Akua kubhuma-phe a soko ni minha, ia kinga ku i texe; mukonda minha ku tena ku i kuata ni maku.

⁷ Muthu u i bhixila, ki bhinga u i kuata ni felu, mba u kala ni muẋi ualebha kala mubhinhi ua sosa; hinu-phe i bhita, i buila mu túbhia, a i ohela bhu kididi kia tokala.

O kutena kua makuenze a Davidi

⁸ Enhá ene o majina a mazonda ma kexile ni Davidi: Josebe-Basebete, monʼa Takemoni, kota dia jikabhitangu; muene Adino mukua Ezini, ua bhânga ni hâma nake ia muthu hé u a jibha kizuua kimoxi.

⁹ O ku kunda diê kua kaiela Eleizaele, monʼa Dodo, monʼa Ahuoi, dizonda ku mazonda matatu ma kexe ni Davidi bhu Efeji-Damini, kia luisa kaẋo ku akua Fidíxia a bhongoloka ku ita, ene-phe akuâ, akua Izalaiele, a muangana kiá, a lenge.

¹⁰ Muene-phe u balumuka anga u beta akua Fidíxia katé lukuaku luê ki lua bhuila, o lukuaku anga lu mu naminina ku xibhata. Jihova anga u kalakala kubhanduluka kua kikóue kia dikota kizuua kienhokio. O mundu ua masoladi kia alukila kua Eleiazale, eza kiá ngó mu kubonga imbamba ia madibhundila.

¹¹ O ku kunda diê kua kaiela Xama monʼa Haje, mukua Haladi. Kuma akua Fidíxia a bhongoloka mu kubhûnda idima, anga a kala mu díbhia diezala iẋanane; mundu anga a lenga akua Fidíxia.

¹² Muene-phe u imana mu kaẋi ka díbhia u di bhângela, u jibha akua Fidíxia. Jihova anga a kalakala kubhanduluka kua kikóue kia dikota.

¹³ Anga bhu kala kitatu ku makuinhi atatu a makota a mala, a kulumuka bhu thembu ia kumuna, a sanga Davidi mu dibànda dia Adulamu; o kibuka kia akua Fidíxia anga akala bhu kibangu mu honga ia Lefaími.

¹⁴ Davidi thembu ienhoio u kala mu mutôlo, akua Fidíxia-phe a te poxto iâ mu Beleme.

¹⁵ Davidi anga u sema, uixi: Tamanu bhu kala muthu u ngi bhana kúnua menha a kixima kia Beleme, kia zukama bhu muelu ua kimbaka.

¹⁶ Mazonda matatu enhá anga a bula mu kaẋi ka kifuxi kia akua Fidíxia, a sunga menha mu kixima kia Beleme, kia zukama bhu muelu ua kimbaka, anga ambata menha, enhá a a bhekela Davidi. Muene-phe ka xikina ku a nua, maji u a lunduluila bhoxi bhu pholo ia Jihova.

¹⁷ Uixi: Kikola, Jihova! se ngi ki bhanga ki kala kisunji! Mbata Phalahi ngi nua manhinga ma athu a bhange iluezu ia ku a jibha? Kiene kia fudila ku a nua. Iene ima ia bhangele mazonda matatu enhá.

¹⁸ Ni Abisai, phange ia Jouabe, monʼa Zeluia, muene dikota dia kitatu kiki. Muene u zenga sosa iê kubhânga ni hâma jitatu, anga u a jibha; anga u jinga dijina mu kitatu.

¹⁹ Manhi ka beta kujinga mu każi ka kitatu? Kiene kia mu ixanena kuila kota diâ; mu kijingophe kia kitatu kiadianga ka tena-mu.

²⁰ Benaia ue, monʼa Jehoiada, monʼa dizonda mukua Kabazele, ua bhangele jinge ima ia undanda, muene u jibha malʼaiadi anʼa Adiiele, ku Mouabe; u tuluka ue mu dikungu mua di bhalela o hoji, u i jibhila momo, mu thembu ia neve.

²¹ U jibha ue mukua Ejito, kindanda muene, mukua Ijitu ua kuata sosa iê, muene anga u mu sanga ni mbangala; sosa-phe u i tambula kua mukua Igito, u mu jibha ni sosa iê muene,

²² Iene ima ia bhangele Benaia monʼa Jehoiada, anga u jinga dijina mu mazonda matatu.

²³ Kijingo kiê kia tundu kia makuinhi atatu maji mu kijingo-phe kia kitatu kia dianga ka tena-mu. Davidi anga u mu bhana kutumina kilangidilu kiê.

²⁴ Azaiele, phange ia Jouabe, u tokala ue mu makuinhi atatu. Ene enhá: Elihamana monʼa Dodo ku Beleme,

²⁵ Xama mukua Halodi, Elika mukua Halodi.

²⁶ Heleji mukua Paleti, Ila monʼa Ikexi mukua Tekoua,

²⁷ Abiiezele mukua Anatote, Mebunai múkua Huxa,

²⁸ Zalumone mukua Ahuoi, Mahalai mukua Netofa,

²⁹ Helebe monʼa Baiena mukua Netofa, Itai monʼa Dibai mukua Ngibeia ia anʼa Bejamí,

³⁰ Banaia mukua Pilatone, Hidai mukua honga ia ngiji ia Ngahaxi,

³¹ Abialibone mukua Alaba, Azamavete mukua Bahudime,

³² Eliiaba mukua Salibone ku anʼa Jasene, ni Jonata.

³³ Xama mukua Halale, Ahiiamu monʼa Salale mukua Halale,

³⁴ Elifalete monʼa Ahaxibai mukua Mahaka, Eliiamu monʼa Ahitofele mukua Ngilo,

³⁵ Hezelai mukua Kalumelo, Pahadi mukua Adibi,

³⁶ Ingali monʼa Natane mukua Zoba, Bani mukua Ngadi,

³⁷ Zeleke mukua Amone, Nahalai mukua Belote, ibese ia Jouabe monʼa Zeluia,

³⁸ Ila mukua Jetele, Ngalebe mukua Jetele,

³⁹ Udiia mukua Hiti; ene oso makuinhi atatu a muthu ni sambuadi.