II Samuuele 21 - O Mikanda Ikola

Mʼoxi muiza nzala ia mivu itatu

¹ Anga ku kala nzala mu izuua ia Davidi, i bhanga mivu itatu, kuiza muvu kiene, kuiza muvu kiene. Davidi anga u sota pholo ia Jihova, Jihova anga u zuela, uixi: Nzala iii iejila mukonda dia Saúlo, ni dibhata diê diaiibha ni manhinga, mukonda ua jibha akua Ngibiione.

² Muenexi anga u ixana akua Ngibiione, u a zuelesa. Akua Ngibiione-phe ka tokala mu anʼa Izalaiele, mukonda mbutu ia xala ku akua Mamodi. Anʼa Izalaiele a banga-nene-nâ ni ku a lokela kuila ka-nda ku a jibha. Saulo-phe u sota ku a buidisa mukonda dia kusuína kuê mu zokela anʼa Izalaiele ni Juda.

³ Davidi anga u ambela akua Ngibiione, uixi: Ngi mi bhanga kiebhi? Ngi mi bhana kima kiahi mu ku mi luulula, phala mu bhane dibesá ku undundu uangene ua Jihova?

⁴ Akua Ngibiione anga a mu ambela, exi: Mulonga uetu ni dibhata dia Saúlo ki mulonga ua ulu ni phalata, kana! Ki mulonga ue ua kuila tu bhindamena kujibhisa muthu mua Izalaiele. Davidi uixi: Enu-phe muandala ngi mi bhanga kiebhi?

⁵ Ene anga ambela muenexi, exi: Muthu uoso ua tu buidisile, ua kexe ku tu kanena ku tu jimisa mbutu, phala ki kuxale muthu mu jimbamnbe joso ja Izalaiele.

⁶ Eie u kuata sambuadi dia anʼê a mala, u tu bhakuile-nâ, tu a nhenge bhu pholo ia Jihova mu Ngibeia ia Saúlo, ió a mu solele kuala Jihova. Muenexi anga u vutula, uixi: Ngʼa bhana.

⁷ Muenexi anga u xia Mefibozete monʼa Jonata, monʼa Saúlo, mukonda dia mulôko ua Jihova ua bhiti bhu kaẋi ka Davidi ni Jonata, monʼa Saúlo,

⁸ Muenexi-phe hé u kuata ana aiadi a mala a Dízipa monʼa Aiia, ua muhatu ua a vuala ni Saúlo, Alumoni ni Mefibozete; ni ana kitanu a mala a phange ia Míkala monʼa Saulo ua muhatu, ua a vuala ni Ndidiiele monʼa Badizilai mukua Mehola.

⁹ Anga u a bhakula bhu maku ma akua Ngibiione, ene anga a a nhenga mu mulundu bhu pholo ia Jihova, anga a jima mbutu sambuadi diâ kumoxi. Enhá a a jibha mu izuua ia kumuna, mu izuua iadianga bhu kumatekena kumuna sevada.

¹⁰ Dízipa monʼa Aiia ua muhatu, anga u kuata kidinhaji hé u iudika nakiu kididi kiê bhu ndánji, tunde bhu kumatekena kumuna, katé bhu kisonaxi kia a sonokena o menha ma mvula i tunda mu diulu ku thandu diâ, kehela jinjíla ji bhita bhulu kutula ku imbi iá mu muanha, né iama ia iangu mu usuku.

¹¹ Anga a ki tangela Davidi kioso kia bhange Dízipa monʼa Aiia ua muhatu, mukama ua Saúlo.

¹² Davidi anga uia u katula ifuba ia Saúlo ni ifuba ia monʼê Jonata kua akua Jabezi-Ngileiade, kuma ene ue a i nhanene mu nzunga ia Bete-Sane, bhuoso bhua i nhengene kuala akua Fidíxia, kizuua kia jibha Saúlo kuala akua Fidíxia mu Jileboua.

¹³ Muene anga u tunda kuenhoko ni ifuba ia Saúlo, ni ifuba ia Jonata monʼê, hé u banda na-iu; anga u tuma ku bhongolola ue ifuba ia iá a a nhengene.

¹⁴ Anga a fûnda ifuba ia Saúlo ni Jonata monʼê mʼoxi ia Bejami, bhu Zela, mu mbila ia Kiji tatʼâ Saúlo. Anga a kumbidila kioso kia a tumu muenexi. Kia zubha ku ki bhanga, Jihova u xikina kiua o kudionda kuâ, ixi anga i kala ni kubhanduluka.

Uzonda ku ita ia akua Fidíxia

¹⁵ Akua Fidíxia anga a lua dingi ita ni Izalaiele; Davidi anga u kulumuka ni makuenze mê kumoxi, hé u ta kibangu kiê bhu Ngobe. Anga u lua ni akua Fidíxia katé kia bhuila.

¹⁶ Davidi anga u sota kusènduka. Ixibi-benobi muthu ku mbutu ia kiiala kia dikota, uavu dionga diê dia pezala jinga hâma jitatu ja xikulu ja ngondo, ua maneka xibhata ia ubhe mu mbunda, u mesena kujibha Davidi.

¹⁷ Abisai-phe, monʼa Zeluia, u mu kudila, anga u nemeka mukua Fidíxia, u mu jibha. Bhenhobho makuenze a Davidi a mu lokela, exi: Izuuʼii eie ku tundu dingi ni etu mu ita, phala kujime o kandeia ka Izalaiele.

O mazonda ojibhe kuala makuenze a Davidi

¹⁸ Kia bhiti imʼii, ku kala dingi ita iamukuá ni akua Fidíxia bhu Ngobe. Sibekai mukua Huzata anga u jibha Safi, ua tokala ku mbutu ia iiala ia makota.

¹⁹ Anga ku kala ita iamukuá dingi bhu Ngobe. Elihanana monʼa Jaíle-Odejimi, mukua Beleme, anga u jibha Ngoliia mukua Ngate, uavu sosa iê o mubhinhi uê ngó u soka ni muixi ua muloñgo.

²⁰ Anga ku kala dingi ita bhu Ngate. Anga bhu kala diiala dia kitala kiavulu, makuʼê ala milembu isamanu-isamanu, inama iê kiene kimoxi, mukua makuinhi aiadi a milembu ni iuana; a mu vuala ue kuala kiiala kia dikota.

²¹ Muene-phe kia luisa kaẋo kua Izalaiele, Jonata monʼa Símei, phangʼia Davidi, u mu jibha.

²² Enhá kiuana kiâ ene oso a a vuala kuala kiiala kia dikota bhu Ngate; anga a jima mbutu ku lukuaku lua Davidi ni ku lukuaku lua makuenze-mê.