II Samuuele 20 - O Mikanda Ikola

Seba u kituka, anga a mu jibha. Amasa ue a mu jibha kuala Jouabe Ixi i batama kiua

¹ Bhenhobho anga bhu kala muthu ua tokala ni Kadiaphemba, dijina diê Seba, monʼa Bikidi, mukua muiji ua Bejamí; muenhú anga u xika koloneta, uixi: Etu mu kisangela kia Davidi, ki tuala-mu, mba tu kala ni undundu mua monʼa Jese! Muanganenu Izalaiele, kala muthu aie ku balaka iê!

² Akua Izalaiele oso anga a batuka kua Davidi, a kaiela Seba monʼa Bikidi; akua Juda-phe a nhenganana sobha iâ, tunde ku Njolodá katé mu Jeluzaleme.

³ Davidi anga u bhixila mʼonzo iê mu Jeluzaleme; muenexi u kuata kuinhi dia muhatu, akamʼê, ua a xile kutambula konda ia dibhata, anga u a bhaka inzo iâ imoxi mu ku a kondeka, u a dikila ni kúdia, maji muene-phe ka a bokona dingi. Anga a kala muenhomo mua a jikila, katé bhu ufuilu uê, kifua mu kikexilu kia utudi.

⁴ Muenexi anga u ambela Amasa, uixi: Kola akua Juda mu izuua itatu, u ngi bhongoluele-nâ, eie muene ue u kala-bhu bhenhobho.

⁵ Kienhiki Amasa uia kukola akua Juda ni ku a bhongolola; ku aii-phe ua kokoloka, izuua ia mu xindi iabhu, muene ka moneka luua.

⁶ Davidi anga u ambela Abisai, uixi: O ki tualʼiki, Seba monʼa Bikidi, ua-nda beta ku tu bhanga kiaiibha, ioso ia bhangele Abisalone i kala ndenge. Eie ndoko u kuate makuenze a muadiʼé, u mu kaiele, imoxi u bokona mu jimbonge ia bhiti malumbu, u tu xia ku mesu.

⁷ Abisai anga u tunda ku kunda diê ni akua Jouabe, ni Makeleti ni Mapelete, ni mazonda oso; a tunda mu Jeluzaleme mu kaiela Seba monʼa Bikidi.

⁸ Kia bhiẋila-phe bhu ditadi dia dikota mu Ngibiione, Amasa uiza mu takana-nâ, Jouabe-phe ua maneka ibakatu iê ia ita, u kala ni sinda mu mbunda, ni xibhata ia fomeka mu kizu; mu kutunda-phe xibhata i lauka bhoxi.

⁹ Jouabe anga uambela Amasa, uixi: Uala kiambote phangʼiami? Jouabe anga u kuata Amasa ku muezu ni lukuaku lua kúdia, mu ku mu bhana beju.

¹⁰ Amasa-phe xibhata iala bhu lukuaku lua Jouabe ka i mono. Kienhiki-phe muene u mu ta na-iu mu divumu, mídia iê u i sukumuina bhoxi. Ka mu tona dingi, anga u fuila bhobho. Ni Jouabe-phe ni Abisai phangʼiê, hé aia ni kukaiela Seba, monʼa Bikidi.

¹¹ Amasa anga ku mu imanena-phe dikuenze dia Jouabe bhu kimbi kiê, uia ni kutangela athu, uixi: Uoso ua zolo Jouabe, iú ua bande Davidi, a kaiele Jouabe.

¹² Amasa anga u kala mu ku di sunha-sunha mu manhinga mê, mu kaẋi ka ikoka. Diialʼidi-phe kia mono kuma mundu uoso kieza bhenhabha emana, u katula Amasa mu ikoka, u mu koka hé u mu bheka mu mukáu, u mu futa mulele, mukonda ua mono kuma uoso u tuia-bhu u imana hanji.

¹³ Kia zubha ku mu katula mu ikoka, mundu uoso a somboka ku kunda dia Jouabe mu ku kaiela Seba monʼa Bikidi.

¹⁴ Seba anga u bhita mu miji ioso ia izalaiele katé bhu Abele, bhu Betemahaka; bhobho Mabelite oso anga a mu kaiela, ua bhongolola phala ku ilanê kumoxi.

¹⁵ Anga a mu kuatela mu mbonge ja Abele ku Bete-mahaka, a mu kondela momo, anga a longeka mubhanga bhu kanga dia mbonge, ua sokela ni kitala kia lumbu; mundu uoso ala ni Jouabe anga enda ni kuṗhuṗha o lumbu phala ku lu lundumuna.

¹⁶ Anga mu mbonge, mu kala muhatu, mukua kilunji, u kola, uixi: Ivenu; nga mi diondo, ambelenu Jouabe, a zukame kunu ngi mu zuelese.

¹⁷ Muene anga u mu zukama. Muhatu anga u zuela, uixi: Eie muene Jouabe? Uixi: Eme muene. Kuala muhatu: Ngʼivue-phe tumaka, ngi kahatu kê. Uixi: Eme ngʼivua.

¹⁸ Muhatu anga u zuela, uixi: Mʼokulu a kexe mu zuela, exi: Phangu tu ibhula ku Abele ni ku Dane. O kia zuela ku Abele ni ku Dane a ki kumbidila jinga muene, kuma ene o mahezu a kubatula na-u milonga.

¹⁹ Eme nga tokala ku athu abatama, akua kitongola mua Izalaiele; eie ua-lu sota ku buidisa mbonge ia di bhanga kivuadi mua Izalaiele. Phalahi ua bhindamena kusengulula, ni kuminha undundu uangene ua Jihova?

²⁰ Jouabe anga u vutula, uixi: Lu ku suke, muhatu ua kime! Eme kubuidisa ni kuminha ki ngala na-ku.

²¹ Maka ku a te kiambote. Kuma ua ki bheka muthu umoxi ua tundu ku milundu ia Ifalaíme, dijina diê Seba, monʼa Bikidi, muene ua zenga lukuaku luê mu kukitukila muenexi, muenexi Davidi. Muenhó ngi bhakuidienu-nê, muene ubheka uê, ngende ni kumuangana, mbonge ienu i xale. Muhatu anga u ambela Jouabe, uixi: Mungu mútue uê a ku takuila na-u ku kanga dia lumbu kuene eie ku ualʼoko.

²² Muhatu anga uia ku mundu uoso hé u a zuelela ni kilunji kiê kioso. Ene anga a batula mútue ua Seba, monʼa Bikidi, a u takuila ku kanga kua Jouabe. Muene anga u xika koloneta, ku mbonge a tundu-ku, a muangana kala muthu ku balaka iê. Jouabe anga u vutuka mu Jeluzaleme kua muenexi.

O jifixiiadi ja Davidi

²³ Kienhiki Jouabe u kala muene o kumanande u tumina kifuxi kioso kia Izalaiele; Benaia, monʼa Jehoiada muene u tumina o Makeleti ni Mapelete;

²⁴ Adolamu muene u tumina akua sedivisu ala mu bhikila muenexi: Jozafate, monʼa Ahiludi, u kala musoneki ua malunda;

²⁵ Seva muene u kala Sakala; Zadoke ni Abiiatale a kala ene o jinganga;

²⁶ o Ila ue mukua Jaíle muene kota dia jitata ja kionge kia Davidi.