II Samuuele 2 - O Mikanda Ikola

Davidi u hinga ungana ua Juda

¹ Kia bhiti iene ioso iii, Davidi u ibhula kua Jihova, uixi: Ki ngalʼiki, ngi banda ku mabhata ma Juda, inga kana? Jihova anga u mu ambela, uixi: Banda. Davidi uixi: Ngi kana dibhata diebhi? Ngana, uixi: Uia ku Hebolone.

² Kala kiki Davidi u banda kuenhoko, ni ahatu ê aiadi, Ahinouama mukua Jezeleele, ni Abingaíle mukaji a Nebale mukua Karmelo.

³ Ni makuenze mê, ene mu di nhenga-nê, Davidi u bandelanâ kumoxi; kala muthu ni dibhata diê, anga a tunga mu jisanzala ja Hebolone.

⁴ Akua Juda anga eza bhenhobho, a unda Davidi mu kala sobha ia muiji uâ ua Juda. Davidi anga a mu kunda, exi: Akua Jabezi-Ngiliiade ene a fûnda Saúlo.

⁵ Davidi anga u katula jiphunga, ua tuma ku akua Jabezi-Ngiliiade, uixi: Jihova a mi benzele, kuma muedikiza ujitu kua muadiʼenu Saúlo, mua mu fûndu!

⁶ Kiki-phe Jihova a mi sakidile o henda ienu, a mi bhange kidi; eme uami ngi mi sakidila o henda ienu, ki mua tena kubhanga kienhiki.

⁷ O ki tualʼiki-phe, kolenu maku, mu bhange undanda; kuma muadiʼenu Saúlo uafu, o muiji ua Juda a ngʼundu eme mu kala sobha iâ.

Abinele u hingisa monʼa Saúlo ungana ua Izalaiele

⁸ Kiosuʼiki-phe imiʼiii ki iala kubhita, Abinele monʼa Nedi, Kabhitangu ka kifuxi kia Saúlo, ua katula Ixi-bozete monʼa Saúlo, u zaúka-nê ku Mahanaimi,

⁹ Anga u mu hingisa ungana ua kutumina Ngiliiade, ni akua Axudi, ni Jezeleele, ni Ifalaíme, ni Bejamí ni Izalaiele ioso.

¹⁰ Ixi-bozete, monʼa Saúlo, u kala mu makuinhi auana a mivu kia hingi ungana ua Izalaiele, anga u bhanga mivu iiadi ku ungana. Muiji ua Juda-phe u di tuma ni Davidi.

¹¹ Thembu ia bhange Davidi ku ungana ua Juda mu Hebolone, sambuadi dia mivu ni mbeji jisamanu.

Jouabe u kaia Abinele. Azaielea mu jibha

¹² Abinele, monʼa Nedi, ni makuenze ma Ixi-bozete, monʼa Saúlo, a tunda ku Mahanaimi, eza bhu Ngibeione.

¹³ Jouabe, monʼa Zeluia, ni makuenze ma Davidi, a tunda ue, a takana kumoxi bhu dijiia dia Ngibeione; anga a xikama bhenhobho, iá ala ku sámbua kunu dia dijiia, iá ala ku sámbua koko.

¹⁴ Abinele anga u ambela Jouabe, uixi: Minzangala a balumuke, nga ku diondo, a fikise hanji kubhanga bhu pholo ietu. Jouabe uixi: A balumuke-phe.

¹⁵ Bhenhobho a balumuka, konda iâ iene imoxi, ku akua Bejamí, makuenze a Ixi-bozete, kuinhi dia muthu ni kiiadi, ku makuenze a Davidi ue kuinhi dia muthu ni kiiadi.

¹⁶ Ene oso-phe, kala muthu ni muthu u kuata mukuâ mu mútue, anga kala muthu u kuba mukuâ mu jimbanji ni mukuale uê; ene oso anga a di bhalela bhobho, ki bhuala ua subhuka. Kididi kienhokio anga a ki luka, Kididi kia Jiphoko Jatu, mu Ngibeione.

¹⁷ Mvunda anga i vula kizuua kienhokio; Abinele anga a mu tolola, a mu kaia ni mala a Izalaiele, bhu pholo ia makuenze ma Davidi.

¹⁸ Ana atatu a Zeluia anga a kala-bhu bhenhobho, ni Jouabe, ni Abisai, ni Azaiele. Azaiele-phe u lenguluka inama kala mbâmbi mu iangu.

¹⁹ Azaiele anga uia ni kukaia Abinele; mu kukaia ka ẋkina kuabhuka ku kiasu mba ku kúdia, ua jijila Abinele muene.

²⁰ Abinele anga u sakuka u talesa ku dima, uixi: Eie-muène Azaiele? U vutula, uixi: Eme muene.

²¹ Abinele anga u mu ambela, uixi: Abhuka ku kúdia mba ku kiasu, u kuate-bhu munzangala umoxi, u mu tambule o imbamba iê. Azaiele-phe ka xikina kuabhuka, hanji ua mu nhenganana.

²² Abinele anga u ambela dingi Azaiele, uixi: Batuka-ku-ze o ku ngi kaiela eme. Inga uandala ngi ku kuama, ni u di vunde bhoxi? Hinu eme-phe ngi bhetuka kiebhi o pholo kua kota dié Jouabe?

²³ Muene-phe kuma ka xikina ku mu batuka, Abinele anga u mu ẋuka ni muxixi ua dionga diê bhu lumbanji lua katatu, mukutu uê anga u kubuka, sosa ia tundidila kuema; anga u dibhala, u fuila bhu kididi kienhokio. Bhenhobho-phe oso a tula kididi bhua dibhalela Azaiele, bhua fuila, emana hanji ni ku mu tala.

²⁴ Jouabe-phe ni Abisai aia ni kukaia Abinele. Dikumbi anga di a fuila mu kubhiẋila bhu kalundu ka Ama, mu kuila o Ngiia ualela ku mbandu ia thunda mu njila iia ku kikangalakata kia Ngibiione.

²⁵ Anʼa Bejami anga a di bhongolola oso bhuala Abinele, hé a di bhanga kibuka kimoxi, anga emana bhu thala ia kalundu.

²⁶ Abinele anga u kola, u handekela Jouabe, uixi: Kifua xibhata ié ki i zumbuka dingi mu kúnua manhinga? Mbé kua kʼijiia kuma dizubhilu diê di lula? Manhi u di xibhé, ngué ku tumina o mundu phala a batuke mu kaia o phange jâ?

²⁷ Jouabe uixi: Nga loka muene kala Jihova kiala ku muenhu, kuma eie se ua kambele kuzuela mu kimene, hinu mundu ua muangana, keji kukaia jiphange jâ.

²⁸ Jouabe anga u xika koloneta; mundu uoso anga emana, hé a batuka mu kukaia Izalaiele, mvunda iabhu, mukonda ka bhânge dingi.

²⁹ Abinele-phe ni makuenze mê, enda usuku uosuʼó mu honga ia Alaba, anga a zaúka Njolodá, a bhita mu Bitilone a bhixila ku Mahanaimi.

³⁰ Jouabe anga u vutuka mu kukaia Abinele; o kia zubha kubhongolola o mundu, ku makuenze a Davidi kua kambe kuinhi dia muthu nʼivua, kua di te Azaiele.

³¹ Maji o makuenze a Davidi-phe a beta Bejamí, ni makuenze a Abinele, katé kuafu hâma jitatu ja mala ni makuinhi asamanu.

³² Anga a zangula Azaiele, a mu fûnda mu mbila ia tatʼâ ia kexe mu Beleme. Jouabe-phe ni makuenze mê enda usuku uoso uenhó, anga a bhixila bhu Hebolone, kuma ki kuandeka kúkia.