II Samuuele 19 - O Mikanda Ikola

Jouabe u bazela Davidi

¹ Anga a ki tangela Jouabe, ex: Muenexi-ze uala mu dila, uala ni lamba dia vulu mukonda dia Abisalone.

² O kikóue kia kizuua kienokio anga ki biluka dingi malamba phala mundu uoso; kuma mundu uoso a kʼivu kizuua kienokio kuila muenexi kia mu iibhila kiavulu o kúfua kua monʼê.

³ Mundu anga mu ku bhongoloka ku bhata kizuua kienhokio eza ni kuzomba, mukuâ ni athu ala ni jisonhi, kiʼomboloka mu lenga ku ita.

⁴ Muenexi muene ua di futu o pholo, u dila ni dízui diasuina, uixi: Aiué monʼami Abisalone, Abisalone, tata, monʼamiʼé, monʼamiʼé!

⁵ Jouabe anga u bokona mʼonzo kua muenexi, uixi: Eie lelu ua bheka jisonhi mu jipholo ja makuenze mé, edi lelu ene a ku bhana muenhu, ni muenhu ué eʼmuene, ni mienhu ia anʼé a mala ni ia ahatu, ni mienhu ia akajiʼé ni ia akama.

⁶ Mukonda eie uedi kala a ku zembe ene u ua zolo, o a ku zolo ene u ua zembe. Kuma eie uedikiza lelu kuma né makota athu mba o makuenze, kua a suu ni kima. Nga mono lelu kuma Abisalone se ua bhulukile, etuʼoso anga tu fua kizuua kia lelu, eie kieji ku ku uabhela kiambote.

⁷ Kiki-phe balumuka, u tunde bhu kanga, u tanese makuenze mé ni ku a uabhesa mixima; kuma nga ku lokela mu dijina dia Jihova, ki u kamba kutunda, né muthu ngó kua-ndu xala-nê katé mu usuku uenhú, o kutata-phe ku u xala na-ku ku kala kota, kua mavuua oso a ku bhiti tunde mu undenge a ku kala ndenge.

⁸ Bhenhobho muenexi anga u balumuka, u xikama bhu muelu ua kimbaka. Anga a ki tangela mundu uoso, exi: Muenexi-ze iú ua xikama bhu muelʼú. Bhenhobho mundu uoso anga eza bhu pholo ia muenexi. Maji-phe akua Izalaiele oso a lenge kala muthu ku bhata diê.

Davidi u vutuka dingi mu Jeluzaleme

⁹ Mundu uoso anga a kala mu zoka mu miiji ioso ia Izalaiele, ni kuzuela, exi; Muenexi muene ua tu kudidile bhu lukuaku lua jinguma jetu, muene ua tu bhuluile bhu lukuaku lua akua Fidíxia; o kiki-phe mʼoxi ua lenge-mu mukonda dia Abisalone.

¹⁰ Abisalone-phe muene tua mu undile ku ungana uetu, a mu jibhila kiá ku ita. Kiki-phe mua di xibhila-hi nguenu kuzuela phala muenexi ni mu mu takane nʼeze dingi bhu kididi kiê?

¹¹ Muenexi Davidi anga u tuma jiphunbga kuambela Zadoke ni Abiiatale, jinganga, uixi: Zuelesenu adiakimi a Juda kuila kiki: Enu mu xalela-hi ku dima mu takana muenexi ni ku mu bheka dingi bhu kididi kiê? Kuma kuzuela kua Izalaiele ioso kueza kua muenexi, exi: Tu mu takana, nʼeza dingi bhu kididi kiê.

¹² Enu-phe mu jiphange jami, mu kifuba kiami, mu xitu iami. Mu sukila-hi-phe ku dima mu takana dingi muenexi?

¹³ Mua kambela ue Amasa, muixi: Eie kuala u kifuba kiami, u xitu iami? Nzambi a ngi bhange-kiu, a ngi tele-ku dingi, se eie u kamba kukala u kabhitangu ka kifuxi bhu pholo iami izuua ioso bhu kididi kia Jouabe.

¹⁴ Kienhiki anga u bilula o mixima ia akua Juda oso, kala muẋima ua muthu umoxi ngó; ene oso anga a tuma kuambela muenexi, exi: Vutuka ku bhata, ni eie ni makuenze mé moso.

¹⁵ Akua Juda anga eza bhu Jidingale, kutakana ni muenexi, ni ku mu zaukisa Njolodá.

¹⁶ Ni Simei, monʼa Jela, mukua Bejamí ua tungu bhu Bahudimi, ni muene ni kuinhi diê dia mona ni kitanu ni makuinhi aiadi a abhikʼê, u bhanga lusolo, anga u kulumukina kumoxi ni akua Juda, mu takana ni muenexi Davidi.

¹⁷ Anga bhu kala midi ia akua Bejamí ela-nê kumoxi, ni Ziba mukua mbèle ia Saúlo, ni kuinhi dia monʼê ni kitanu, ni makuinhi aiadi a abhika ela-nê kumoxi; anga a zaúka Njolodá mu mesu a muenexi.

¹⁸ Anga bhu kala bote bhu tabhu bhenhobho, i mu sanga ku sámbua mu zaukisa mbele ia muenexi, ni kukumbidila kioso kiandala muene. Bhenhobho Simei, monʼa Jela, anga u diundila muenexi, kioso kiala muzaúka Njolodá.

¹⁹ Anga u ambela muenexi, uixi: Kùku, kana ku ngi ta mulonga, kana kubhaka ku muẋima kioso ki nga bhangele ni kubhukumuka, ngi mubhikʼé, kizuua ki ua tundile mu Jeluzaleme, kùku, ngana iami, eie u muenexi. Kana ku ngi tata phonzo.

²⁰ Kuma eme ngi mubhikʼé nga kʼijiia kuila kituxi ki nga te; kiene kia ngi katula lelu, talesa, eme-muène nga dianga ku dibhata dioso dia Zuze, kuiza ku ku batuila, kùku, ngana iami.

²¹ Abisai, monʼa Zeluia, anga u kumbulula, uixi: Manhi Simei muenhú, ka tokala ku mu jibha, mukonda muthu ua Jihova ua mu undu ni maji, muene ua mu xinga jindaka?

²² Maji Davidi-phe, uixi: Etu tualʼadi ni kima kiahi, enu mu anʼa Zeluia tata! phala kizuua kia lelu mu ngi kale mu akua jimvunda ja ku ngi funhisa? Manhi kizuua kia lelu ki tokala a ki jibha muthu uoso-uoso mua Izalaiele? Eme manhi nga kambe ku kʼijiia kuma kizuua kia lelu nga tambula dingi ungana ua Izalaiele?

²³ Muenexi anga u ambela Simei, uixi: Ku kale ni hele, ku fu, kana! Muenexi anga u mu lokela.

Mefí-bozete ue u sanga Davidi

²⁴ Mefi-bozete ue, monʼa Saúlo, u kulumuka mu batuila Davidi. Muenephe ka di seke inama, ka di bhutu muezu, ka sukula izuatu, tunde kizuua kia katuka muenexi, katé kia bhongoloka ku bhata ni paze.

²⁵ Kia zubha-phe kutula mu Jeluzaleme mu kusanga muenexi, muenexi u mu ibhula, uixi: Eie kuendela-hi nʼeme ku ngele, Mefibozete?

²⁶ Muene u mu vutuila, uixi: Kùku, ngana iami, mubhikʼami muene ua ngi nganala. Kuma, eme ngi mubhikʼé, nga mu edile ngi zuikile bûlu, ngi mondale ngendele kumoxi ni muenexi, mukonda nga nemana.

²⁷ Muene kifua ua ngi tatela ko kué, kùku, ngana iami. Maji eie-phe, kùku, ngana iami, uala mukua ni anjo ia Nzambi; bhanga-phe kioso ki ua mono kia tokala.

²⁸ Kuma dibhata dioso dia tatʼetu a tokalele kuxala madifundu bhu pholo ié, kùku, ngana iami. Maji eie-phe ua ngi bhake eme, ngi mubhikʼé, mu axaxe ka athu a dila ku meza mé. Ngala-phe dingi ni kulunga kuahi, kuila ngi dikola dingi mu kubhinga kima kua muenexi?

²⁹ Muenexi anga u mu ambela, uixi: Ku tale dingi hadi ia kuzuela ngó maka enhá. Mukonda eme nga ki ambe kia kuila mavu ni jimbongo joso uanenu ngó ni Ziba.

³⁰ Mefibozete anga u ambela muenexi, uixi: Muene a tambule ioso, kabasa eie kùku, ngana iami, ua bhongoloka dingi ku bhata ni paze.

Badizilai u xinjikila Davidi bhu tabhu

³¹ Badizilai ue, mukua Ngileiade, u tunda ku Lokelimi, hé u kulumukina kumoxi ni muenexi katé ku Njolodá, u mu xinjikila katé ku sámbua dia Njolodá.

³² Badizilai-phe ua kuka kiá kiavulu, uala mu mukuinʼake a mivu, Muene ua dikila muenexi ni kúdia, kioso kiala mu Mahanaíme, kuma muadiakimi iú ua kexile mvuama ia dikota.

³³ Muenexi anga u ambela Badizilai, uixi: Zaúka kiá ni eme kumoxi, u nhohene kiá bhu mbandu iami, eme ngi ku dikile mu bhata diami mu Jeluzaleme.

³⁴ Badizilai anga u vutuila muenexi, uixi: Kua ngi xala dingi izuua ikuẋi ku mivu ia muenhu uami, kuila ngi banda ni muenexi ku Jeluzaleme?

³⁵ Leluʼidi ngala kiá mu makuinʼake a mivu, kifua ngi tena dingi kutungula kiauabha ni kiaiibha? Ki ngalʼiki, ngi mubhikʼé, ua fika kifua ngala kuívua dingi o kutouala kioso ki ngi dia mba kioso ki ngi nua? Kifua ngi tena dingi kuívua kiambote, o mázui ma jingimba ja mala ni jingimba ja ahatu? Ngi mubhikʼé, ngi di bhangela-hi ngó kimbamba kia ku ku nemena, kùku, ngana iami?

³⁶ Eme ngʼinda ngó ngi ku xinjikila mu zaúka Njolodá, ngi mubhikʼé, kùku, u ngi vutuilahi kisakidilu kia soko kala kiki?

³⁷ Ngehele, nga ku diondo, ngi mubhikʼé, ngi vutuke ku nga tundu, ngi fuile bhu bhata diami, bhuamoxi ni bhu mbila ia tatʼetu ni mameʼetu. Mubhikʼé-phe Ximamu, iu-é iú; muene a zaúke kumoxi ni muenexi, u mu bhange kioso ki ua mono kia tokala, kùku, ngana iami.

³⁸ Muene hé u vutula, uixi: Ximamu eze, a zaúke ni eme, ngi mu bhange kioso muene kia mono kia tokala; eie kioso ue ki u ngi bhinga, ngi ki bhanga muene.

³⁹ Mundu uoso anga a zaúka Njolodá, muenexi ue anga u zaúka; muenexi anga u bhana Badizilai jibeju, u mu tula kizediuise, muene anga u vutuka ku bhata diê.

Akua Juda ni akua Izalaiele a di kuata mvunda

⁴⁰ Kienhiki muenexi u zaúka, utula bhu Jidingale, Ximamu anga u zaukilanê kumoxi; mundu uoso ua akua Juda a kala mu kubatesa muenexi ni mbandu ia akua Izalaiele.

⁴¹ Mundu uoso ua Izalaiele anga a tukuluka bhenhobho bhu pholo ia muenexi, a mbela muenexi, exi: Phalahi akuetu, o phange jetu ja akua Juda, a ku nhana eie u muenexi ni mbèle ié ia a ku zaukisa Njolodá, ni mala oso a Davidi kumoxi?

⁴² Mundu uoso ua akua Juda, a vutuila akua Izalaiele, exi: Mukonda muenexi ndandu ietu ua tu tokala; enu mu ki kalela-hi ni njinda? Mua tu mono tua di ku konda ia muenexi, mba ua tu bhange ujitu ua kima?

⁴³ Akua Izalaiele anga a vutuila akua Juda, exi: Muenexi ua tu tokala etu, enu ndenge; mua tu tèndela-hi-phe, mu kamba ku dʼivisa ni etu, mu kutakana dingi muenexi uetu? Maka ma akua Juda anga ma beta kusuína, maka ma akua Izalaiele ndenge.