II Samuuele 18 - O Mikanda Ikola

O ku di lua mu ditutu dia Efalaime

¹ Davidi anga u kuata konda ia mundu uoso aia-nê kumoxi, u tungula jikabhitangu ja jimidi ni jikabhitangu ja jihâma mu ku a tumina.

² Davidi anga u tubhula o mundu mu ifuẋi itatu; kifuxi kimoxi kiala mu lukuaku lua Jouabe, kifuxi kiamukuá, mu lukuaku lua Abisai monʼa Zeluia, phange ia Jouabe, kifuxi kiamukuá mu lukuaku lua hai mukua Ngate. Muenexi anga u ambela o mundu, uixi: Eme uami ngi tunda muene ni enu kumoxi.

³ Mundu-phe exi: Eie kana kutunda; kuma etu né tua lenge, ka tu suu; né kaxaxi ketu kafu, ka tu suu; eie-phe mu kuta ua soko ni kuinhi dia midi dietuʼetu bhabha. Kala kiki-phe, kota sʼeie u xale kuema, u kale plondo ia kutunda mu mbonge phala kuia mu ku tu kudila.

⁴ Bhenhobho muenexi anga u a ambela, uixi: Kioso ki mua mono kiatokala, eme kiene ki ngi bhanga. Muenexi anga u imana bhu mbanduʼa muelu ua kimbaka, mundu u kala mu kutunda ku jihâma ni jimidi.

⁵ Muenexi anga u tuma Jouabe ni Abisai ni hai, uixi: Munzangala Abisalone, mu lendukilienu, mukonda diami eme. Mundu uoso anga a kʼivua muene, kia tendelela sobha o jikabhitangu joso, kioso kia bhanga ni Abisalone.

⁶ Kienhiki mundu uoso u tunda mu kuia ku mukáu mu kúlua ni Izalaiele; ita anga i takanena mu ditutu dia Efaleími.

⁷ Mundu ua Izalaiele anga a u betela bhenhobho kuala o makuenze a Davidi, anga kizuua kienhokio bhu kala kihaxi kia makuinhi aiadi a midi a mala a a jibha.

⁸ Kuma ita ia di zalala mu mukáu uoso uenhó, o mundu uadiua mu ditutu kizuua kienhokio ala kota mu ku vula, a diua ku mazu a xibhata ndenge.

Abisalone a mu jibha

⁹ Abisalone anga u tukulukila mu makuenze a Davidi. Abisalone ua mondala mula iê; mula anga i bhita moxi a jithangu javundu ja muxi ua dikota ua mukaluvalu, jindemba ja mútue ua Abisalone anga ji naminina mu jithangu ja muxi, muene hé u nhengena muʼaxaxe ka oxi ni diulu; o mula ia mu kala moxi dia inama iê anga i mu xia, i somboka iia ni kuenda.

¹⁰ Anga bhu kala muthu ua ki mono, u ki tangela Jouabe, uixi: Eme-ze nga sange Abisalone ua nhengama mu mukaluvalu.

¹¹ Jouabe anga u ambela o muthu ua mu kundu kiki, uixi: Kifua ua mu sange kiokio, ku mu buidisila-hi, u mu kundumuina bhoxi bhenhobho? Eme hinu ngeji ku ku bhana kuinhi dia itadi, ia phalata, ni phonda.

¹² Muthu iú anga u ambela Jouabe, uixi: Né ua ngi bhana midi ia itadi ia phalata bhu maku, ki ngeju tena kuzenga lukuaku luami mu kukuama monʼa muenexi. Kuma muenexi ua ku tendelela mu mátui metu, ni eie, ni Abisai, ni Itai, uixi: Alukenu, mudienu ki bhu kale muthu u kuama munzangala Abisalone.

¹³ Né hanji se ngedile ngi ta makutu, ni ngi bu o muenhu uê, kieje kufumana kuma muenexi kene ku mu dingila kima, eie muene ueji ku ngi lungulukila.

¹⁴ Jouabe anga u mu ambela bhenhobho, uixi: Eie ua-ndu ngi lalekesa. Anga u katula matoma matatu bhu lukuaku luê, uia, Abisalone u mu kubula mu mixima, kioso kiala hanji ni muenhu, ua nhengama mu mukaluvalu.

¹⁵ Kuinhi dia makuenze, ibese ia Jouabe ene ku mu ambatela ibhakatu iê, anga a kondoloka Abisalone, a mu zubhidisa.

¹⁶ Jouabe anga u xika koloneta, mundu anga u vutuka mu kukaia Izalaiele; kuma Jouabe ua fudisa o mundu.

¹⁷ Anga a katula Abisalone, a mu takula mu dikungu mu ditutu, a mu longekela lumu ia matadi ku thandu diê. Akua Izalaiele oso-phe anga a muangana kala muthu ku bhata diê.

¹⁸ Abisalone-phe kia kexile ku muenhu ua di tungisila philadi mu kibota kia sobha, kuma uambe, uixi: Ki ngala ni mona ua diiala u ngi jîngisa dijina diami. Philadi anga u i luka dijina diê muene; ene ku ixana exi músonga ua Abisalone, katé mu kizuua kia lelu.

Davidi u dila mukoikoi ki evu ufuilu ua Abisalone

¹⁹ Bhenhobho Ahimaaze monʼa Zadoke u zuela, uixi: Ngehele, ngi lenge kiá, nga kà tule dizelele kua muenexi kuila Jihova ua mu toluela kiá jinguma jé.

²⁰ Maji Jouabe u mu ambela, uixi: Eie ku tokala kutula njimbu lelu, inda eie u tula njimbu kizuua kiamukuá; kizuua kia lelu kana, kuma monʼa muenexi uafu.

²¹ Jouabe anga u ambela mukua Kuxi, uixi: Ndeie ka kunde muenexi kioso ki ua mono. Mukua Kuxi anga u diundila Jouabe, u katuka ni kulenga.

²² Ahimaaze monʼa Zadoke anga u tona dingi kuambela Jouabe, uixi: Né kueza-hi kioso-kioso, ngehele, nga ku diondo, ngi kaiele mukua Kuxi ni kulenga. Jouabe uixi: U lengela-hi, monʼami, eʼmuene kuala ni njimbu i tokala kisakidilu?

²³ Uixi: Ki kiediʼé kima, ngi lenga kiòmuene. Uixi, phe: Lenga. Ahimaaze anga uia ni kulenga, u di tela ia honga, mukua Kuxi u mu somboka.

²⁴ Kiosuiki Davidi ua xikama bhu kaẋi ka mielu iiadi. O mulangidi uala ku kilangidilu, anga u banda ku thandu dia lumbu bhu muelu, u zambula mesu u zongola mu kanga, u mona múthu iú uiza iuná ubheka uê ni kulenga.

²⁵ Uala ku kilangidilu anga u kola, u ambela muenexi. Muenexi uixi: Se uala mu lenga ubheka uê, uala mu kuiza kutula njimbu iambote. Anga uiza ni lusolo, u kala mu zukama,

²⁶ Uala ku kilangidilu anga u mona muthu uamukuá uala kuiza ni kulenga. Anga u ambela mukua muelu, uixi: Muthu uambukuá iu izʼú ni kulenga ubheka uê. Muenexi, uixi: Muene ue uala mu kuiza kutula njimbu iambote.

²⁷ Uala ku kilangidilu uixi: Ua tuamenena nga fika kulenga kuê kuedi kala kua Ahimaaze monʼa Zadoke. Muenexi uixi: Hé muene, iú muthu uambote, u tu tudila dizelele diambote.

²⁸ Ahimaaze kia bhixila anga u kola, u ambela muenexi, uixi: Kuala kiambote! Anga u bhetama bhu pholo ia muenexi, u tula pholo mu mavu, uixi: A tane-ku! Jihova Nzambi ié, ua tu bhakuila o mala a zengele lukuaku luâ mu ku ku bhanga kiaiibha, eie kùku, ngana iami.

²⁹ Muenexi uixi: Manhi o munzangala Abisalone, uala kiambote? Ahimaaze u vutula, uixi: Jouabe kia ngi katula ngi mubhikeʼé, nga mono ngó o kilungutu maji ki nga kʼijiia kiambote kioso kia bhiti.

³⁰ Muenexi uixi: Bhita kuku, u imane bhobho. Muene anga u bhita, hé u imana bhu kididi.

³¹ Bhenhobho ni mukua Kuxi u tula; uixi: Kùku, njimbuʼoio! Jihova lelu ua ku toluela jinguma joso ja balumukine mu ku ku bhanga kiaiibha!

³² Muenexi anga u ambela mukua Kuxi, uixi: Manhi o munzangala Abisalone, uala kiambote? Mukua Kuxi anga u vutula, uixi: Kùku, ngana iami, jinguma jé joso, ni iá a balumuka mu ku ku bhanga kiaiibha, a kale ene oso kala kiala munzangala muenhó.

³³ Muenexi anga u kala ni lamba diavulu, u banda mu sabhalalu ku thandu dia muelu, u dila; o kiala mu banda u kala mu kuila kiki: Aiué monʼami Abisalone, monʼami tata, monʼami Abisalone! Tamanu nga ku fuidile bhu kididi Abisalone, tata! Aiué monʼamiʼé monʼamiʼé!