II Samuuele 17 - O Mikanda Ikola

O kaiula ka Ahitofele ni ka Husai

¹ Ahitofele anga u ambela dingi Abisalone, uixi: Ngʼehele ngi sole mala a tena kuinhi dia midi ni midi jiiadi, ngi balumuke-nâ, ngi kaiele Davidi hanji usuku ua lelu uenhú.

² Ngi mu tukumuisa, anga ngi mu tula-phe kioso muene kia bhuila hanhi, maku a mu botomoka, kiene ki ngi mu sasumuisa; mundu uoso aia-nê a-nda kulenga; eme ngi jibha ngó muenexi ubheka uê.

³ Mundu uoso-phe hé ngʼa bheka dingi ko kué; kuma muthu umoxi ua mu bhindamena eie, se ua mu kuata mundu uoso a ku vutukila dingi mukuâ ni muhetu kia vutukila kua muadi uê; kienhiki mundu uoso u kala dingi ku paze.

⁴ Phangu ienhiʼii anga i uabhela kiambote Abisalone, ni adiakimi oso a Izalaiele.

⁵ Bhenhobho-phe Abisalone u zuela, uixi: Ixanenu ue Husai mukua Adiki, tu ivue ue kioso ki zuela muene.

⁶ Kia zubha Husai kubhiẋila kua Abisalone, Abisalone u mu zuelesa, uixi: Ahitofele kia zuelʼiki. O kuila tu bhanga kala kia tu bhana muene o phangu? Ki uila kana, zuela-phe eie.

⁷ Husai anga u ambela Abisalone, uixi: Phangu ia bhana Ahitofele kithangana kiki ki ia uabha.

⁸ Husai anga u ta-ku, uixi: Tatʼenu ua mu ijiia kuma muene ni makuenze mê ene oso mazonda, o kialʼiki-phe a thathamana, mukuâ ni mama ia kitôto mu mukáu a mu nhana o tuana tuê; tatʼenu diiala dia ita, ka xikina kutula mu kuzeka kumoxi ni mundu.

⁹ Kialʼokio hinu ua suama kiá mu dibanda, mba bhu kididi kioso-kioso nʼende ni kuzongola; mu kuila-phe ku athuʼé ala ku ku kaiela kia-nda kujibhaku amoxi-mu, uoso u kʼivua uila, uixi: Akua Abisalone a a tolola, mbata abhiku, a a jibha.

¹⁰ Bhenhobho-phe, ni iú uasuina, uala ni muẋima uê mukuâ ni muẋima ua hoji, u botomoka-phe kiá muene kuma akua Izalaiele oso a kʼijiia kuila tatʼenu dizonda, ni athu oso aia-nê kumoxi, mala a nguzu ku ita.

¹¹ Eme-phe ngi bhana phangu kuma a diange kubhongolola hanji akua Izalaiele oso bhu kinama kié, tunde ku Dane katé ku Beleseba, kifuxi mu kuvula ki kale mukuá ni kisekele bhu mdúndu ia kalunga; o ki aia ku ita eie muene uia-nâ muʼaxaxe kâ.

¹² Kienhiki-phe tu mu tukumuisa bhu kididi kioso bhuala, tu mu tula kala dimume ki di sonoka bhoxi ku mavu; ni muene-phe kiá ni athu oso aia-nê, ki tu xi-bhu muthu ni muenhu.

¹³ O ki kala-phe ua di kondela kiá mu mbonge ioso-ioso, Izalaiele ioso a kʼèza ni mikolo, anga mbonge ioio tu i kuka katé mu honga, né ditadi ngó dimoxi diòfele ki dia kà xala-bhu!

¹⁴ Abisalone ni mala oso a Izalaiele, exi: Ua mono? Phangu ia Husai mukua Adiki kota, phangu ia Ahitofele ndenge. Kuma Jihova muene ua ki lekela phala kutudisa o phangu iambote ia Ahitofele, mbé Jihova a bheke divuua ku thandu dia Abisalone.

¹⁵ Husai anga u ambela Zadoke ni Abiiatale jinganga, uixi: Kiki ni kiki kiene kia longesa Ahitofele kua Abisalone ni adiakimi oso a Izalaiele; kiki ni kiki-phe ki nga a longesa eme.

¹⁶ Kikiphe tumenu lusolo kutangela Davidi, kuila: Kana kutula usuku iú ua lelu ku sámbua kunu bhu tabhu dia iphenza ia kikangalakata; kota u zaúka muene lusolo ku sámbua diodio sé kufula, kuma ki u fula ku ki bhanga, sumba muenexi u buika ni mundu uoso aia-nê kumoxi.

¹⁷ Kienhokio Jonata ni Ahimaaze, a xikama bhu mbandu ia Fixi ia Eni-Rokele; anga bhu kala kahatu kaia ku a tangela, ene anga aia kutangela Davidi; ndunge ia kuila ka a mone mu luua kia bokona mu mbonge.

¹⁸ Suke kiene, maji bhu kala-phe kaiala ka a mono, anga u ki tangela Abisalone; ene-phe kiiadi kià anga a katuka lusolo, a bhixila bhu bhata dia muthu mu Bahudimi, hé a bokona mʼonzo iê; o muenhú u kala ni kixima mu kithâdi kiê, o ene anga a tuluka momo.

¹⁹ Muhatu ua mukua bhata anga u futa-ku thanga, ku dikanu dia kixima, hé u aneka-ku masa òsokole; mu kienhiki, ki bhuala ua tena ku kʼijiia kuila muala athu.

²⁰ Makuenze a Abisalone anga a tula kua muhatu bhu bhatʼabha, exi: O Jonata ni Ahimaaze, iá kuebhi? Muhatu uixi: A zaúka kiá kahonga ka menha. Kia zubha-phe ku a sota ni ku a lembua, a vutuka mu Jeluzaleme.

²¹ Anga ki bhita-phe kuila, kia zubha makuenze a Abisalone kutunda-bhu, kiiadiʼokio a zaúka mu kixima, hé aia mu tangela muenexi Davidi; anga ambela Davidi, exi: Balumukenu mu zaúke ku sámbua dia menha; kuma kiene kia longesa Ahitofelʼiki, phala ku mi bhanga kiaiibha.

²² Bhenhobho Davidi u balumuka, ni mundu uoso alanê kumoxi, anga a zaúka ku sámbua dia Njolodá; o ki kuáki né ngó muthu umoxi ka xala ku sémbua kunu ua kambe kuzauka Njolodá.

²³ Ahitofele-phe kia zubha kumona kuma o phangu iê ka i kaiela, u zuika o bûlu iê dikombola, uia ku bhata diê ku mbonge iê kua tungu, u ta imbamba iê ioso mu ididi ia tokala, anga u di nhenga; hé u fua anga a mu fûnda mu mbila ia tatʼâ.

Ima ku sámbua dia Njolodá

²⁴ Davidi anga u bhixila bhu Mahanaíme. Abisalone anga u zaúka Njolodá ni muene niu mala oso a Izalaiele kumoxi.

²⁵ Abisalone anga u tumbika Amasa kutumina o kilômbo bhu kididi kia Jouabe. Amasa-phe monʼa-diiala u kala ni tatʼâ dijina diê Itra, mukua Izalaiele, u bokona kua Abingaíle monʼa Nahaxi, anʼa kamama ni Zeluia, monʼa Jouabe.

²⁶ Izalaiele ni Abisalone anga a ta kibangu kiâ moxi ia Ngileiade.

²⁷ Kia zubha-phe Davidi kutula bhu Mahanaíme, Sobi, monʼa Nahaxi, ku Labá ia anʼa Amone, ni Makidi, monʼa Amiiele, mu Lodebala, ni Badizilai mukua Ngileiade, ku Lokelimi,

²⁸ eza ni jiháma ni malonga a menhʼa pholo, ni jímbia, ja mavu, ni tiliku ni sevada, ni fadinha, ni masa òkange, ni fava, ni fejá, ni jimbundu jamukua jòkange,

²⁹ ni uiki, ni matheka, ni jimbudi, ni heju ia lete ia ngombe, hé a i bhekela Davidi ni mundu uoso aia-nê phala kúdia, mbata exi: Mundu iú ala ni nzala ni dibhuilu, ni dinhota mu iangu ngó mu ala mumu.