II Samuuele 16 - O Mikanda Ikola

Davidi a mu nganala kuala Ziba

¹ Davidi kia zubha kusondoloka bhu thâla ia mulundu, uandeka kiá kuboloka kuema diê, u takana-ku ni Ziba mukua mbèle ia Mefi-bozete, ueza ni bûlu jiiadi jʼòzuike makombola o ku makunda-mâ ua longo-ko hâma jiiadi ja makende a jimbolo, hâma ia isaka ia ji-uva jakukuta, hâma ia ibundu ia kixibhu, ni kisudi kimoxi kia vinhu.

² Muenexi anga u ambela Ziba, uixi: Ni ima iii i ueza na-iu uambe kiebhi? Kuala Ziba: Jibûlu phala athu mu dibhata dia muenexi kuia ni kumondala; o jimbolo ni ibundu ia kixibhu phala makuenze kúdia; o vinhu phala oso a sota kusèndukila mu ditutu a nue.

³ Muenexi, uixi: O monʼa muadi é, iú kuebhi? Ziba anga u ambela muenexi, uixi: Muene ua xala mu Jeluzaleme; mukonda uambe, uixi: Lelu muene, dibhata dia Izalaiele a-nda ku ngi bhana kiá dingi o ungana ua tatʼetu.

⁴ Muenexi anga u ambela Ziba, uixi: Talesa, iene ioso ia tokala kua Mefibozete, i kale kiá ié. Ziba uixi: Kùku, nga mbolomoka; ngi sange ngó ngalasa ku pholo ié, eie sobha, ngana iami!

Sobha Davidi a mu xinga jindaka kuala Simei

⁵ Davidi-phe kia bhixila bhu Bahudimi, bhu tunda muthu bhu bhata bhenhobho, mukua família ia Saúlo, dijina diê Simei, monʼa Jela; anga u tunda, kioso-phe kiala kutunda bhu bhata iú uiza ni kuxinga jindaka.

⁶ Anga u kuata kutakula matadi kua sobha Davidi, matadi u a takula ue akua mbèle ioso ia muenexi Davidi; sumbala mundu uoso ni mala a mazonda a kala ku mbandu ia kúdia ni ku mbandu ia kiasu ia sobha Davidi.

⁷ Mu kuxinga kuê, Simei uixi kiki: Tunda, tunda, u kiiala kia manhinga! U kiiala kiasekala, mukua Kadiaphemba!

⁸ Jihova ua ku bhekela dingi ku thandu dié o futu ia manhinga moso ma dibhata dia Saúlo, ua mu bhingana ku ungana; Jihova iú ua bhakula ue o ungana ué bhu lukuaku lua Abisalone dia monʼè. U diuana-phe! Kindala eie ue divuua dia ku tula, mukonda u kiiala kia manhinga!

⁹ Bhenhobho Abisai, monʼa Zeluia, u ambela Sobha, uixi: Phalahi ímbua ia di fuila iii i kala mu ku ku xinga jindaka, u muenexi? Ngi bhane disesa, nga ku diondo, ngʼabhuke ni ngi mu batule o mútue.

¹⁰ Sobha-phe, uixi: Eie kia ku kuatela ni kima kiahi, eie u monʼa Zeluia? Muehienu a xinge, kala kia mu ambela Jihova muene kuila: Xinga Davidi. Abha-phe se kiene, nanhi dingi u tena ku mu ila: Phalahi eie uala mu bhanga kiki?

¹¹ Davidi anga u ambela dingi Abisai, ni akua mbèle iê oso, uixi: Talenu: Sumbala monʼami ua ngi tundu moxi, ku miongo iami, ua bhindamena ku ngi bua o muenhu uami, kuambe-phe dingi mukua Bejamí iú, lelu u fula kiebhi ku ki bhanga? Mu ehienu, a xinge, kuma Jihova muene ua mu tumu.

¹² Imoxi Jihova u suua o kutata kuami ni kulebhuka kuami, hé u ngi bhanga mbote mukonda dia jindaka jê ja ngi xingi kizuua kia lelu.

¹³ Kienhiki Davidi ni makuenze mê hé a kala mu bhita mu ikoka; o Simei-phe uai ni ku kunga mu mulundu ua lulama ni ene ala mu ikoka, iú uenda iú xinga, u mu takula matadi, u takula mavu.

¹⁴ Muenexi ni mundu uoso uala kuila-nê kumoxi, anga eza ni kubhuila katé bhu kibangu, a nhohena bhobho.

Husai uamba uixi nga tokala Abisalone

¹⁵ Abisalone-phe, ni mundu uoso, ni mala ma Izalaiele, anga a bhixila mu Jeluzaleme, ni Ahitofele uejila-nê kumoxi.

¹⁶ Anga ki bhita kuila, kia zubha kutula Husai, mukua Adiki, kamba dia Davidi, uiza kua Abisalone, Husai anga u ambela Abisalone, uixi: Sobha, tana-ku, kùku, tana-ku!

¹⁷ Abisalone anga u ambela Husai, uixi: Iii iene o henda i uedikiza kamba dié Davidi? Kamba die, kuela-hi-nê kumoxi?

¹⁸ Husai anga u ambela Abisalone, uixi: Kana, ki kiene; uoso-phe a mu solo kuala Jihova, ni mundu iú, ni mala oso a Izalaiele a mu solo, muene ngi mu tokala, muene ngi xala-nê.

¹⁹ Luamukuâ dingi, nanhi ngi mu xibhidila? Manhi, na velu ki ngi mu xibhidila kié? Kioso ki nga xibhidila jinga bhu pholo ia tatʼenu, kiene ue ki ngi xibhidila bhu pholo ié eie u mona.

Abisalone ni akama a Davidi

²⁰ Abisalone bhenhobho anga u ambela Ahitofele, uixi: Tu bhane phangu ioso i tua fuama kubhanga.

²¹ Ahitofele anga u ambela Abisalone, uixi: Bokona kua akama a tatʼenu, a a xila o kutambula o konda ia dibhata; Izalaiele kioso-phe kia-nda ku kʼivua kuma ua di zembesa kua tatʼenu, ene oso-phe a ku bande, makuʼâ a kola kiá.

²² Abisalone anga a mu olekela balaka ku thandu diaʼnzo; Abisalone anga uia, hé u bokona kua akama a tatʼâ, ku mesu a akua Izalaiele oso.

²³ O phangu ia Ahitofele-phe, ia kexe mu bhana mu izuuʼoio, i kala mukuâ ni kuila ia muthu ua zambuila kua Nzambi, o Nzambi iu ua mu vutuila; kiene muenʼiki kia kexi o jiphangu joso ja Ahitofele, kutale kua Davidi uixi kiala kua Abisalone.