II Samuuele 15 - O Mikanda Ikola

Abisalone u bhomba mundu, hé u kitukila tatʼâ. Davidi u lenga mu mbanza

¹ Kia zubha kubhita imʼiii, Abisalone u di iudikila dikalu ni jikabalu, ni makuinhi atanu a muthu akala mu ku mu tuamenena ku pholo.

² Abisalone anga u kala mu di meneka, u imana bhu mbanduʼa njila bhu muelu ua kimbaka. Bhenhobho-phe kʼiza muthu uoso-uoso ni dimanda dia kufundila bhu pholo ia muenexi, Abisalone u mu ixana, uixi: U mukua bhata kuebhi? Muene uila, uixi: Ngi mubhiukʼé, nga tokala bhu nganji mu miji ia Izalaiele.

³ Abisalone anga u mu ambela, uixi: Talesa, makʼé auabha, a iuka muene, maji ki bhuala muthu a mu tumu kuala muenexi phala ku ku ivua.

⁴ Abisalone anga u zuela dingi, uixi: Uaué! Tamano eme a ngi bhene kijingo kia kufundisa o madimanda mʼoxiʼumu, ngeji kuila uoso uala ni dimanda hé uiza kokuami, eme ngi mu batuila muene mu uiukilu uê.

⁵ U kala mù kuila ue se ua mu zukama mu ku mu diundila, muene u sunununa lukuaku luê hé u mu kuata, anga u mu bhubhala hé mu nzobojola ni jibeju ku matama.

⁶ Kiene kia kexe mu bhanga Abisalone kua akua Izalaiele oso eza kufúnda kua muenexi. O mu kubhanga kiki, Abisalone u kala mu nhana mixima ioso ia akua Izalaiele.

⁷ Kia bhiti mivu iuana, Abisalone u ambela muenexi, uixi: Nga ku diondo, ngi bhane disesa ngiie ku Hebolone ngi kumbidile kizuelu kiami ki nga bhana kua Jihova.

⁸ Kuma, eme ngi mubhikʼé, nga bhele kizuelu, kioso ki ngala hanji mu Ngesule ku Sídia, ngixi: Se Jihova u ngi bheka dingi muene mu Jeluzaleme, eme-phe ngi bheza jinga Jihova.

⁹ Muenexi anga u mu ambela, uixi: Ndeie ni paze. Muene anga u balumuka anga uia ku Hebolone.

¹⁰ Abisalone-phe u tuma jiphunga mu miiji ioso ia Izalaiele, uixi: Se mu ivua koloneta ia xiki, mua kèla kuma Abisalone ua hingi ungana mu Hebolone.

¹¹ Mu Jeluzaleme anga mu kala hâma jiiadi ja muthu ela kumoxi ni Abisalone ku Hebolone, a exana ene iá etaia, hè aia-nê sé kuijiia kima.

¹² Abisalone anga u tuma Ahitofele mukua Ngilo, ua tokala mu makota ma jitata ku kifuandu kia Davidi; u mu tuma ku bhata diê ku Ngilo, kioso muene kiala mu bhana jisata. O kikutu kia ufe anga ki-ia ni ku kala kikutu kia nguzu; o mundu anga enda ni ku di bandekeza jinga kua Abisalone.

¹³ Anga kuiza phunga kua Davidi, uixi: Mixima ia akua Izalaiele ia lunguluka ni kukaiela Abisalone.

¹⁴ Davidi anga u ambela akua mbèle iê ni ene oso aia-nê kumoxi mu Jeluzaleme, uixi: Ndokuenu, tu lengienu! Mukonda se tu kamba ku ki bhanga, ki bhuala u bhuluka kua Abisalone. Endelenu-ku! Sulukenu, imoxi uiza kindala, mbanza ioso hé u i beta ku mazu a xibhata.

¹⁵ Akua mbèle ia muenexi anga a mu ambela, exi: Etʼú, tu abhikʼé, tuala polondo phala kubhanga kioso ki tuma muadiʼetu, muenexi.

¹⁶ Muenexi anga u tunda, ni dibhata diê dioso di mu kaiela. Muenexi anga u xia ngó ahatu, kuinhi dia muthu, akama, mu langa inzo iê.

¹⁷ Muenexi anga u tunda, ni mundu uoso ua mu kaiela; anga a tula hanji bhua suku o jinzo, emana.

¹⁸ Makuenze mê anga a mu somboka bhenhobho anga a tuamenena; ni Makeleti oso ni Mapelete oso, ni Mangate oso, hâma jisamanu ja muthu a tundile-nê ku Ngate, a somboka bhu pholo ia muenexi anga a mu tuamenena.

O kuuabha muẋima kua hai

¹⁹ Muenexi anga u ambela Itai mukua Ngate, uixi: Eie u di nhengenahi ni etu? Vutuka, u xale ni uoso u kala muenexi; kuma eie u mukuaʼxi iengi, ko kuenu ue a ku balakala; kota u vutuke phala u xikame bhu kididi kié.

²⁰ Kuma eie mazá ueza, kifua lelu ki tokala ngi ku bheka dingi mu bungana ni etu, eme mueneʼami ku nga mu kuila manhí? Vutuka eie muene, ni jiphange jé vutuka-nâ kumoxi; ni kiadi-phe ni kidi ki kale bhuoso bhu uala.

²¹ Itai anga u vutuila muenexi, uixi: Nga loka kala Jihova ki ala ku muenhu, eie ue muenexi kala ku muenhu, kùku, ngana iami! Kioso kididi ki u kala eie, kùku, ngana iami, kixi ki kala kia kufuila, kixi ki kala kia kulaiela, kiene ue kididi ki ngi kala eme ngi mubhikʼé.

²² Davidi anga u ambela Uai, uixi: Ndoko kiá, somboka! Tuamena ku sámbua. Uai, mukua Ngate, anga u somboka ni makuenze mê, ni anʼandenge oso aia-nê.

²³ Oxi ioso anga a kala mu dila jingololo, mundu anga a kala mu zaúka katé ku sámbua; muenexi muene anga u zaúka ue o kahonga ka Kidolone, mundu uoso anga a zubha kuzaúka, a di tela njila ia ditutu, mu kuia ku kikangalakata.

Ni Zadoke, ni Abiiatale, ni Husai a vutukila ku Jeluzaleme

²⁴ Talesa-phe, Abiiatale anga u banda ue ku thala, Zadoke ue uiza, ni jilevita joso kumoxi, a kexe mu kuambata álaka ia kikutu kia Nzambi; anga a tula álaka ia Nzambi bhenhobho katé mundu uoso azubha kutunda mu mbanza.

²⁵ Muenexi anga u ambela Zadoke, uixi: Ambata álaka ia Nzambi, u i bheke dingi mu mbanza; kuma eme se ngi sanga ngalasa ku mesu ma Jihova, muene hinu u ngi bheka dingi kuku mu ku i mona mesu, ni álaka iene ni dibhata diê didi bhua tungu.

²⁶ Maji Nzambi phe kia kèla kuma eie ku ngi uabhela dingi, kuabhu tata, eme-ami-iú, a ngi bhange kioso kia mono kia mu uabhela muene.

²⁷ Muenexi u ambela ue dingi nganga Zadoke, uixi: Eie manhi, kʼemuene u mukua lumono lua kumona? Vutuka ku mbanza ni paze, ni anʼenu aiadi enu-nâ, Ahimaaze monʼê, ni Jonata monʼa Abiiatale.

²⁸ Talesa, eme nga kà tula hanhi hé ngi suama mu nganga bhu tabhu dia njila ia kikangalakata nga kà kinga njimbu i tunda kokuenu, i ngʼijidisa kioso kiala kuenda o ima.

²⁹ Zadoke bhenhobho, ni Abiiatale a bheka dingi álaka ia Nzambi mu Jeluzaleme anga a xikama muenhomo.

³⁰ Davidi anga u kala mu banda ku disámbua diodio dia honga ia Kidolone mu mbanjidilu ia mulundu ua Midiva; kioso kiala mu banda uala kuenda ni kudila, ua di futu mútue, uala kuenda ni inama ia hatu bhoxi; mundu uoso ala kuendela-nê kumoxi anga a di futa uâ mítue, ala mu kuila ia a banda ia enda ni kudila.

³¹ Anga bhu kala muthu u jimbuila Davidi, uixi: Ahitofele ua di te ue mu kikutu ni Abisalone. Davidi anga u zuela, uixi: Eie u Jihova, Nzambi iami nga ku diondo, kitukisa jiphangu ja Ahitofele, ji kale uoua.

³² Anga ki bhita kuila, mu kubanda-phe, Davidi u bhixila ku thâla ia mulundu bhu kididi bhene kubhezela Nzambi, anga u takana-bhu ni Husai mukua Adiki, uala mu kuiza ku mu batuila, kizuatu kiê ua ki tandujula, ua te mavu mu mútue.

³³ Davidi anga u mu ambela, uixi: Eie se tu ila kumoxi ku ngala kuila emeʼuku, ua-nda ku ngi nemena.

³⁴ O ki u vutuka-phe mu mbanza, ni kuila kua Abisalone, uixi: Eme ngi kala ngi selevende ié u muenexi, kala ki nga kexile ngi selevende ia tatʼenu mʼokulu; ua-ndu ngi kuatekesa-phe mu kunumununa o jiphangu joso ja Ahitofele.

³⁵ Kuejiia kuma o jinganga Zadoke ni Abiiatale eie uala-nâ kumoxi? Mu-ia ni kuila-phe, kioso eie ki uívua mʼonzo ia muenexi, u ki tangela Zadoke ni Abiiatale, o jinganga.

³⁶ Ene-ze ala ni anʼâ aiadi, Ahimaaze monʼa Zadoke, ni Jonata monʼa Abiiatale; enhó ene-phe a kala athu a ku a tuma mu ku ngʼijidisa eme ioso i mu ivua.

³⁷ Kienhiki Husai, kamba dia Davidi, u vutuka hé u bhixila mu mbanza; mu kithangana kiene kimoxi ni Abisalone ue u bhixila mu Jeluzaleme.