II Samuuele 14 - O Mikanda Ikola

Abisalone a mu takana, uiza dingi ku bhata

¹ Kiki-phe Jouabe, monʼa Zeluia, u mona kuma muẋima ua muenexi ua mu kala kiá kua Abisalone.

² Jouabe anga u tuma ku Tekoua, u takana-ku muhatu mukua kilunji, anga u mu ambela, uixi: Nga ku diondo, u di bhangesa kala muthu ku muẋima kua mu bolo, uala mu dila dikokolo; u di ta izuatu ia luto, kana ku di uesa maji, u kala muene kala muthu ua bhange thembu iavulu ku luto mu dila difundu.

³ Phala u bokone kua muenexi, u mu zuelese kala kiki: Jouabe anga u mu longesa maka moso ma kà zuela.

⁴ O muhatu mukua Tekoua kieza kuzuela ni muenexi, u diunda, u bheza, uixi: Sobha, tatuʼodio!

⁵ Muenexi u mu ambela, uixi: Ihi kia ku kuata? Muene u vutula, uixi: Kidi muene ngi mutudi, munumeʼami uafu.

⁶ Ngi kahatu ké-phe, nga xedi ni anʼaiadi a mala, anga a dikuata mvunda ene ubheka uâ mu mukáu, ki bhuala u a muangununa, iú-phe u ta kituezu kua mukuâ, hé u mu jibha.

⁷ O ki tualʼiki família ioso ia ngi lungulukila eme, exi: Tu thelekale uoso ua te o kituezu kua phangʼiê, etu ue tu mu jibhe mukonda dia muenhu ua phangʼiê ua bûba, phala muene ue tu mu fudise o kukala kabhingano. Kala kiki, andala dikala diami dia túbhia dia xala-ku, a ngi jimina-diu, ni eme ni munumeʼami hé tua kà xala sé dijina sé mbutu mu ngongo.

⁸ Muenexi anga u ambela muhatu, uixi: Ndeie ku bhata dienu, eme ngi bhane ngonge ioso ia tokala ku mbandu ié.

⁹ Muhatu-phe mukua Tekoua u ambela muenexi, uixi: Kùku, ngana iami, mulonga u kale kuthandu diami, ni ku thandu dia dibhata dia tatʼetu; kua muenexi ni kiandu kié, ki ku kale kima.

¹⁰ Muenexi uixi: Uoso dingi u ku kumuna, muenhó uiza-nê kunu, kokuami, ki mungu dingi a tena ku ku kumbudisa.

¹¹ Muhatu ua te-ku dingi; uixi: Kùku, nga ku diondo, xinganeka Jihova Nzambi ié, phala muzôkedi-a-manhinga ka buidise dingi mienhu iamukuá, sumba a buidisa ni monʼami. Muenexi uixi: Nga loka muene kala Jihova ki ala ku muenhu, kuila monʼé ni lundemba luê ngó lumoxi ki lu láuka bhoxi.

¹² Muhatu anga u zuela dingi, uixi: Kùku, ngi bhane disesa, ngi te-ku dingi tumaka, ngi kahatu ké. Muene uixi: Ndoko, zuela.

¹³ Muhatu uixi: Mukonda diahi-phe eie ua mu xinganeka kiengi ku mundu uangene ua Nzambi? kuma, kùku, kizuelu ki ua bhanʼiki, uedi kala ua di belesa eie-muène, mukonda eie u muenexi ua kambe kubhongolola ku bhata muthu ué ua mu balakala.

¹⁴ Kuma etu oso tua bhingi kúfua, tua di fuangana ni menha kia ẋamuka bhoxi ka xikina dingi ku a omona. Nzambi ue kene kuandala muenhu u di bota; maji u sunga ilunji, phala muthu uê ua mu balakala kendelele.

¹⁵ Kiki-phe, kùku, kuiza kuzuela kokué u muenexi, nga ki bhangela mukonda dia mundu a ngi kuatesa uoma. Ngixi-phe ngi zuela kua muenexi, sumba muenexi u kumbidila kioso ki mu bhinga mubhikʼê.

¹⁶ Kuma muenexi uívua, hé u kudila mubhikʼê bhu lukuaku lua muthu ua mesena ku ngi buidisa ni monʼami kumoxi, phala ni tu bhue ku mesu mu undundu ua Nzambi.

¹⁷ Bhenhobho, kùku, ngi kahatu ké, ngixi dingi: Kizuelu kia muenexi ki kale kia kutululuka; kuma ki ualʼokio, kùku, ua di bhange mukuâ ni anjo ia Nzambi mu kutongolola kiauabha ni kiaiibha. O Jihova Nzambi ié a ku kuatekese.

¹⁸ Bhenhobho muenexi u kumbulula muhatu, uixi: Kana ku ngi dingila-kiu, nga ku diondo, kioso ki ngi ku ibhula. Muhatu anga uixi: Kùku, ngana iami, a zuele kiá.

¹⁹ Muenexi uixi: Maka osoʼá, ua di endela eie muene, inga lukuaku lua Jouabe lu momo? Muhatu anga u vutula, uixi: Kùku, nga loka kala ki uala eie ku muenhu ué moxi, u ngana iami kuma i ua zuela kana muthu u tena kuabhuka, né ku kúdia né ku kiasu mu muxinda ua kizuelu kié! Mbata mubhikʼé Jouabe muene-muene ua ngi tumu, muene ua ngi longesa o makʼama mu nga ku tela, eme ngi kahatu ké.

²⁰ Kifua ue, muene mubhikʼé Jouabe ua ki bhangela o mulonga ku u bheka mu uiukilu uê; eie-phe, ngana iami, uejiia kiavulu, kala kuijiia kua anjo ia Nzambi, kua kuijiia ni kutongolola o ima ioso mu ngongo.

²¹ Muenexi anga u ambela Jouabe, uixi: Talesa, nga kuivu kioso ki ua ngi bhingi. Ndéie-phe, munzangala Abisalone u mu takane, eze dingi ku bhata.

²² Jouabe bhenhobho anga u bhetamena pholo bhoxi hé u diunda, u sakidila muenexi. Anga Jouabe u zuela, uixi: Lelu, ngi mubhikʼé, ngejiia kuma nga sange ngalasa mu mesu mé, kùku, ngana iami, kuma eie u muenexi ua kumbidila kioso ki nga ku bhingi, eme mubhikʼé.

²³ Jouabe anga u balumuka-bhu, uia ku Ngesule, u takana-ku Abisalone, hé u mu bheka mu Jeluzaleme.

²⁴ Muenexi-phe uixi: A vutukile mʼonzo iê, maji ka ngi mone o pholo. Kienhiki Abisalone anga u suka ngó mʼonzo iê muene, bhu pholo ia muenexi ka bhiẋila-bhu.

O kuuabha kua Abisalone

²⁵ Mu Izalaiele ioso-phe, ki bhuala muthu a mu ximana o kuiuka kua kuuabha o mukutu ni pholo kala Abisalone; ubhinga athu oso kia mu tala, ela kala adiuana! Tunde bhu dikanda diê dia kinama, katé bhu thala ia mútue, ka moneka ngó kisemu.

²⁶ O kia bhuta o kindemba ku mútue uê, (kuma uene kubhuta bhu batukila o muvu, mukonda kindemba ki mu nemena, kiene kia ki bhutila,) kindemba kiê ki pezala hâma jiiadi ja xikulu, mu pezo ia muenexi.

²⁷ Abisalone anga a mu vualela anʼatatu a mala, ni mona umoxi ua muhatu, dijina diê Tamala, anga u kala muhatu ua uabha ue kinéne o pholo.

Abisalone a mu bhiẋidisa kiua kua sobha Davidi

²⁸ Abisalone anga u tunga mivu iiadi mu Jeluzaleme, o pholo ia muenexi kala ku i mona.

²⁹ O ki iabhu, Abisalone u tuma kuixana Jouabe, phala a mu tume kua muenexi; muene-phe nguaʼiê kuiza-ku. Anga u mu tuma dingi lua kaiadi, muene nguaʼiê-phe kuiza.

³⁰ Mukonda dia kiki, Abisalone u ambela akua mbèle ié, uixi: Talesenu, díbhia dia Jouabe dia zukama ni diami, muala ni sevada; ndenu, ka i tienu mu túbhia. Akua mbèle ia Abisalone anga a ta díbhia mu túbhia. Akua mbêle ia Jouabe, ni izuatu iatandujuka, aia kua Jouabe, ngana iâ, anga a mu tangela, exi: Akua mbèle ia Abisalone díbhia dié a di te mu túbhia.

³¹ Jouabe anga u balumuka, uia kua Abisalone mʼonzo iê, u mu ambela, uixi: Phala-hi akua mbèle ié a ngi tela díbhia mu túbhia?

³² Abisalone anga u vutuila Jouabe, uixi: Ku mono, nga ku tumine luiadi, ngixi: Izá kunu, ngi ku tume kua muenexi kuibhula mba nga tundila-hi ngó ku Ngesule? Mukonda ujitu uê kota, se nga xedi hanji kuenhoko. Kiki-phe a ngi bhane disesa dia kumona pholo ia muenexi; o ki kala-phe ua mono ngala ni kituxi, a ngi jibhe.

³³ Kienhiki Jouabe u bhixila kua muenexi, anga u mu tangela-kiu. O sobha anga u tuma Abisalone, o muene anga u bhixila ue kua muenexi, u diunda bhu pholo ia muenexi. O muenexi anga u bhana jibeju kua Abisalone.