II Samuuele 13 - O Mikanda Ikola

Aminone u bhanga kisunji ni phangʼiê Tamala

¹ Kia zubha kubhita kiki, Abisalone monʼa Davidi u kala ni phangʼiê ia muhatu ua uabha, dijina diê Tamala; Aminone monʼa Davidi anga u mu uabhela kiavulu.

² Aminone anga u tata, mukonda dia hânji ia phangʼiê Tamala; katé kia mu bhekela kukata, kuma Tamala kilumba hanji; Aminone iu ua ki mono kuila kiabhonzo ku mu bhanga kima kioso-kioso.

³ Aminone-phe hé u kala ni kamba diê, dijina diê Jonadabe, monʼa Siméia phangʼiâ Davidi; Jonadabe muenhú muthu uadimuka.

⁴ Anga u ambela Aminone, uixi: Abha-phe, eie u monʼa muenexi, ua mu bhelela-hi kiki izuua ioso? Ku ngi tangela-kiu kioso ki uala na-kiu? Aminone u mu tangela, uixi: Mukonda Tamala ndenge ia phangʼiami Abisalone, nga mu uabhela.

⁵ Jonadabe anga u mu ambela, uixi: Zeka bhu hama ié, u di bhangese kukata; o tatʼenu kia-nda kuiza ku ku kunda, u mu ambela kuila: Nga ku diondo, phangʼiami ia muhatu Tamala eze, a ngi bhangele kúdia ku mesu mami muene, ngi ki mone, ngi dile ku lukuaku luê.

⁶ Kienhiki Aminone u zeka, u di bhangesa kukata; o kieza muenexi ku mu kunda, Aminone u ambela muenexi, uixi: Nga ku diondo, tatʼetu, ambela phangʼiami ia muhatu Tamala eze, a ngi bhangele tumbolo tuiadi bhu mesu mami, ngi die ku lukuaku luê.

⁷ Bhenhobho Davidi u tuma ku bhata kua Tamala, uixi: Ndeie ku inzo ia phangʼié Aminone, u mu bhangele kúdia.

⁸ Tamala anga uia ku inzo ia phangʼiê Aminone, u mu sanga ua zeka. Anga u kuata fuba iólunge ni felemendu, u i masana ku mesu mé, hé u kanga jimbolo.

⁹ Anga u kuata o kienga, u mu lunduluila-ju bhu dilonga bhu pholo iê; muene-phe ka xikina kúdia. Aminone anga u zuela, uixi: Athu oso a a tubhule a ngi tundile bhu kanga. Ene oso anga a tunda, a mu xia ngó.

¹⁰ Aminone anga u ambela Tamala, uixi: Beka kúdia mu xilu, ngi die ku lukuaku lué. Tamala anga u kuata jimbolo ja kange, u ji bheka mu xilu kua Aminone phangʼiê.

¹¹ O kia zubha ku mu bhekela-ju bhua zukama phala a die, muene u mu kuata, hé u mu ambela, uixi: Izá tu zeke kumoxi, phangʼiami.

¹² Muene u mu vutuila, uixi: Kikôla, phangʼiami! Kana ku ngi bhanga kusuina! Kuma ka tokala kubhanga kala kiki mua Izalaiele; tula-kiu, kana kubhanga kisunji ki kala kiki!

¹³ Mukonda eme o jisonhi nga-nda ku di tela na-ju kuebhi? Eie-phe ue ua-nda ku di sokesa ni jihábhu ja malaji mua Izalaiele! Nga ku diondo-phe, zuela hanji kua muenexi; muene ka-nda kudituna ku ngi bhana ko kué.

¹⁴ Muene-phe ka xikina ku mu ívua dízui; mukonda-phe uala mu nguzu, u mu bhanga kusuina, u zeka-nê hé u mu katula undenge uê.

¹⁵ Kia zubha ku ki bhanga, Aminone u mu zemba kiá ni kizembu kiavulu kinéne; o kizembu kiala na-kiu kiala kiá kota, o henda ia mu kexile na-iu, iala ndenge. Aminone anga u mu ambela, uixi: Balumuka, tunda, uié.

¹⁶ Monʼa muhatu anga u mu ambela, uixi: Ki kiene phangʼiami, mukonda o phulu i u ngi bhanga ia ku ngi kaia i kala kota, o iamukuá i ua ngi bhange kiá i kala ndenge. Muene-phe ka xikina ku mu ívua.

¹⁷ Anga u ixana mukua mbèle iê, uala ku mu xibhidila, uixi: Muhatu iú mu tubhule bhu kanga, ku dibhitu u te-ku sabhi.

¹⁸ Monʼa muhatu-phe ua zuata kizuatu kialebha kiala ni maku a lebha kuma uene uzuatelu ua anʼa jisobha mu undenge, ala hanji mizeletete. Mukua mbèle-phe u mu tubhula bhu kanga, ku dibhitu hé u ta-ku sabhi.

¹⁹ Tamala anga u di ta utoka mu mútue, u tandujula kizuatu kiê kialebha maku, u ta maku mê mu mútue, hé u bhita mu luua ni kudila ni kudikola.

²⁰ Kota diê Abisalone anga u mu ambela, uixi: Manhi, ni kidi kiene, kota dié Aminone ua ku bhange ni kima? Kuabhu-phe, di xibhe kiá ndengʼiami; muene phangʼié. Ku didié dingi ngó kiavulu. Kienhiki Tamala u xala ni kikote kiê mʼonzo ia kota diê Abisalone.

²¹ O muenexi Davidi-phe ki evu ima ioso iii, u kala ni njinda iavulu. Maji ka mesenene ku bhanga kima kua Aminone, kuma ua mu zolele kiavulu, mukonda muene monʼê ua dianga.

²² Abisalone-phe ka kumuna ue kima kua Aminone, né kuâmba kizuelu kiauabha mba kiaiibha; kuma Abisolone uala kiá ni kizembu kia Aminone, mukonda ndengʼiê Tamala ua mu bhange ufusa mu kusuina.

Abisolone u jibha Aminone

²³ Anga ki bhita kuila, mivu iiadi ki ia tena, Abisalone u bhanga fesa ia kubhuta jimbudi jê bhu Baale-Hazole, bhua zukama mu Ifalaimi; Abisalone anga u tuma kuixana ana oso a muenexi a mala.

²⁴ Abisalone anga uia kua muenexi, uixi: Kùku, ngala ni akua kubhuta jimbudi, kùku ngi mubhikʼé nga ku diondo, uize-ku ue ni mbèle ié.

²⁵ Muenexi anga u ambela Abisalone, uixi: Kana, tata, monʼami; ki tuiiku etu oso, tua-nda ku ku nemena kiavulu. Muene-phe u mu jijidika; maji ngueʼiê ku ki bhanga, anga u mu bhana ngó dibesá.

²⁶ Abisalone anga u mu ambela, uixi: Se eie muene mgueʼié kuia-ku, kota diami Aminone eze tuienê. Muenexi-phe uixi: Muene ua mu indila-hi kuia-ku?

²⁷ Abisalone-phe u mu jijidika, anga u ehela Aminone, ni ana oso a muenexi a mala kuia-nâ. Abisalone anga u bhanga fesa iadikota kala fesa ia Sobha iene.

²⁸ Abisalone anga u tendelela makuenze mê, uixi: Alukenu kiambote, kioso ki mu mona muẋima ua Aminone ua mu sanguluka kiá ni vinhu, se muevu nga mi ambela kuila: Aminone mu tienu! Enu-phe mu mu jibha muene; ki mu kale ni uoma, kabasa eme muene nga ki tumu; kolenu maku, mu bhange undanda!

²⁹ Makuenze a Abisalone anga a bhanga Amonone kala kioso kia a tumu Abisalone, ngana iâ. Ana oso a muenexi anga a balumuka bhenhobho ni lusolo, kala muthu u di ta ku mula iê, u lenga.

³⁰ Kioso-phe ene ki ala hanji mu njila, bhu kala iú ua tula njimbu kua Davidi, uixi: Abisalone ua jibha ana oso a muenexi, ki bhuala ngó ua subhukaku.

³¹ Bhenhobho sobha Davidi u balumuka, hé u tandujula o izuatu iê, u di takula mu mavu; akua mbèle iê ene oso anga a mu imanena ue ni izuatu iâ ia tandujuka.

³² Maji Jonadabe-phe, monʼa Siméia, phangʼia Davidi, u zuela-mu, uixi: Kùku, ku fike a jibha minzangala ioso, anʼa muenexi; uafu ngó Aminone, kuabhu! Kuma Abisalone ua tumu kubhanga kienhiki, mbata ua mu kanena na-kiu tunde kizuua kia bhangele ufusa kua ndengʼiê Tamala.

³³ Kiki-phe, kùku, mu muẋima ku kale ni kikote kia kufika kuma ana oso a muenexi afu; mukonda uafu ngó Aminone, kuabhu. Akuâ oso iá-uâ ni muenhu.

Abisalone u lengela ku Talamai

³⁴ Muene Abisalone-phe u lenga. Dikuenze-phe diala ku kilangidilu, u zambula mesu, u tala mu kanga, u mona mundu uavulu uala mu kuijiia mu njila ia mulundu ku dima diê. Anga uia mu ku ki kundila muenexi, uixi: Nga mono athu a mu kuiza ni kukulumuka ku njila ia Holonaíme, mu mbanjidilu ia mulundu.

³⁵ Jonadabe anga u ambela muenexi, uixi: Ku mono, anʼa muenexize ki iá ezʼó! Kioso ki nga tange, ngi mubhikʼé, kiene o kidi.

³⁶ Uedi-phe u zubha ngó kuzuela, anʼa muenexi enda ni kutula, hé a suina mázui a ta kibulukutu ni kudila. Ni muenexi ue ni akua mbèle iê, a dila jingololo javulu.

³⁷ Abisalone-phe u lenga, uia kua Talamai, monʼa Amihudi, sobha ia Ngesule. Davidi anga u kala mu dila monʼê izuua ioso ioio.

³⁸ Kala kiki Abisalone u lenga, uia ku Ngesule, hé u bhanga mivu itatu kuenhoko.

³⁹ Ki ia zubha kubhita, muẋima ua Davidi anga uizala ni nguzu, u inda uia kutakana Abisalone, kuma ua kondoka kiá ku malamba a Aminone mukonda ió uafu kiá.