II Samuuele 12 - O Mikanda Ikola

Polofeta Natane a mu tuma kubazela Davidi

¹ Jihova phe anga u tuma Natane kua Davidi. Anga u bokona mʼonzo iê, u tula, hé u mu ambela, uixi: Sai malʼaiadi a tunga bhata dimoxi; o iú mvuama, o iú ngadiama.

² Mvuamʼiii u kala ni ilunga iê iavulu ia ibhaku ia jimbudi ni jingombe;

³ maji ngadiama-phe kala ni kima, kibhaku kiala-na-kiu kamona kamoxi ka mbudi ka mukaji, ua ka sumbu, iu ua ka sase; anga u kala na-ku, ka kudila kumoxi ni anʼê; ka dia ku kakudia koso ka dia muene, ka nua ku nganza ioso i muina muene, ka zeka bhu jihata jê, kifua ka di bhange kala kamona kê ka muthu.

⁴ Anga bhu kala musonhi u tula kua mvuama, muene anga u xia kilunga kiê-muène kukuatamu kibhaku, nʼa ki telekela o musonhi ua mu tula, hé u tuma-phe kutambula kambudi kamoxi ka kuata mukuâ, o ngadiama, kene ka telekela musonhi uê.

⁵ Davidi anga njinda i mu kuata kiavulu ia muthu muene a mu tangeʼó; anga u ambela Natane, uixi: Nga loka muene kua Jihova uene ni muenhu, kuma muthu ua tena kubhanga kiki, ua tokala kúfua!

⁶ O kambudi u ka futa luuana, mukonda dia kubhanga kala kiki, ni kukamba henda ia mukuâ.

⁷ Natane anga u ambela Davidi, uixi: Eie-muène u muthu ua bhange kiki! Kuala Jihova, Nzambi ia Izalaiele, uambe kiki, uixi: Eme-muène nga ku undu ku ungana ua Izalaiele, ememuène nga ku kudila bhu lukuaku lua Saúlo;

⁸ nga ku bhana o dibhata dia muadiʼé, ni akaji a muadiʼé eie-muène ua a kuata bhu maku mé, nga ku bhana ue dibhata dia Izalaiele ni Juda; o ki kala-phe iene ioso iii ia tolo, ngeji ku ku tela-ku dingi ioso ia tokala.

⁹ Kiki-phe, phala-hi u tènda kizuelu kia Jihova, mu kubhanga kima kia mu iibhila ku mesuʼê? Kuma Udiia, mukua Hiti, ua mu jibha ku xibhata, o mukajiʼê eie ua mu bhange mukajiʼé eie; o muene eie ua mu bhange ujibhanganga ku xibhata ia anʼa Amone.

¹⁰ O kiki-phe, xibhata mʼonzo ié ki i batuka-mu dingi, mukonda eme ua ngi tènde, mukaji a Udiia mukua Hiti ua mu tambula mu ku kala mukajiʼé.

¹¹ Kala kiki, Jihova uixi: Ngi ku balumuina ufe mu dibhata dié muene; ngi ku tambula akajiʼé ku mesu mé, anga ngʼa bhana mukuenu uengi, muene uà kà zeka-nâ mu muanha uatu.

¹² Kuma eie ua ki bhangela mu kusuama ni ku di vudimika, eme-phe ngi ki bhangela bhu pholo ia Izalaiele ioso, mu muanha uatu.

¹³ Davidi anga u ambela Natane, uixi: Nga te kituxi kua Jihova. Natane anga u ambela ue Davidi, uixi: Kidi, maji Jihova ua ku loloka kiá kituxi kié, kua-nda kufua, kana.

¹⁴ Suke kiene, maji mukonda-phe kima ki ua bhangʼiki, kia suinisa jinguma mu tanga kiaiibha kua Jihova, o mona ua mu vuala ua-nda kúfua muene, sé kufula,

¹⁵ Natane anga u tunda-bhu, uia ku bhata diê. Jihova anga u kuama mona, a mu vualela Davidi kuala mukajiʼa Udiia, mona anga u kata kiavulu.

Monʼa Bate-Seba úfua

¹⁶ Kienhiki Davidi u kala mu diondela o mona ni ku samba kua Nzambi; Davidi anga u fula kúdia, u kala muia mu xilu, ni kuzeka bhoxi usuku uoso, uzuata kidinhaji.

¹⁷ Adiakimi a dibhata anga a mu imanena, a sota ku mu balumuna bhoxi bhua zeka; maji muene-phe ngué kubalumuka, ni kúdia-nâ kumoxi ka xikina.

¹⁸ Edi a kala kienhiki katé mu sambuadi dia izuua, o mona uafu. Akua mbèle ia Davidi anga a kala ni uoma ua ku mu tangela kuila mona uafu; kuma ambe, exi: Sumbala kia kexile mona ku muenhu, tuila tu mu zuelesa, ka xikina ku tu ivua dízui, o ki tu mu tangela kuila mona uafu, ua-nda ku di bhanga kiebhi?

¹⁹ Davidi-phe kia mono akua mbèle iê ala mu di fuetela, u tongolola kuma mona uafu; Davidi anga u ibhula akua mbèle, uixi: Mona manhi uafu, kuambe? Exi: Xi, uafu, ngana!

²⁰ Behnhobho Davidi u balumuka bhoxi, u di sukula, u di uesa maji, u di ta izuatu iengi; anga u bokona mʼonzo ia Jihova, u samba; o kia zubha kubhanga kiki kiene kia bokona kiua mʼonzo iê muene, o kia bhingi, a mu tela kúdia, anga u dia.

²¹ Akua mbèle iê anga a mu ambela, exi: Ki ua bhangʼiki, uabhange kiebhi? Mona kia kexile ku muenhu, ua mu fudila kúdia, ua mu didi; mona-phe kia zubha kúfua, eie u balumuka bhoxi, hé uia mu kúdia?

²² Muene-phe uixi: Mona kia kexile ku muenhu, ngi fula kúdia, ngi dila, kuma ngambe, ngixi: Nanhi ua kʼijiia mba Jihova u ngi kuatela henda, phala mona a bhuluke?

²³ Kiki-phe uafu, ngi fudila-hi dingi kúdia? Né nga ki bhange, mona uiza dingi? Eme hádia nga kʼàia kuaii muene, maji muene keza dingi kunu ku ngalʼeme.

Solomá a mu vuala

²⁴ Davidi anga u konda malamba kua mukajiʼê Bete-seba, u bokona muoso muala, hé u zeka-nê; muene anga uimita hé u vuala mona ua diiala, u mu luka dijina dia Solomá. Jihova anga u mu zola.

²⁵ Jihova anga u tuma ku mu ijidisa-kiu kua polofeta Natane, polofeta anga u mu luka dijina dia Jedediia, mukonda dia jihenda ja Jihova.

Davidi u tambula o mbonge ia Laba

²⁶ Jouabe-phe anga u lua ni Laba, mbanza ia anʼa Amone, hé u tolola mbanza ia ungana uâ, o Mbonge ia menha.

²⁷ Jouabe anga u tuma jiphunga kua Davidi, uixi: Laba nga i lu; o mbonge ia menha nga i tolola.

²⁸ Kiki-phe eie bhongolola o mundu a xala ku bhata, uize, u te kibangu kunu, u zubhe kutolola mbanza iâ; ki ki kale eme ngi zubha kutolola mbanza, nʼa i luku o dijina diami.

²⁹ Davidi anga u bhongolola mundu uoso, uia ku Laba, u i lua, hé u i tolola.

³⁰ Anga u tambula o kitundu ku mútue ua sobha iâ; ki pezala talendu ia ulu, a sokejeka-ku matadi ma te kitadi kiavulu; anga a ki ta ku mútue ua Davidi. Anga mu mbongeʼ omo ambata-mu ima iavulu ia kubhunda.

³¹ Hé a kuata o mundu uoso ua xalamu, anga a u balakala; o kuaiiʼoko, iá a a te mu kuselala ni Sela ia felu, o iá ku pikeleta, o iá mu kukoka ni makuua a felu, o iá ku fólono ia kuiudika matijolo. Kienhiki Davidi kiene kia bhange ku jimbonge joso ja anʼa Amone. Kia zubha kubhanga kiki, Davidi ni mundu uê uoso ua masoladi a vutuka kiua mu Jeluzaleme.