II Samuuele 11 - O Mikanda Ikola

Davidi u ta phanda ni Bele-Seba, anga u jibhisa Udiia

¹ Anga ki bhita kuila, ki bhua bhiti o muvu, bhu thembu bhene kutunda o jisobha mu kúlua ita, Davidi u katula Jouabe ni makuenze mê kumoxi, ni Izalaiele ioso, anga a buidisa anʼa Amone, o mbânza ia Labá a i kondoloka, hé a a batuila momo. Davidi-phe ua xala mu Jeluzaleme.

² Kizuua kia mukuá, kutula ku kiemba, Davidi u balumuka bhu hama iê, anga u kala mu kuimajana ku thandu dia inzo iê ia mbanza; o ku thandu diaʼnzo kuala, u mona muhatu uala ku dʼiẋika; o muhatu ku mu tala mesu ua uabha kiavulu.

³ Davidi anga u tuma kuibhula muhatu muenʼiú. Exi-phe: Ki muene Bete-seba, monʼa Eliiamu, mukajiʼa Udiia mukua Hiti?

⁴ Davidi anga u tuma jiphunga, kuia ku mu ixana; muhatu anga uiza mʼonzo iê, muene u zeka-nê (kuma muhatu ua di zelesa ua tundu kiá mu ijila); kienhokio muhatu anga u vutuka kiua mʼonzo iê.

⁵ Muhatu anga u imita; hé u tuma kutangela Davidi, uixi: Ngala-ze ni divumu.

⁶ Davidi anga u tuma kua Jouabe, uixi: Udiia, mukua Hiti, ngi tumikisenê. Jouabe anga u tumikisa Udiia kua Davidi.

⁷ Kia zubha Udiia kutula, Davidi u mu ibhula mba Jouabe ua zekele kiebhi, o mundu uala kiebhi, ni ita mba ala ku i lua kiebhi.

⁸ Davidi anga u ambela Udiia, uixi: Kulumuka ku inzo ié, u di sukule inama. Udiia anga u tunda mʼonzo iá muenexi, anga ku mu kaiela kúdia kua ujitu kua tundu kua muenexi.

⁹ Udiia-phe anga u zeka bhu kanga dia inzo ia muenexi kumoxi ni makuenze a muadiʼê, ku inzo iê muene ka kulumuka-ku.

¹⁰ O kia ki tangela Davidi, kuila Udiia, ku inzo iê ka kulumuka-ku, Davidi u ambela Udiia, uixi: Manhi eie kua tundu mu kuenda njila? Kua kulumukina-hi-phe ku inzo ié?

¹¹ Udiia anga u ambela Davidi, uixi: O álaka, ni Izalaiele, ni Juda ala ngó mu jifundu; muadiʼami Jouabe, ni makuenze a muadiʼami, a te kibangu mu mukáu ua hatu; eme-phe phala-hi ngiia mʼonzo iami mu kúdia ni kúnua ni kuzeka ni mukajiʼami? Ki kôla, Ngana, eie muenexi, kikôla ni muenhu ué moxi! Eme kima kienhiki nga ditunu ku ki bhanga!

¹² Davidi anga u ambela Udiia, uixi: Nanga hanji lelu, mungu ngi ku sulule ngi ku ehele kuvutuka. Kienhiki Udiia u nanga mu Jeluzaleme kizuua kienʼokio, katé mu kizuua kia kaiadi.

¹³ O kienhokio Davidi anga u mu ixana, Udiia hé u dia, u nua bhu pholo iê, anga u mu kodiuisa; mu ngoloxi-phe uia bhu kanga u zeka bhu muanza uê kumoxi ni makuenze a muadiʼê, ku inzo iê-muène-phe nguê kukulumuka-ku.

O kúfua kua Udiia

¹⁴ Kúkia ni kimene-phe Davidi u soneka mukanda kua Jouabe, hé u mu tumikisa-u bhu lukuaku lua Udiia.

¹⁵ Mu mukanda anga u soneka kiki, uixi: Udiia mu tienu ku pholo kuoso kua temanana o ita, enu mu vutuke ni dima, mu mu ehele-kiu ubheka uê, phala a mu kuame, a fue.

¹⁶ Mu kukala-phe, Jouabe anga u langa o mbanza kiambote, u tongolola bhuoso bhuala o mala a nguzu, Udiia anga u mu ta ku pholo bhenhobho.

¹⁷ Akua mbânza anga a tunda mu bhânga ni Jouabe; ku mundu amoxi a dibhale, ku makuenze a Davidi; ni Udiia mukua Hiti uafu ue.

¹⁸ Edi ki bhita, Jouabe u tuma kukunda Davidi ima ioso ia tokala ku ita;

¹⁹ anga u tendelela phunga iê, uixi: Kioso ki ua kà zubha kukunda muenexi o ima ioso ia tokala ku ita,

²⁰ ki u mona muenexi njinda ia mu kuata, kia kèla: Mua zukamena-hi kiavulu ku mbanza mu kúlua? Enu ki mua kʼijiia kuila ala ku lumbu a mi asa?

²¹ Abimeleke, monʼa Jelubesete, nanhi ua mu jibha? Ki muhatu ku thandu dia lumbu ua mu lauila ditadi dia kuhuhila, iú ua fuila bhobho mu Tebeze? Enu mua zukamena-hi kiavulu ku lumbu? Eie-phe ua kèla: Ni dikuenze dié Udiia, mukua Hiti, uafu ue.

²² Phunga anga i katuka, uiza kua Davidi, u mu tudila hundu ioso ia mu katula na-iu Jouabe.

²³ Phunga anga u ambela Davidi, uixi: Mala kuenhoko a tundile ni kusuina, anga a tu sanga mu mukáu, etu-phe tua a kaie katé bhu muelu ua lumbu.

²⁴ Akua mifula-phe ku thandu dia lumbu hé a tu asa tu makuenze mé; amoxi ku makuenze a muenexi afu, kuinhi dia muthu ni nake, ni dikuenze dié Udiia, mukua Hiti, uafu ue.

²⁵ Davidi anga u ambela phunga, uixi: Jouabe ua kà mu kunda kiki, uixi: Kimʼiki ki ki ku iibhile kiavulu, kuma xibhata se i dia iú, i dia ue mukuâ; ita-phe i kolokote dingi ku mbandu joso ja mbanza, katé ki mu i sengulula; ua kà mu suinisa muene kienhiki.

Davidi u sakana ni Bete-seba

²⁶ Mukaji a Udiia-phe ki evu kuila Udiia munumiʼê uafu, u kala mu dila munumiʼê.

²⁷ O kia bhiti izuua ia kudila o thambi, Davidi u tuma ku mu takana, u mu bheka mʼonzo iê, anga u kala mukajiʼê, hé u mu vualela mona ua diiala. Kima kiki-phe, kia bhange Davidi, Jihova kia mu iibhila.