II Samuuele 10 - O Mikanda Ikola

O kùfua kua akua Amone ni akua Sídia

¹ Kia zubha kubhita ima iii, o sobha ia anʼa Amone úfua, o monʼê Hanuni anga u mu bhingana ku ungana.

² Davidi anga u zuela, uixi: Eme ngʼidikiza henda kua Hanuni monʼa Nahaxi, kala tatʼâ kia ngʼidikiza eme o henda. Davidi anga u katula athu ku mbèle iê, u a tuma ku mu hindula ni ku mu konda malamba mukonda dia kúfua kua tatʼâ. Akua mbèle ia Davidi anga a bhixila moxi ia anʼa Amone.

³ O makota-phe ma jitata ja anʼa Amone, ambela Hanuni, muadiʼâ, exi: Eie ua fika Davidi ua ki bhangela ujitu ua tatʼenu, kia tumu ku ku konda malambʼiki? Manhi Davidi ka tumikisa akua mbèle iê mu ku ku lónda o mbànza, ni ku i ijiia kiambote, phala ku i lundumuna?

⁴ Kienhiki Hanuni u kuata akua mbèle ia Davidi, ua bhuta miezu ku mbandu imoxi, izuatu iâ u i butulula mu kaẋi, hé a xala mataku mu kanga, anga u a kaia.

⁵ Kia ki kundu Davidi, muene u tuma athu ku a batuila mu njila; kuma mala enhá ala ni jisonhi javulu ja a kuata. Muenexi, uixi: Kalenu hanji bhu Jedikó katé miezu ienu ki i sabhuka dingi, mu ize kiua ku bhata.

⁶ Anʼa Amone kia mono kuila a di nuhisa zumba diaiibha kua Davidi, anʼa Amone a tuma kukasa akua Sídia bhu Bete-Lehobo ni akua Sídia mu Zoba, makuinhi aiadi a midi ia muthu, akua kuenda bhoxi, ni sobha ia Mahaka ni midi ia muthu, ni akua Tobu kuinhi dia midi ni midi jiadi.

⁷ Kia kʼivu Davidi, u katula Jouabe kumoxi ni kifuxi kioso kia masoladi a indanda, hé u a tuma kuia kúlua-nâ.

⁸ Anʼa Amone anga a tunda, hé a di ta ku munono phala kúlua ita bhu muelu ua kimbaka kiâ; akua Sídia-phe ku Zoba ni ku Lehobo, ni akua Tobu ni akua Mahaka, a di kalela ni kilômbo kiâ mu mukáu ku kanga.

⁹ Jouabe-phe kia mono kuma ita ia mu lungila ia kala ku pholo ni ku dima, u sola o mala a indanda a di tungula mu akuá mu Izalaiele, hé ua ta ku munono phala kúlua ni akua Sídia.

¹⁰ O mala amukuá a xala-ku, ku mundu, ua a bhana kua phangʼiê Abisai, anga u a ta ue ku musanga phala kúlua ni anʼa Amone.

¹¹ Uixi: Se ngi sanga akua Sídia a ngi tundu mu nguzu, eie uiza mu ku ngi banda; o ki kala-phe anʼa Amone ene a ku tundu eie mu nguzu, eme-phe ngiza mu ku ku banda.

¹² Tu kodienu maku ni mixima, tu bhange undanda mu bhângela o mundu uetu ni mabhata ma Nzambi ietu; o Jihova a tu bhange kioso muene kia mu uabhela ku mesu mê.

¹³ Kienhiki Jouabe, ni mundu uoso aia-nê kumoxi, a bhixila kua akua Sídia mu kúlua, o akua Sídia anga a toloka hé a lenga bhu pholo iâ.

¹⁴ Anʼa Amone ue kia mono akua Sídia a lenge, ene uâ a lenga bhu pholo ia Abisai anga oso a bokona mu mbonge iâ. Jouabe-phe anga u tunda-ku kua anʼa Amone, anga u iza ku Jeluzaleme.

¹⁵ Akua Sídia kia mono kuma a a tolola, abhi-ku bhu pholo ia Izalaiele, a di bhongolola dingi.

¹⁶ Hadadezele anga u tuma kukasa akua Sídia ku sámbua dia Ngiji, anga eza bhu Helamu; ni Sobaki kabhitangu ka kifuxi kia Hadadezele, muene ua a kalela ku pholo,

¹⁷ Anga a ki tangela Davidi; muene anga u bhongolola Izalaiele ioso, hé u zaúka ku sámbua dia Njolodá, anga u bhixila bhu Helamu. Akua Sídia-phe anga a di ta ku muxinda bhu pholo ia Davidi, a lua-nê.

¹⁸ Maji akua Sídia-phe a lémbua-ku anga a lénga, Izalaiele ua a kaie; Davidi anga u jibha ku akua Sídia athu a tokala mu hâma sambuadi ia makalu, ni makuinhi auana a midi ia muthu ia akua jikabalu; o Sobaki, muene kilolo, kabitangu ka kifuxi kiâ, anga u mu ta, hé u fuila bhenhobho.

¹⁹ O jisobha joso ja kexe mu bhikila Hadadezele, kia mono kuma abhi-ku bhu pholo ia Izalaiele, a bhanga paze ni Izalaiele, a di tambulula-nê anga a kala mu mu bhikila. Kienhokio akua Sídia anga a kala kiá ni uoma ua kukuatekesa dingi anʼa Amone.