II Samuuele 1 - O Mikanda Ikola

Davidi uívua kuma Saúlu uafu

¹ Anga ki bhita-phe kuila, kia bhiti o kúfua kua Saúlo, ni kia vutuka Davidi mu kujibha akua Amaleke ku ita, kuila ua bhange kiá izuua iiadi mu Zikilake;

² mu kizuua kia katatu bhu tula muthu ua tundu mu kilômbo kia Saúlo, ni izuatu iê ia tandujuka ni mavu a di kuu mu mútue; o kia zubha kubhiẋila bhua Davidi, u di takuila mu mavu anga u diunda.

³ Davidi anga u mu ibhula, uixi: Ua tundu kuebhi? Muene u mu vutuila, uixi: Mu kilômbo kia Izalaiele mu nga lenge.

⁴ Davidi anga u mu ambela, uixi: Kia bhiti kiebhi? Ngi tangele hanji, nga ku diondo. Muene u vutula, uixi: Mundu a lenge mu ita, avulu muene a dibhale, iá afu; ni Saúlu ni monʼê Jonata afu ue.

⁵ Davidi anga u ambela munzangala ua mu mu tangela kiki, uixi: Eie ua kʼijiia kiehhi, kuila Saúlo ni monʼê Jonata afu?

⁶ Munzangala ua mu mu tudila njimbu, uixi: Mu kuenda kibhuku ngi kala mu bhita ku mulundu ua Jiliboua, anga ngi sanga Saúlo iú ua di kubu ku sosa iê, o makalu a ita ni akua jkikabalu a-lu mu kaia, iá eza ni ku mu zukama.

⁷ Kia sakuka u ngi mona eme, anga u ngʼixana.

⁸ Ngixi-phe, Emʼiú. Muene u ngʼambela, uixi: Eie nanhi? Ngixi: Ngi mukua Amaleke.

⁹ Uixi: Ngi bhiẋile, nga ku diondo, u ngi jibhe; kuma nga bhondalala ni misusu, mukonda muenhu uami uoso moxi hanji iu-é.

¹⁰ Kienhokio ngi mu bhixila, anga ngi mu jibha, mukonda nga mu ijiia, kuila ka tena dingi kubhuluka se ua di bhale kiá. Eme nga katula o kitundu kia mu kala ku mútue, ni dilenge dia mu kala mu lukuaku, eme nga ku bhekela-iu eie, ngana iami.

Davidi u tuma kujibha mukua Amaleke

¹¹ Bhenhobho Davidi u kuata ku izuatu iê, u i tandujula; ni mala oso aia-nê kumoxi kiene.

¹² Anga a bhanga kibulukutu, a ta jingololo ni kudila, a fula kudia katé mu ngoloxi, mukonda dia Saúlo, ni mukonda dia Jonata monʼê, ni mukonda dia mundu uangene ua Jihova, ni dibhata dia Izalaiele, mbata a dibhale ku mazu a xibhata.

¹³ Davidi anga u ambela munzangala ua mu tudila mjimbu, uixi: Eie ua tundu kuebhi? Muene u vutula, uixi: Ngi monʼa nzuá-ngiza, mukua Amaleke.

¹⁴ Davidi u mu ambela, uixi: Uoma-phe ua ku kambela-hi, ua kuzenga lukuaku lué mu kujibha muthu ua Jihova ua mu undu ni maji?

¹⁵ Davidi anga u ixana-bhu munzangala umoxi ku makuenze mé, uixi: Mu bhiẋile, u mu te. Muene anga u mu ta, u fuila bhenhobho.

¹⁶ Davidi anga u mu ambela, uixi: Manhinga mé ma kale ku thandu dia mútue ué eʼmuene, kuma dikanu dié muene diene dia ku bhela umbangi ua kuêla, uixi: Eme-muène nga jibha muthu a mu undu kuala Jihova ku ungana.

Mukûmbi ua Davidi mu dila Saúlo ni Jonata

¹⁷ Davidi anga u dila ni mukûmbi uenhú ku thandu dia Saúlo, ni ku thandu dia monʼê Jonata,

¹⁸ anga u tuma kulonga anʼa Juda mukûmbi ua Mufula: uene-ze a u soneka mu Divulu dia Jaxadi:

¹⁹ Kijîngo kié, u Izalaiele, kia buila ku matala ma milundu! Mazonda, tata, a dibhale!

²⁰ Kana ku ki tangele mu Ngate, kana ku ki fumanesa mu nzunga ia Axikilone; sumba anʼahatu ku akua Fidíxia a sanguluka, sumba anʼahatu a matumbu a kola kikoue.

²¹ Enu milundu ia Jiliboua! ki ku laukile dimume ku thandu dienu, ku thandu dienu ki kuaʼà noke mvula, ki ku kale mábhia ma bhana maujitu kua Jihova! Kuma ngubu ia dizonda kuenhoko kua i texi ufusa, o ngubu ia Saúlo, kala ua kambele ku mu unda ni maji!

²² Mu kúnua manhinga ma akueta, mu kúdia banha ia iiala ia ita, mufula ua Jonata ki ua kexe mu vutuka kuema! Xibhata ia Saúlo ki ia kexe mu kubeta kingoho!

²³ Saúlo ni Jonata mu kukola muenhu o kuuabha, o ku di zola, ka di uanununa-phe, kixi ku muenhu kixi mu kufua kuâ, mu kulenga lusolo a somboka jiholokoko, mu kusuina kinéne a tunda jihoji,

²⁴ Enu anʼahatu a Izalaiele dilenu Saúlo, ua mi zuikile jinge ikusuka ia dísese, ua mi uabhesele izuatu ni makembu ma ulu.

²⁵ Mazonda, tat, a dibhale mu kaẋi ka ita! Jonata ua fuila ku matala ma milundu.

²⁶ Kia ngi kate, phangʼiami Jonata, tata! Uthu u ua ngʼidikiza jinga ua vulu; henda i ua ngi kuatelele ia madiuanu! henda ié ia tundu o henda ia ahatu.

²⁷ Mazonda, tata, a dibhale! Ibhakatu ia ita ia di boto!