II Phetele 1 - O Mikanda Ikola

Kumenekena ni kutendelela

¹ Eme Ximá Phetele, ngi mubhika, ngi Poxolo ia ngene ia Jezú Kristu. Nga sonekena akuetu, a mono ue kuxikana kua sokela ni kuetu mu ujitu, a ku muena mu kuiuka kua Nzambi ietu, ni Mubhuludi Jezú Kristu.

² O kiadi ki di xale mudienu, ni paze ia nzungule, mu ku dʼijiia ni Nzambi, ni Jezú Ngana ietu.

Nzambi uixana, anga u sola

³ Kuma o kutena kua Nzambi kua tu bhana o ima ioso i tua bhindamena, phala tu kale ni muenhu, ni uendelu uambote; a tu bhana-iu mu ku dʼijiia ni muène, ió ua tu ixana phala tu kale ni mbandu ku fuma iê ni mbote iê.

⁴ Kiene kia mu bhangesa ku tu bhana jipolomesa jê jakulu kinéne ja ujitu. Muène ua bhange kiki phala ku jipolomesʼiji, ja ujitu, tu nomone ku kidifanganu kiê kia unzambi, mbe se tueji ku di bhala kiá mu kubola kuene ku mundu mukonda dia jihânji jaiibha, tu tene kubhulaka.

⁵ Mukonda dia kienhiki, enʼuenu mu ta-ku nguzu ni kukuata muanu uoso, phale ku kuxikana kuenu mu bandekeze-ku o dijinu, o ku dijinu mu bandekeza-ku o kilunji,

⁶ o ku kilunji mu bandekeza-ku o kufikisa jihânji, o ku kufikisa jihânji mu bandekeza-ku o kukolokota, o ku kukolokota mu bandekeza-ku o uôma ua Nzambi,

⁷ o ku uôma ua Nzambi mu bandekeza-ku o ku di tuma ni jiphange, o ku ku di tuma ni jiphange mu bandekeza-ku o henda.

⁸ Kuma imʼiii se mu kala na-iu, anga i vula, i mi bhangesa ki mu kala ni usonde, ki mu kambe kuima ibundu ia ibhangelu iambote mu kuijiia kua Ngana ietu Jezú Kristu.

⁹ Uoso-phe imʼiii ia mu kambe, uala kifofo, mba muthu u mona ngó bhua zukama, iú ua di jimbi kuila a mu ixika kiá o ituxi iê iokulu.

¹⁰ Uila kiki, enu mu akuetu, phange jami, Sotenu izuua ioso kukala ni muẋima ua kolo mu kuijiia kuma Nzambi kidi kiene, muène ua mʼixana iú ua mi solo. Mbata se kiene ki mu bhanga, ki mua-nda kudibhala dingi.

¹¹ Maji mu kubhanga kiki, a kà mi bhana ungana ua kubokona mu Mbanza ixalela, ia ngene ia Ngana ietu. Mubhuludi Jezú Kristu.

¹² Mukonda dia kienhiki, ki nga-nda kueha o ku mi lembalesa jinga imʼiii, sumbala muaʼijiia, enu mua kolo kiá mu kidi ki mua tambula.

¹³ Nga ki mono kuila kia tokala, kioso ki ngala hanji ku muenhu iú o ku mi vunza jinga ni ku mi lembalesa o imʼiii.

¹⁴ Kuma nga kʼijiia kuila kindala kuanda ku ngi bhinga kuzula o mukutu iú ua kalunga, uila kia ngʼidikiza-kiu ni kulomboloka kuoso, kuala Ngana ietu, Jezú Kristu.

¹⁵ Uila kiki, ngi kuata muanu, ua kubhanga ioso i nga tena, phala kia kà bhita o kukatuka kuami, enu thembu joso mu tene kulembalala imʼiii.

Jimbangi ja fuma ni unêne ua Kristu

¹⁶ Kuma etu ki tua kaiela misoso iofunhe ni ndunge ja muthu uoso-uoso, kioso ki tua mi tudila o Njimbu ia unéne ni kuiza kua Ngana ietu, Jezú Kristu. Maji etu tuala tu jimbangi, kuma o unéne uê tua di muena-u ni mesuʼetu!

¹⁷ Kuma etu bhene bhu tua kexile, kia tambuile kua Nzambi, Tata, ujitu ni fuma. Dizui dia tundile mu kubenha kua Dikota, anga di mu tumbula, dixi: Muenhú Monʼami nga mu zola, uene mu ku ngi sangulukisa kiavulu.

¹⁸ Dizui dienhidi, etuʼene muene tua dʼivua, di tunda mu diulu, ki tua kexile ni Ngana Jezú ku mulundu ukôla.

¹⁹ Mukonda dia kienhiki, o maka ma tanga jinga o misésedi, tua beta dingi o ku ma dielela kiavulu. Enu uenu mua-lu bhanga kiambote, o ku mʼaluka, enhá. Mukonda ene a di bhange mukuâ ni kandeia ka muikina mu kididi kia vundu, katé kikia o kizuua, anga o mukengeji ua thethembua ia kimene, u muikina mu miẋima ienu.

²⁰ Inda ku ima iosuʼiii, mu dianga-phe ku kʼijiia kuma: Kana-ku muzambu ua polofeta uala mu Divulu dia Nzambi, muthu ua tena kudiiomboluela-u mueniê mudiê.

²¹ Mbata nuka kukala muzambu ua polofeta uijiia ku vondadi ia muthu. Maji athu a zuela jinga mu kutula o Njimbu i tunda kua Nzambi kala kioso kia a tuma jinga kuzuela kuala o Nzumbi Ikôla.