II Nzuá 1 - O Mikanda Ikola

Umenekenu

¹ Eme kikulakaji kia Ngeleja, nga sonekana Nga Muhatu, monʼ a ngene, ni anʼê nga a zola mu kidi. Ki eme ngó ubheka uami, maji ni ene oso, ejiia ue o kidi, a mi zola muène.

² Kia mi bhangesa o ku mi zola, o kidi kia tunga moxi dienu, ki tuandú xala jinga na-kiu katé ku hádia ni hádia.

³ O kiadi, ni henda, ni paze, i kale mudienu, i tunda kua Nzambi, Tata, ni kua Jezú Kristu, Monʼê mu kidi ni henda.

O ku di zola, ni kujijila o ulongelu ua kidi

⁴ Nga sanguluka kiavulu, ki ngevu kuma anʼê amoxi ala kuenda mu kidi uila kia tu bhana Tata o kijila.

⁵ Kikiphe, nga ku bhingi, Ndona, kuila tu di zole mudietu. Kana kala nga ku sonekena kijila kiʼobhe, maji kiene kiá ki tuene na-kiu tunde ku dimatekenu, kia ku di zola mudietu.

⁶ Kala kiki, o kuzola-phe ku kala kiki, kuila tu kaiela mu ijila ia Nzambi. Kiene o kijila ki muevu tunde ku dimatekenu, kuma kiene ki muenda na-kiu, kuila: Kolokotenu ni ku di zola mudienu.

⁷ Kuma mu ngongo mua tukuluka axombi avulu. Athu a kamba kufisala kuila Jezú Kristu uejile ni mukutu ua xitu. Muthu u bhanga kiki, muxombi, muenʼió Nguma ia Kristu.

⁸ Di langienu, ki mu jimbidise o ima ioso i mua kalakala kiá, phala mu tambule kubhanduluka kua soko, kua tenena.

⁹ Uoso ua somboloka, ua kambe kuimana mu ulongelu ua Kristu, Nzambi kala-nê. Uoso-phe uemana mu ulongelu ua Kristu, muenʼió uala ni Tata, ni Mona.

¹⁰ Muthu uoso-uoso u mi sanga, hé u mi bhekela ulongelu uengi, o ua Kristu ki uene, muthu ió kana ku mu tambulula mʼ onzo jenu, kana ue ku mu menekena, muixi: O paze i kale ni eie.

¹¹ Kuma muthu uala kiki, uoso u mu inda kutululuka, ua nomona ue ku imbamba iê iaiibha iene mù bhanga, a sokela.

Maka ma kulekela

¹² Ngala ni maka mavulu ma ku mi tangela, maji ku a ta ku phaphela ni tinda-phe, ki kiene ki nga mesena. Mukonda ngandala kuila hinu ngi mi sanga, ni tu di kunde pholo ni pholo, phala ngalasa ietu i tenene.

¹³ O anʼ a phangʼié ia muhatu, monʼ a ngene, a mu sola kuala Nzambi, a tumu ku ku menekena. Mahezu.