II Malunda 9 - O Mikanda Ikola

Sobha ia muhatu, ua tokala ku Saba (Etiópia) uiza mu kutala Soloma

¹ O Sobha ia muhatu, ia Saba, kioso kievu o fuma ia Solomá, uiza mu Jeluzaleme, mu kulola Solomá, ni jihengele, anga uiza ni kifuẋi kia dikota kia mu kuenda na-kiu, ni jikamelu jambata imbamba ia matunda ni ulu ua vulu ni jiphelu ja nzaji; hé uiza kua Solomá, anga uzuela-nê muene ima ioso ia mu kexile ku muẋima uê.

² O Solomá-phe, izuelu iê ioso anga u mu lomboluela na-iu; ki bhu kexile kima kia suama, Solomá anga u kamba ku mu tangelakiu o dilomboluelu diê.

³ Sobha ia Saba-phe, ia muhatu, kia mono o unjimu ua Solomá, ni inzu ia tungu,

⁴ ni makúdia eza ku meza mê, ni uxikamenu ua abhikʼê, ni ukalelu ua idia-meza iê, ni izuatu iâ; ni abhani-a-kopho iê, ni izuatu iâ; ni ubandelu uê, muene kia kexile mu kubanda mʼonzo ia Jihova, muenhu mʼoxi ua mu bhu-mu.

⁵ Anga uambela sobha, uixi: Mbé maka u ngevu kʼoxi iami, a ibhangelu ié ni kuijiia kué, a kidi muene.

⁶ Maji-phe, eme maka mâ ki nga a xikana, katé ki ngeza, mesuʼami ia a ku mono. Tala, ku unéne ua kuijiia kué ni mbandu ngó ka ngi tangela-iu; kuma o fuma i ngevu, eie ua i tundu kinéne.

⁷ Azediua o athuʼé; azediua abhikʼé iá, ala izuua ioso bhu pholo ié, anga aia ni kuivua o unjimu ué!

⁸ Jihova dia Nzambi ié, a tane-ku! Ua ku uabhela eie, phala ku ku tula ku usobha bhu kiandu kiê, nda u kalele Jihova dia Nzambi ié; kuma Jihova dia Nzambi ié ua zola Izalaiele, phala ku mu tungisa ku mivu ni mivu sé dizubhilu; iu ua ku bhange eie kukala u sobha iâ, mbé o ku a fundisa ni ku a batuila milonga mu kidi.

⁹ Anga u bhana kua sobha hama ni makuinhi aiadi a jitalendu ja ulu, ni ima iate kiavulu ua i bhana ni kusukumuna kuoso, ni jiphelu ja nzaji; o ima iate kiavulu, ia bhana sobha ia Saba, ia muhatu, kua sobha Solomá, ima kiluua a i muene kala ioio.

¹⁰ Ni jingunza ue ja Hilamu, ni jingunza ja Solomá, ejiie ni ulu ku ixi ia Ofidi, a bheka ue ni thungu ia miẋi ia alukumini ni phelu ja nzaji.

¹¹ Sobha anga u bhanga maxilu ni thungu ia miẋi ia aluikumini phala inzu ia Jihova ni inzo ia sobha; ua bhange ue ni jimbànza ni tukoxi mbé o jingimba, tukoxi tua bhingi kiluua a tu mona mʼoxi ia Juda.

¹² O sobha Solomá ue anga u bhana kua sobha ia Saba, ia muhatu, ima ia soko ni iii ieza na-iu muene, hé u mu tela-ku dingi iandalele o muẋima uê ni iii ia bhingile; kienʼiki muene anga u vutuka, uia kʼoxi iê ni muene ni abhikʼê.

O umvuama ua Solomá ni unéne uê

¹³ O kunema kua ulu ueza jinga kua Solomá ku muvu umoxi, hama jisamanu ni makuinhi a samanu ni kisamanu kia jitalendu ja ulu;

¹⁴ o ulu ueza jinga na-u abadi ni asumbixi, uengi; o jisobha joso ue ja Alábia ni adiakime a ixi ieneʼoio, a bheka jinga kua Solomá ulu ni phalata.

¹⁵ Sobha Solomá anga u bhanga ue hama jiiadi ja ngubu ja makota, ja ulu uòsule; ua tumina kuila ngubu ngó imoxi a i pezalela hama jisamanu ja xikulu ja ulu uòsule;

¹⁶ ua bhange ue dingi hama jitatu ja ngubu ja ulu uòsule; ngubu ni ngubu, ua tumu kuila a i pezalela hama jitatu ja xikulu ia ulu; anga Solomá u ji tula mʼonzo ia muxitu ua Libanu.

¹⁷ Sobha anga u bhanga dingi kiandu kiònene kia mazu a nzamba, hé u ki xiia ulu ua zele kiambote.

¹⁸ O kiandu hé ki kala ni disambelelu dia matala a samanu ni kibaka kia ulu, kia naminina ku kiandu kuene, ni maxamenenu ku mbandu jene kiiadi kiâ bhu kididi kia kuxikama; hoji jiiadi ji kala bheneʼobho bhu maxamenenu.

¹⁹ O ku matala a samanu a di sambelelu, mbandu jene kiiadi kiâ, ku kala ue kuinhi dia hoji ni kiiadi; kana-ku dingi ixi ia bhangele ima kala iii.

²⁰ Itutu ioso ia kunuina, ia sobha Solomá, ia ulu mu ulu; o itutu ioso ue ia inzu ia muxitu ua Libanu, ia ulu ua dikenze; kuma o phalata, mu izuua ia Solomá ka i muene ku ta kima.

²¹ Mukonda kiʼaia jinga jinaviiu ja sobha ku Talsu ni jingunza ja Hilamu, eza jinga ni jinaviiu lumoxi ku mivu itatu a bheka ulu ni phalata, ni mazuʼa nzamba, ni jihima, ni jipavá.

²² Kienʼiki sobha Solomá anga u tunda jisobha joso mungongo, mu umvuama ni mu kuijiia.

²³ Anga jisobha joso mungongo jiia ni kusota kumona pholo ia Solomá, mbé o kuívua kuijiia kuê kua mu bhana Nzambi mu muẋima uê.

²⁴ Ene anga aia ni kuiza, muthu ni muthu ni ujitu uê, a bheka itutu ia ulu, ni izuatu, ni ibhakatu ia ita, ni ima iate kiavulu, ni jikabalu, ni jindumbe ja jimula; ima ienʼiii eza jinga na-iu ku muvu ni muvu.

²⁵ Solomá ue anga u kala ni midi jiuana ja ibhanga ia jikabalu ni makalu mâ, ni kuinhi dia midi ni kiiadi kia midi ia akua kusambela o jikabalu, anga u a uanena mu jimbonge ja makalu ni mu Jeluzaleme bhu mbandu ia sobha.

²⁶ Anga Solomá uia ni kutumina jisobha joso tunde ku ngiji katé ku ixi ia akua Fidíxia, tule mu jimbambe ja Ijitu.

²⁷ Sobha ua bhangesa ue kuila o phalata mu Jeluzaleme ila kala kahalamaue, o misedulu i kala ia ndumba kala mikuzu iala ku mikáu.

²⁸ O ku Ijitu, ni mu jixi joso jeneʼojo, a bheka jinga jikabalu kua Solomá.

O kúfua kua Solomá

²⁹ O ima ia mukuá dingi ia Solomá, kutale ia dianga, uixi ia sukidila, manhi ka i soneka mu divulu dia mazuelelu ma Natane, polofeta, ni mu ukunji ua upolofeta ua Ahiia, mukua Silo, ni mu jinzoji ja Idu, o muzambuidi, ku mbandu ia Jelebouamu monʼa Nebate?

³⁰ Solomá ua tumina mu Jeluzaleme makuinhi a uana a mivu ku thandu dia Izalaiele ioso.

³¹ Anga Solomá u zeka ni jitata jê, hé a mu funda mu mbonge ia Davidi, tatʼâ; anga Lobouamu, dia monʼê u hinga bhu kididi kiê.