II Malunda 4 - O Mikanda Ikola

O Kalatódio ni musanza ua ngòndo

¹ Anga u bhanga ue Kalatódio ka utadi, ka makuinhi aiadi a kóvadu mu kulebha, ni makuinhi aiadi a kóvadu mu kuzanza, ni kuinhi dia kóvadu mu kitala.

² Hé u iudika ue musanza ua kuzunza ua kuinhi dia kóvadu ku muzumbu ni muzumbu, ua kikondoluesa, ua kóvadu jitanu mu kitala; anga a u kuta ni lubhambu lua makuinhi a tatu a kóvadu.

³ O bhoxi diê a tele-bhu ifikula ia jingombe, ia kondolokele mu jimbandu, musanza uenʼió anga a u kondoloka mu jimbandu kuinhi dia kóvadu; jingombe anga ji kala mikalatata iiadi, jʼozunze bhu dizunzilu diê.

⁴ Musanza anga a u tula ku thandu dia kuinhi dia ngombe ni kiiadi: Jitatu ji lunga jipholo ku suku; jitatu ji lunga jipholo ku luiji; jitatu ji lunga jipholo ku sulu; o jitatu ja mukuá ji talela ku thunda; o musanza ua kalunga a u tula ku thandu diâ; o jimbunda ja jingombe ja bhela ku mbandu ia moxi.

⁵ Mukômo ue anga u kala ua kanda dia lukuaku; o ku mizumbu iê a bhange-ku kala mizumbu ia kopho mba kitulu kia liji, ku uizalesa ni menha, uambata a tena midi jitatu ja izongelu ia batu.

⁶ Ua bhange ue kuinhi dia masanga; iú ua te a tanu ku dilu, a tanu kiasu, phala ku di sukuila mueneʼomo; ioso i tokala ku sata ia kubhakula ni túbhia kua Jihova, a i sukuila mueneʼomo; maji o musanza ua kalunga-phe, phala jinganga kuia ni ku di sukuila-mu.

⁷ Ua bhange ue ni kuinhi dia kandeia ka ulu, ku kidifua kiê, anga u tu tula mu Tembulu, tu tanu ku kadilu, tu tanu ku kakiasu.

⁸ Ua bhange ue kuinhi dia meza anga ua tula mu Tembulu, a tanu ku dilu, a tanu ku kiasu; hé u bhanga dingi hama ia malonga a ulu a menha a pholo.

⁹ Ua bhange dingi lumbu lua jinganga ni lumbu lua dikota, o mikangala ia mabhitu ma lumbu ni mabhitu ene, ua a te kobidi.

¹⁰ O musanza ua kalunga ua u tula ku lukuaku lua kadilu ku mbandu ia mutundila-kumbi kua lulamena ku sulu.

¹¹ O Hilamu ue anga u bhanga jímbia, ni jipá, ni malonga a menha a pholo; kienʼiki Hilamu anga u zubha kubhanga kikalakalu kioso, kia kexile mu kubhangela sobha Solomá, phala inzu ia Nzambi.

¹² O jiphiladi jiiadi, ni makende aiadi, ni jikapitele jiiadi ku thandu dia mítue ia jiphiladi, ni mauanda aiadi mbé o kuvungina o makende aiadi ku jikapitele ja kexile ku sungu ja jiphiladi.

¹³ Ni hama jiuana ja jilomá phala o manda aiadi; misanga iiadi ia jilomá ikala uanda umoxi, phala kuvunga o makende aiadi ala ku jikapitele ja kexile ku thanduʼa jiphiladi.

¹⁴ Ua iudika ue ni maxikikilu, anga o masanga u a xikika ku thandu diê,

¹⁵ ni musanza ua kalunga ni kuinhi dia ngombe ni kiiadi koxi diê.

¹⁶ Kiene kimoxi ni masanga ni jipá, ni inhangenu ni itabhu ioso ia tokala, ia kobidi iòzunze, Hilamu dia Abihu ia bhangelele sobha Solomá phala inzu ia Jihova.

¹⁷ Mu dinhana dia Njolodá, mu mavu a utuma, muene sobha mua i zunzila jinga, mu kuila o kuku Sukote o kuku Zeledata.

¹⁸ Itabhu ioso ienʼiii Solomá anga u i bhanga ia ndumba kinéne muene, mukonda o kunema kua kobidi, ka kexi dingi mu ku kuzonga.

¹⁹ Solomá anga u bhanga dingi itutu ia tokalele mʼonzo ia Nzambi, kumoxi ue ni Kalotódio ka ulu, ni meza kua kuenda ni kutula jinga o jimbolo ja kutela.

²⁰ Ni matudilu a jikandeia ni jikandeia jê, ja ulu ua iuka kiambote, mbé o kuia ni ku tu uika mu xilu mu kola kinéne mukonda kiene o kífua.

²¹ Ni itulu ni jikandeia, ni itokelu, ia kexile ia ulu uoso, ulu ua beta muene o kuiuka.

²² Ni inhangenu, ni jibasiia, ni jikopho, ni iomuenu ia ulu ua nzeta; o bhu bokuenu dia mʼonzo, mabhitu ma mʼoxi mu xilu mu kôla kinéne ni mabhitu ma inzu ia Tembulu, ma ulu uoso.