II Malunda 2 - O Mikanda Ikola

Solomá u bhinga Hilamu, sobha ia Tilu, phala ku mu kuatekesa mu kutunga o Thembulu

¹ Solomá anga u xinganeka dijina dia Jihova ku di tungila inzu ni kutunga ue inzu phala o utuminu uêmuène.

² Anga Solomá ualula makuinhi sambuadi a midi ia muthu a tokala kuambata imbamba, ni makuinhi nake a midi ia muthu a fuama kubula matadi mu milundu, hé u ta-ku midi jitatu ni hama jisamanu ja iá endesa kiambote o kikalakalu.

³ Solomá hé u tumikisa njimbu kua Hilamu, sobha ia Tilu, kuila: Kala ki ua bhange kua tatʼetu Davidi, eie ua mu tumikisa jinga miẋi ia sédulu phala kutunga inzu mua kukala, kiene ue ki u ngi bhanga eme.

⁴ Talesa-phe, kuma, o dijina dia Jihova Nzambi iami ngala kiá phala ku di tungila inzu, i ngi mu lumbila, mbé o kuia ni ku muʼohela uasu ua dizumba bhu pholo iê, ni mbolo ia ku mu tela jinga izuua ioso, ni jisata ja kimene ni ngoloxi, ni mu jisabhalu, ni bhu jimbeji ja thethama, ni mu izokola ia Jihova Nzambi ietu; mbata Izalaiele kiene kia mu fuama kubhanga jinga katé ku hádia ni hádia.

⁵ O inzu-phe i nga-nda kutunga, ia-ndu kala ia dikota, mbata o Nzambi ietu Munéne o jinzambi joso ndenge.

⁶ Maji-phe muthu nanhi u kala ni nguzu ia ku mu tungila inzu, se hanji o maúlu ene, katé ni maúlu a maúlu a lémbua ku mu sueka? O eme, eme nanhi, ngi mu tungila inzu, ki inzu ngó ia ku muʼohela uasu ua dizumba bhu pholo iê?

⁷ Kindala-phe ngi tumikise muthu kunu, uejiia, u tena kukalakala ku ulu, ni ku phalata, ni ku ngòndo, ni ku utadi ua felu, ni ku púlupula, ni ku ima i kusuka ni ia azulu; uejiia kukalakala ni kisetelu kumoxi ni iá ejiia ala mua Juda ni Jeluzaleme, oso kiá alungile tatʼetu Davidi.

⁸ Ngi tumukise ue miẋi ia misedulu, ni ia faia, ni ia alukumine ia muxitu ua Libanu; mukonda nga kʼijiia kuila, ngunza jé ejiia kukoka miẋi ia muxitu ua Libanu; tala, ngunza jami a-nda kukala ni jingunza jé kumoxi.

⁹ Mbebhu o ku iudika thungu ia vulu; kuma o inzu i nga-nda kutunga ia-ndu kala ia dikota, i di uanesa muene.

¹⁰ Tala-phe, o ngunza jé akua kukoka, a koka o miẋi, nga-nda ku a bhana makuinhi aiadi a midi ia isudi ia tidiku iòsuange, ni makuinhi aiadi a midi ia isudi ia sevada, ni makuinhi aiadi a midi ia itabhu ia vinhu ni makuinhi aiadi a midi ia itabhu ia maji.

¹¹ O Hilamu, sobha ia Tilu, mu kuvutula u soneka anga uambela Solomá, uexi: Mukonda Jihova ua zola o mundu uê, ua a tela-ku eie ku usobha.

¹² Anga Hilamu uamba dingi, uixi: A tane-ku! Jihova Nzambi ia Izalaiele! Ua bhaanga o diulu ni ixi; Muene ua bhana kua Davidi mona uejiia; njimu iònene, ua xitunuka kiavulu mu thulu, a tunge inzu phala Jihova ni inzu ia utuminu uê muene-muène.

¹³ O kiki-phe ngi mu tumikisa muthu uejiia, ua xitunuka kinéne mu thulu, muene Hilamu Abihu.

¹⁴ Monʼa diiala, ua muhatu ua tokala mu ilumba ia Dane, o thatʼâ ua kexile mukua Tilu; muenʼiú uejiia o kukalakala ku ulu, ni ku phalata, ni ku ngòndo, ni ku felu, ni ku matadi, ni ku miẋi, ni ku púlupula, ni ku azulu, ni ku linhu ia nzeta, ni ku jithanga ji kusuka, hete mu ku kuata kisetelu kia kuseta na-kiu; njimu mu ima i bhinga kuxitunuka kiambote mu thulu ni masunga mu ioso ia mu bhana kubhanga kumoxi ni jinjimu ji uala na-ju eie ni jingijiie ja tetʼenu Davidi, ngana iami.

¹⁵ O kiki-phe, eie ngana iami, tumikisa ioso i ua tange phala abhikʼé: Ni tidiku, ni sevada, ni maji ni vinhu.

¹⁶ Kuma etu tua-ndu batula muene ndumba ia miẋi mu muxitu ua Libanu, ioso muene eie i u bhindamena, etu anga tu ku bhekela na-iu, mu ihungu, ku musanza, katé bhu Jopa, eie kiá hé ua kà i bandesa ku Jeluzaleme.

¹⁷ Solomá anga u tanga athu engi oso a kexile mʼoxi ia Izalaiele, kala kiá o ditangelu diòkulu, kia tangele Davidi, dia tatʼâ; eneʼoso anga a tena hama ni makuinhi a tanu a midi ni midi jitatu ni hama jisamanu ja athu.

¹⁸ Hé u tungula-ku makuinhi sambuadi a midi ia ngamba jʼambata imbamba; makuinhi nake a midi ia akua kubula matadi mu milundu; hé u ta-ku dingi midi jitatu ni hama jisamanu ja atumini a kala mu ku kalakalesa o kifuẋi.