II Kolindo 9 - O Mikanda Ikola

Mukungu phala o jikidistá ku Judeia

¹ Bu kaxi ni mukungu u muala kutumikisa phala kubindumuna akua Ngana ku Judeia, ki ki bhingi ngó ku mi sonekena.

² Kuma nga kʼijiia kuila enu mu andala ku a bindumuna, kiene muene ki nga mu mi ximanena ku jiphange ja akua Masedonia. Eme ngʼambe ngixi: O jiphange ku Ngelésia, a di iudika phala ku kuatekesa tunde kiá mu muvu ua tundu-mu. Avulu muene mudiâ a suina dingi kiengi mukonda dia vodadi ienu.

³ Nga mu tumikisa kindala o jiphange jiji phala o thathe i nga te mukonda dienu ku maka iá ki i kale ia makutu. Maji mu kale mua di iudika uila ki nga ki tange.

⁴ Uila kiki, se athu ku akua Masedonia aia ni eme, hé tu sanga kiluua mu di iudika kia-nda ku kala kima kia jisonhi phala etu. Katuku o jisonhi ji mu kala na-ju enʼuenu, mukonda dia kudielela ku tua mi kala na-ku.

⁵ Kala kiki, nga fika kia uabha kubhinga kuila bhu kale jiphange ji tu tuamenena ku mualʼoko, phala kuiudika o ujitu uenu u mua tange. Phala eme ki nga kà bhixila, ngi sange uoiudike kiá, o ene oso a kʼijiie kuila kima kia vondadi ienu, ki kʼile kala etu tua mi bhinjika.

⁶ Lembalalenu kuila: Uoso u kuua bhuʼofele, u muna ue bhuʼofele; uoso u kuua nzungule, u muna ue kia nzungule.

⁷ Kala muthu a bhane uila kia mu kala mu muẋima uê, ka bhane ni kuluuala, mba mu ku mu bhinjika. Mbata Nzambi ua zola mukua kubhana ni ngalasa ioso.

⁸ Nzambi-phe ua sokobho o ku mi bhana kia tundu ioso i mua bhindamena, phala izuua ioso mu kale mua tenena mu imbamba ioso ia mbote.

⁹ Kala ki ambe o Mikanda Ikôla: Muène u bhana ni henda ioso, ua uanena jinga o jingadiama, o kulenduka kuê ki kuene kubhua.

¹⁰ O Nzambi mukua kubhana o mbutu phala ku kuna, ni musa ua kudia, uanda ku mi bhana ue o jimbutu joso ji mua bhindamena. Anga u ji sokolola, hé ji bhana ibundu ia kumuna i tunda mu kulenduka kuenu.

¹¹ Muène ua kà mi bhanga kukala mu jimvuama mu ima ioso, katé ni ua kubhana kia nzungule. Anga kia kà bhekela athu avulu kusakidila Nzambi mukonda dia ujitu uenu u muala ku a tumikisa bhu maku etu.

¹² Kuma o kiki ki muala kubhangʼiki, ki ki bhandulula ngó o mundu ua Nzambi ua bhindama, maji ki bhekela ene kuximana kiavulu Nzambi.

¹³ Ene a kà fumanesa Nzambi, mukonda dia kubhindumuna kuenu kuenʼiúku, kijimbuete kia kuila enu mua kaiela o Njimbu ia Kristu. A kà fumanesa ue Nzambi mukonda dia ujitu ua henda u mua bhana mu mukungu u muala ku a tumikisa ene ni mundu uoso kiá.

¹⁴ Uila kiki, ene uâ mu ku mi sambela a kà ki bhanga ni huii iavulu, mukonda dia henda ionéne ia Nzambi iene ku mi kuatela enu.

¹⁵ Tu sakidilienu Nzambi mukonda dia henda iê ku i tanga ki i xina.