II Kolindo 6 - O Mikanda Ikola

¹ Uila kiki, ki tuedi tu akuenu mu kikalakalu kia Nzambi, tua mi bhingi kiki: O kiadi kia Nzambi, ki mua tambula kiá, ki mu ki ehele dingi ku di bota.

² Ivuenu kioso kiambe Nzambi, uixi: Eme nga evidila bhu kithangana kia bhindamene o ku a kudila, nga a kuatekesa bhu kizuua kia kubhuluka. Ivenu, kuma: Kiki, kiene o kithangana kia kutambula o dikuatekesu kua Nzambi! Lelu kiene o kizuua kia kubhuluka!

³ Kana kubhanga kima kioso-kioso ki bhangesa mukuenu ku di bhala, phala o ungunza uetu ki u kale ni malebhu.

⁴ Inda-phe tu idikiza mu ima ioso kuila tuala tu jingunza ja Nzambi, mu ʼkolokota kiavulu ni muanu uoso mu jihadi, mu makubhindama ni mu jiphaxi.

⁵ Ene mu ku tu beta ni ku tu takuila mu jikaleia, hé a tu bhana ndumba ia malembu mu jimvunda ji salumuna o mundu. Tuene mu kalakala kinéne katé tu fula muene o kilu sè kuta dikoka ku dikanu.

⁶ O mu kuzela kuetu, ni kuijiia, ni mu kuxididika, ni mu kulenduka kuetu ku tuala na-ku, tu edikiza kuma tuala tu jingunza ja Nzambi. Imʼiii tua idikizila mua Nzumbi Ikôla, ni mu henda ietu ia kambe ku di bhangesa,

⁷ ni mu maka ma kidi, ni mu nguzu ia Nzambi. Mu kumaneka tuala ni ivunga ietu ia kubatula mu kidi, kuene mu batula Nzambi, iene ia kuama na-iu o nguma ni kudibhangela.

⁸ Tu tambula ujitu, ni ku tu kambesa ujitu, mu ku tu lebhula, ni ku tu ximana. A tu bhanga kala tu akua makutu manhi tu akua kuzuela kidi;

⁹ kala tu athu ka tu ijiia, manhi a tu ijiia muene kiambote ku athu oso; kala tu athu tua-fu, maji kala ki mua ki mono, etu-etu-ú ni muenhu. Bhu kala ni bhabha a tu bunda ni kibetu, maji ki tu fu.

¹⁰ Sai ni bhabha a tu vunzila malamba, maji etu tua sanguluka jinga. Tuedi kala tu jingadiama, maji athu avulu tuala ku a muesa jimbongo. Tuedi kala ki tu moneka kima, maji ima ioso tua i vu.

¹¹ Enu makamba a kazola mu mbanza ia Kolindo, tata, mu ku mi tela maka tua mi tangela o kidi, o muẋima uetu tua mi jikuila-u muene.

¹² Mixima ietu ki tu i jika phala enu, enu-ku mua jika o miẋima ienu phala etu.

¹³ Nga mi ambela kala mu anʼ ami. Enu uenu londekezenu o ubanzelu kala ió u tua mi kala na-u etu. Jikulenu o miẋima ienu!

Ku a tendelela kulenga ufusa, ni kukumbidila o kuzela kua xindi Nzambi

¹⁴ Ki mu sote ku di ta mu kikalakalu kimoxi ni iá a kambe kuxikana, kala enu uenu mua sokela-nâ. Kuma o kuiuka ku kala kiebhi mu kisangela ni kubhengalala? Mba o muanha u di lunga kiebhi ni usuku?

¹⁵ Kristu u di tambulula kiebhi ni Kadiaphemba? Mba o muxikani u kala ni kima kiahi kumoxi ni ió ua kambe o kuxikana?

¹⁶ O kididi kia Tembulu ia Ngene ia Nzambi, ki bangana kiebhi ni iteka ia akua mundu? Kuma etu tuala tu tembulu ia Nzambi ia muenhu. Uila kiambe muène Nzambi, uixi: Eme ngiia mu kutunga, hé ngi kala-nâ kumoxi. Ngi kala ngi Nzambi iâ, ene a kala mundu uami.

¹⁷ Ngana muène uixi, dingi: Uila kiki, Tundenu mu mundu uâ, mu di kalele, eme ngi Ngana. Kana kubabata kima kia ufusa, eme nda ngi mi tambulule.

¹⁸ Ngi mi kale ngi Tata ienu, enu mu ngi kale mu anʼ ami a mala ni àhatu kiene kiambe Ngana Uatena-Ioso.