II Kolindo 5 - O Mikanda Ikola

¹ Mukonda tua kʼijiia kuila kioso kia-nda kubudika o fundu iii mu tua tungu, uene o mukutu uetu mu ngongo mumu, Nzambi ku diulu hinu ua kà tu bhana inzu mu tu tunga. Inzuʼoio-phe a i tungu kuala Nzambi muene, i xalela-ku kiá katé ku hadia ni hadia.

² Mukonda o hânji i tuala na-iu ia kukala ni dibhata dietu ku diulu iònene ia mu tu bhangesa kukema mu kumesena kuila i di bhange kiá momuetu.

³ Mukonda kioso kia-ndu tu zuika ni dibhata diodio, ka tu sange tua kambe mukutu.

⁴ Kuma kidi kiene, etu kioso ki tuala mu fundʼumu ia mukutu uetu, tu kema mukonda dia kinemenu kia tu xina. Ki mukonda tu andala a tu zula o mukutu uetu iú ua bhoxi, mbata tua mu kuinda ku tu zuika ni mukutu ua diulu, phala o muenhu u jikinise kiki kia xikamena o kufua.

⁵ Muène Nzambi ua tu iudika phala ku tu bilula kienhiki iú ua tu bhana-ku kiá o diẋîkina dia Nzumbi iê mu ima ioso ia-ndo tu bhana.

⁶ Uila kiki, izuua ioso u sanga tua suina dingi. Kuma tua kʼijiia kuila, kioso ki tua tungu mʼonzo ia mukutu iú, tua sanduka ku bhata dia Ngana.

⁷ Mukonda tua laiela mu kuxikana, ki tua mu laiela mu ioso i tu mona.

⁸ Tua suina dingi kiengi, kieju tu uabhela kuila tueha kutunga mu mukutu iú, anga tuia mu kutunga ni Ngana.

⁹ Maji-phe, kiala-bhu kota, ki tua bhindamena, o kuuabhela muene Ngana kiambote, kixi tu kala kunu mʼonzo iii ia mukutu uetu, kixi tu kala koko.

¹⁰ Kuma etu ene oso tua bhingi hadia tu tukulukila bhu kibhuna kia Kristu phala ku tu fundisa kuala muène. Kala muthu phala a tambule kioso kia fuama mu imbamba ioso ia bhanga jinga ku mukutu, kixi iambote, kixi iaiibha.

Njimbu ia kuluulula

¹¹ Ki tualʼiki, tuejiia kioso ki kala o uôma ua Ngana, kienhiki athu tu sota ku a ejidisa o kidi. Maji o Nzambi ua tu ijiia muene kiambote, tamanu enu ue mu tu ijiia muene kiambote mu miẋima ienu.

¹² Ki tua kuata dingi ku di ximana etu-ene ku mesu enu. Maji tua ki zuelela o ku mi bhana enu kia ku di thâthela ngó o ukembu ua pholo, kana ua muẋima.

¹³ Kuma o ki tu kala tua tekuka, tua tekukila Nzambi; maji o ki tu kala tu athu a kilunji, enu-enu tua mi kalela na-kiu.

¹⁴ Kuma tuezala ni henda ia Kristu ia tu kuatela, mukonda tua kʼijiia kuila muthu umoxi ua fuidile ene oso, mu kiki, atu ene oso a tambula mbandu mu kufua kuê.

¹⁵ O muène ua fuidile ene oso bhu kididi, phala oso kiki ala ku muenhu, ki ki kale ene dingi a di vu, maji ua a vu muène ua a fuidile bhu kididi, iú ua fukunuka.

¹⁶ Uila kiki, ku pholo ku tuia, kana muthu tu mu fika dingi mu imbamba ia xitu. Né-mbe Kristu muène tua mu fika jinga mu xitu, kiki ki kiene dingi ki tu bhanga.

¹⁷ Kienhiki se muthu u kala mua Kristu, muthu uengi ua di bhange. Kuma ima iokulu ia bhiti, talesa, ima ioso ieza ku ubhe.

¹⁸ Ima ioso-phe iii, Nzambi muene na i bhange, ua tena ku tu lunguluila mua Kristu ni tu kale tu makamba mê etu tua kexile tu jinguma, iú ua tu bhana o kikalalalu kia kubhanga kuila akuetu uâ a biluka makamba ma Kristu.

¹⁹ O hundu ietu ienhiʼii: Kuma Nzambi mua Kristu ua mu luulula o mundu ni muène, iú ua mu bhangesa kuila athu oso a kala makamba mê, sè kukuata-nâ konda ia ikuma iâ. Etu-phe Muène iú ua tu bhana o maka mê ma kuluulula athu nʼa kale makamba mê.

²⁰ Kala kiki, tua mu zuela bhabha mu dijina dia Kristu, kala muene Nzambi uala ku mi ambela mu makanu etu, kuila: Mu dijina dia Kristu, ehelenu Nzambi a mi bilule mu tunde mu kukala mu jinguma jê, a mi bhange mu makamba mê.

²¹ Kristu kia kexi, ka moneka kituxi, maji Nzambi ua mu tambuisa mbandu ku ituxi ietu, phala etu, mu kisangela ni Muène, tu tambule uetu mbandu mu kulûnga kua Nzambi.