II Kolindo 4 - O Mikanda Ikola

O maumvuama ma nzumbi mu itutu ia utuma

¹ Mukonda ia kiki, etu ki tu kala ni usudi, kuma o Nzambi, mu henda iê, muène ua tu bhana o kikalakaluʼiki.

² Imbamba ioso-phe ia kubhanga ni kusueka ni ioio ia jisonhi, tua i dila hunji. Ki tu bhange kudimuka, o maka ma Nzambi ki tu a lungulule mu mangonha. Inda tu bhanga jinga ima ia fuama o kidi, kiene kia bhekela o ku tu tumbula kuala enhoso, bhu pholo ia Nzambi.

³ Mukonda o ki kala Njimbu Iambote i tua mu kola ia futama uandanda, ia futama ngoho phala ió oso ala mù texika.

⁴ Ene a kambe kuxikana, kuma o nzambi iaiibha ia mundu iú ua bhake o ilunji iâ mua vundu. Muène ka ehela kumona o mukengeji ua a kiela, o mukengeji ió u tunda ku Njimbu Iambote ia fuma ia Kristu, muène o kidifua kia Nzambi kia kidi.

⁵ Kuma, etu ki tua di kola etu ene, maji tua kola Kristu Jezú kuma muene Ngana, o etuku tuala tu abhikʼenu mukonda dia Jezú.

⁶ Mbata o Nzambi ió, uoso ua ki ambe kuila: O mukengeji u muikine muʼavundu, muène ua bhangesa mukengeji ku tu muikina ku miẋima ietu. Mbe o ku tu bhekela mukengeji ua kuijiiʼoko kua fuma ia Nzambi, ia mu benha mu pholo ia Jezú Kristu.

⁷ O umvama uenhú-phe etu tuala na-u tuedi kala tu itutu ia mavu a hatu, phala kulondekeza kuila o nguzu i lenda ioso itunda kua Nzambi, ki ietu etu, kana.

⁸ A tu xina mbandu ni mbandu, maji ka tu tolola. Sai ithangana tu kala mu jiphata, maji ki tu kala ni kikote.

⁹ Nguma ji tu vula, maji ki tu kambe dikamba. Sai ni bhabha a tu kuama, maji ki tu jimi o mbutu.

¹⁰ Tualu kuambata jinga mu mukutu uetu ua kalunga o kufua kua Jezú, phale o muenhu ua Jezú ue u monekene mu mukutu uetu.

¹¹ Kuma etu kioso ki tuala mù laia, izuua ioso tuala bhu kibhidi kia kufua mukonda dia Jezú, phale o muenhu ua Jezú ue u monekene mu xitu ietu ia kinga o kufua.

¹² Kienhiki kalunga ka bhanga o kikalakalu kiê mo muetu, maji o muenhu-phe u bhanga o kikalakalu kiê mo muenu.

¹³ Mukonda-phe muẋima ua kuxikana uene umoxi, kala ki a ki soneka, exi: Eme nga xikana, kiene ki nga zuelela, etu uetu tua xikana, kiene uetu ki tua zuelela.

¹⁴ Kuma etu tua kʼijiia kuila o Nzambi ió uoso ua fukunuine Ngana Jezú, u tu fukununʼetu kumoxi ni Jezú, hé ua kà tu bheka kumoxi ni enu bhu pholo iê.

¹⁵ Kuma ima iene ioso iii ia bhitila mukonda dienu. Mu kienhiki o kiadi kia Nzambi ki kale mu kusambuka dingi ku athu avulu, o athu enhá na kale mu vudisa dingi o misambu ia kusakidila, mu kufumanesa Nzambi.

Hadi iabhebhuluka ia kithangana. Ima i moneka ku mesu, ni ioio ki i moneka

¹⁶ Mukonda dia kiki, ki tu kuata usudi. Né-mbe o mukutu uetu iú ua bhoxi uia ni kujila, mukutu uetu ua nzumbi-phe uia ni kukala dingi ua ubhe kizuua ni kizuua.

¹⁷ Kuma o hadi ietu iii i tua mu bhita na-iu iabhebhuluka, ia kithangana ngó, hinu i tu bhekela kuzediua kuavulu kinéne, kua beta ukota o hadi iii ndenge, kuxalela-ku ndú ku hadia ni hadia.

¹⁸ Mukonda etu ki tu kala mu suua ima ia moneka ku mesu, maji o ima ia kambe kumoneka. Kuma o ima ia moneka ku mesu i nanga ngó kathangana, maji o ima-phe ia kambe kumoneka, iene i xalela-ku.