II Kolindo 2 - O Mikanda Ikola

¹ Kuma mu kuxikana muene mu muemana. Mukonda ku mbandu iami nga solele kiki, kuma nguami ku mi sanga dingi ni ku mi kuatesa mukondo.

² Mbata se enu nga mi kuatesa mukondo, eme-muène nanhi u ngi kuatesa ngalasa? Oko enuʼenu muene ngó nga mu mi kuatesa kiá mukondo!

³ Kiene ki nga ki sonekena mu mukanda uenhó. Kuma eme ki nga mesenene kuia, anga a mi kuatesa mukondo kuala athu ió a tokalele kuila ene a ngi sanguluisa. Kuma eme nga mi dielela kuila kioso eme ki ngi kala ni kuzediua, o ngalasa iami i kala ngalasa ienu enu oso.

⁴ Kuma hadi ia ngi vudile kumoxi ni kikote kia muẋima, thembu i nga mi sonekenʼoio ni masoxi mavulu. Inda ki nga mi sonekena mu ku mi kuatesa mukondo, maji phala ku mʼijidisa o henda i nga mi kala na-iu kiavulu enu oso.

Uoso ua diela a mu loloka

⁵ Maji se sai-ku muthu ua mu kuatesa muthu uoso-uoso mukondo, ki eme a ngi kuatesa mukondo maji enu oso, mba-phe amoxi-moxi-ku mudienu. Nga mi sonekena kienʼiki phala ki ngi mi xine ni nguzu ia vulu.

⁶ O muenhó, koso kaxtiku kê ka mu bhana kiá akuâ avulu, ka mu soke.

⁷ Uila kiki, inda mu lunguluka kiá hé mu mu loloka, ni ku mu konda malamba, phala ka bhondalale ni mukondo uavulu kinéne u mu bhekela kikote.

⁸ Kienhiki, nga mi diondo, mu idikizienu ejiie kuma mu a mu kala ni henda.

⁹ Kuma kiene ue ki nga mi sonekena o mukanda uenhó. Mukonda ngandala ku mi lola, ni ngʼijiie mba mu ngi tumaka mu ima ioso i ngi mi tangela.

¹⁰ O uoso-phe mu mu loloka kimbamba, eme uami ngi mu loloka. Kuma eme uami, kioso ki ngi loloka,—se ngi loloka kimbamba,—ngi lolokela mukonda dienu bhu pholo ia Kristu.

¹¹ Eme ngi loloka, mbebhu Satana ka tu bhite bhu mbandu, kuma jindunge jê ki tu kamba ku jʼijiia.

O kulalama kua Phaulu bhu Tolouade

¹² Kioso ki nga bhixidile-phe mu mbonge ia Tolouade mu ku kola o Njimbu Iambote ia Kristu, nga muene kuila Ngana ua ngi jikuila njila phala kubhanga-bhu o kikalakalu.

¹³ Maji o kutululuka kua muẋima ki nga ku mono, mukonda Phangʼietu Tito nga kambele ku mu sanga-bhu. Kiene kia ngi bhekelele ku a lekela, anga ngʼa xia bhenhobho, hé ngi zauka ku Masedonia.

O kutambuila kikoue mua Kristu

¹⁴ Maji Ngana Nzambi, a tane-ku! Mokonda, mu kudiongeka kuetu ni Kristu, Nzambi uene mu ku tu endesa jinga mukuâ ni athu a a kutila ku mukalatata mu kubhana o kikoue kia Kristu. Mukuâ ni ki muanganena mu ididi ioso o dizumba dia maji a mbote, kiene ue Nzambi kia mu bhanga ni etu mbé Kristu a tene ku mu ijiia kuala oso.

¹⁵ Kuma etu tua di bhange tu dizumba dia mbote dia uasu-ua-dizumba Kristu dia mu bhakuila Nzambi, dí diala kudimuangena muʼaxaxe ka iá a bhuluka ni ió a texika.

¹⁶ Phala ió a texika, di kala dizumba diaiibha, di bhekela kalunga. Phala iá a bhuluka, di kala dizumba di nuha kiambote, di bhekela muenhu. Uila kiki, nanhi uala ni kutena kua ku bhanga o kikalakalu kiki?

¹⁷ Kuma etu ki tua sokela ni athu avulu, a bhinga kuila kia tanga o Maka ma Nzambi ela kala ala ngo mu kuta uenji uâ uosouoso. Maji etu-phe Nzambi muene ua tu katula, kiene kia tu bhekela kuila mù tanga o Maka mê, ki tu zuela ni mangonha bhu mesu mê, kuma tu akalakadi a Kristu.