II Jisobha 9 - O Mikanda Ikola

Jehu a mʼundu ku usobha ua Izalaiele, anga u jibha Jolá ni Jezabele

¹ Kieneʼokio-phe o polofeta Ilizeu uixana umoxi ku anʼa jipolofeta, hé u muʼambela, uixi: Di kute o phonda mu mbunda, u zangule o mudingi iú ua maji, u uambate bhu maku mé, nda uie bhu Lamote dia Ngiliiade:

² O ki a bhixila, koko, u tala kiambote bhuoso bhuala Jehu, monʼa Jozafate, monʼa Nisi, hé u bokona ni u mu balumune mu kaẋi ka jiphange jê, anga u bokonanê mu xilu,

³ hé u katula o mudingi ua maji, u mu lunduluila-na-u bhu thalʼa mútue, uixi: O jihova uambe kiki: Nga kʼundu ku usobha ua kutumina Izalaiele. Kieneʼokio-phe u jikula o dibhitu anga u lenga; kana kuimana.

⁴ Monʼa diiala, o polofeta ia munzangala, anga uia ku Lamote dia Ngiliiade.

⁵ O muene kioso kia bokona, ua sange o jikabhitangu joso ja kilômbo kia masoladi ja xikama mueneʼomo; anga uila kiki: Kabhitangu ngala ni tumaka tua ku ku tangela. Kuala Jehu: Nanhi mudietuʼetuʼoso? Kuala muene: Eʼmuene, kabhitangu.

⁶ Bhenoʼobho u balumuka hé u bokona mu xilu, anga u mu lunduluila o maji bhu thalʼa mutue uê, hé u mu ambela, uixi: O Jihova Nzambi ia Izalaiele uambe kiki: Nga ku undu ku usobha ua kutumina mundu uangene ua Ngana, kutumina Izalaiele.

⁷ O dibhata dioso dia ngana ié, Akabe, ua kà di jikinisa; mu kienʼiki eme ni ngi vutule o phonzo ia manhinga moso ma jiselevende jami, o jipolofeta, ni manhinga ma jiselevende joso ja Ngana, ma bhubhu ku lukuaku lua Jezabele.

⁸ Phala o dibhata dioso dia Akabe di jikinine; mukonda o mua Akabe, o minzangala ioso ia mala nga-nda ku i zubha-mu, kixi jingana kixi abhika mua Izalaiele.

⁹ Mukonda o inzu ia Akabe nga-nda ku i bhanga uila kia bhange o dibhata dia Jeloboamu, monʼa Nebate; mukuâ ni kia bhange o dibhata dia Bahasa monʼAhiia.

¹⁰ O jimbua jene ja-nda kua ka-dia Jezabele bhu ka kithungu ka mukáu ua Jizeleiele; ki kuà kala uoso u mu funda. Kia zubha o ku tanga kiki, u jikula o dibhitu anga u lenga.

¹¹ O Jehu kioso kia tundu ku kanga kuala o jiselevende ja ngana iê, a mu kumbulula, exi: Kiebhi? Ioso ialʼé muene kiambote? O dilaji didi uejile kokué, ihi kia mu bheka? Muene ua a vutuila, uixi: O muthu iú enu mua muʼijila kiambote ni uzuelelu uê.

¹² Maji-phe ene, exi: Makutu. Tuʼijidise ngó kioso kia ku ambela kindaúla, tua ku diondo. Muene-phe, uixi: Kiki ni kiki kia ngi tangela, kuila: Jihova uambe, kiki: Nga ku undu ku usobha ua kutumina Izalaiele.

¹³ O kievu kiki, a bhanga lusolo, muthu u zangula o kizuatu kiê, muthu u zangula o kizuatu kiê, anga a mu tela na-iu bhoxi diê bhu ditala dia beta o kudileka; hé a xika o mbungu, exi: Jehu muene o sobha.

Jehu u jibha Jolamu

¹⁴ Kienʼiki Jehu, monʼa Jozafate, monʼa Nisi, u ta kua Jolá kikutu kia ufe. Kieneʼokio Jolá, Lamote dia Ngiliiade ua i kondo ni muene ni Izalaiele ioso, mukonda dia Hazaiele, sobha ia Sídia.

¹⁵ Maji o sobha Jolá ua vutuka, ueza bhu Jizelele mu ku di tumba ku itote ia mu tota akua Sídia, kioso kia kexi mu kúlua ni Hazaiele, sobha ia Sídia. Jehu anga u amba, uixi: Hé kia mi uabhela, mu mbonge mumu ki mu tunde muthu, mba muʼomboloka muthu, nʼai mu ku dijimbula kima kiki ku Jizelele.

¹⁶ Jehu anga u sambela mu dikalu, u katuka hé uia ku Jizelele mbata kuene kua kexile sobha Jolá bhu xisa dia uhaxi; ni Akaziia ue, sobha ia Juda, ua kulumuka kueneʼoko mu kuhindula Jolá.

¹⁷ O kilanga-kanga, uala bhulu, kʼonzo ia matala bhu Jizelele, anga u mona o masoladi a Jehu, ala mu kuiza, u tanga, uixi: Nga mono masoladi. Kuala Jolá: Zangula muthu uejiia kusambela kabalu, u mu tume kuia mu kutakana-nâ, a ebhule, kuila: Kuma kua tululuka?

¹⁸ Anga muthu uejiia kusambela o kabalu uia mu ku takana ni Jehu, uixi: Sobha uambe kiki: Kuma kua tululuka? Kuala Jehu: O kutululuka eie u bhanga na-ku kima kiahi? Bhita ku dima diami kuku. O kilangakanga hé u kʼijidisa sobha, uixi: O mukunji ua bhixila kua ene, maji o kuvutuka, lémbue.

¹⁹ Anga a tuma-ku dingi ua mukuá; o muenʼiú ue kia bhixila kua ene, uixi: Sobha uedi: O kuma kua tululukʼe-iá? Kuala Jehu: Eie o kutululuka uala na-ku ni kima kiahi? Bhita ku dima diami kuku.

²⁰ O kilanga-kanga hé u kʼijidisa kua sobha, kuila: O iú ue ua bhixila kua ene, maji o kuvutuka, lémbue; o uendelu ua ió ua mu kuiza uedi kala o uendelu ua Jehu, monʼa Nisi, mukonda ua mu kuenda kala ua thathamana.

²¹ Bheneʼobho kuala Jolá: Ngi iudikidienu o dikalu. Anga a mu iudikila o dikalu diê. Anga ni muene Jolá, sobha ia Izalaiele, ni Akaziia, sobha ia Juda, hé a tunda, iú mu dikalu diê, iú mu dikalu diê, a muia mu takana ni Jehu, anga a mu sangela bhu kakiẋimbu ka mukáu ua Nabote, mukuá Jizelele.

²² Anga ki bhita, kiki: Kioso sobha Jolá kia mono Jehu, u mu ibhula uixi: Kuma kua tululuké, Jehu? Muene-phe, uixi: Kutululuka kuahi, se o undumbu ua mamʼenu Jezabele hanji ua jiji kiki ni mauanga mê ma vulu?

²³ Kieneʼokio-phe Jolá u lungulula o dikalu diê anga u lenga lusolo, u tangela Akaziia, uixi: Sai ufe, Akaziia.

²⁴ Maji o Jehu-phe, u nana o mufula uê ni nguzu ioso, uasa Jolá bhu maku aiadi, o musongo hé u mu bhita mu phumbulu, anga u di bhalela mu dikalu diê.

²⁵ Bheneʼobho Jehu uambela Bhidikale, Kabhitangu kê, uixi: Mu zangule, u mu texi mu kiẋimbu kia mukáu ua Nabote, mukua Jizelele; mbata, xinganeka kuila, kioso eme ki nga kexile mu kuia kumoxi nʼeie tua sambela ku jikabalu, ki tua kexi mu kaiela Akabe dia tatʼâ, Jihova ua tange kizueluʼiki kua muene, uixi:

²⁶ Ni kidi muene, se mazá mu kumbi dia ngoloxi eme ki ngi muene o manhinga ma Nabote ni manhinga ma tuana tuê, eme ue ki ngeju ku ku futila-kiu mu kiẋimbuʼiki kia mukáu, Jihova ua ki tange. Kala kiki-phe, mu zangule u mu texi mu kiẋimbu kienʼiki kia mukáu kala kia tange o kizuelu kia Jihova.

Jehu u jibha Akaziia

²⁷ O Akaziia, sobha ia Juda, kioso kia mono kiki; u lenga, u di tela njila ia Betehakane; maji-phe o Jehu uai ni ku mu kaiela, uixi; O iú ue mu kuamienu; anga a mu kuamena mu dikalu diê mu kubanda bhu kalundu ka Ngule, ka lulama ni Jibeleia. Anga u lengela ku Mejidu, u fuila koko.

²⁸ O abhikʼê hé a muʼambata mu dikalu, aia-nê mu Jeluzaleme, anga a mu funda mu mbila iê, bhu mbandu ia jitata jê, mu mbonge ia Davidi.

²⁹ O Akaziia muene, uandeka o kutumina mua Juda, mu muvu ua kakuinhi ni umoxi ua utuminu ua Jolá, monʼa Akabe.

O ufuilu ua Jezabele

³⁰ Jehú anga u bhixila mu Jizeleiele. O Jezabele kioso kia kʼivu, u di bongola o mesu, u iukisa kiambote o mútue uê, anga u kala bhu njanena mu kutala.

³¹ O kioso Jehu kia mu bokona bhu mabhitu a dizemba, muene uixi: Mbé o Nzidi, ua jibhile ngana iê, ua kexi ni kutululuka?

³² Jehu u bhetula o pholo, u tala bhu njanena, uixi; Nanhi uala ku mbandu iami eme? Nanhi? O ngolambole jiiadi mba jitatu, a tale kua muene.

³³ Bheneʼobho muene, uixi: Mu laudienu, eze bhoxi. Anga a mu laula bhulu hé uiza bhoxi; o manhinga mê a tula ku jikabalu ni ku mutôto ua phalelu ia inzu, muene anga u mu diota ni dikalu.

³⁴ Hé u bokona; o kioso kia zubha kiá o kúdia ni kúnua, uixi: O muhetu mukua phuluʼó ka mu iadienu phala mu mu funde, kuma monʼa sobha.

³⁵ Anga aia phala ku mu funda, maji ka mu sange, kuma a sange kiá ngoho o kibhala kia mútue, ni inama ni makanda a maku.

³⁶ Hé a vutuka, a mu tangela-kiu. Muene-phe, uixi: Kiki kiene o kizuelu kia Jihova, muene kia zuelela ku ukunji ua Elija, dia selevende iê, mukuaʼxi iengi, kuila: O mu kiẋimbu kia mukáu ua Jezelele muene jímbua mu ja kà dila o xitu ia Jezabele.

³⁷ O kimbi kia Jezabele kia kà kala mukuâ ni ditobe ku thandu dia mavu mu kiẋimbu kia mukáu ua Jizeleiele; kia kà bhonza ku muʼila, exi: Iú muene Jezabele.