II Jisobha 8 - O Mikanda Ikola

Muhatu ua mukua Suneme u vutuka kʼoxi iâ hé a mu vutuila o jimbongo jê

¹ Ilizeu hé u zuelela dingi o muhatu ió uavu monʼê ua mu phaphumuine kuʼalunga, uixi: Balumuka, uie, nʼeie ni akuaʼnzu ié, mu kunhungana kuoso ku u tena o kunhunganena, mukonda Jihova uexana nzala, nzala ia-nda kuiza mu ngongo mu sambuadi dia mivu.

² Muhatu muenʼió anga u balumuka, u bhanga muene kala kia tange o kizuelu kia muthu ua Nazambi; mbata uai muene, ni muene ni akuaʼnzu ié, mu kunhunganena mu ixi ia akua Fidíxia sambuadi dia mivu.

³ O kia zubha kubhita o sambuadi dia mivu, muhatu ió anga u vutuka mʼoxi ié, u tunda kʼoxi ia akua Fidíxia, hé uia mu kudikola kua sobha mukonda dia inzu iê ni jixi jê.

⁴ Tala, mu kithangana kieneʼokio ue, sobha ua kexi mu zuela ni Jeazí, mubhikʼa muthu ua Nzambi, uixi: Nga ku diondo, ngʼambele hanji o ikalakalu ioso ia makota iene mu kubhanga Ilizeu.

⁵ Anga ki kala muene kuila, kioso Jeazí kia mu tangela sobha kioso Ilizeu kia phaphumuna o muthu ua fuile kiá, tala, o muhatu muene ue uavu monʼê a mu bhele dingi o muenhu kuala Ilizeu, u tula, mu kudikola kua sobha mukonda dia inzu iê ni jixi jê; kuala Jeazí: Eie-phe, sobha, ngana iami, o muhatu muenʼiú, o monʼê ue a mu katula kuʼalunga kuala Ilizeu, muenʼiú!

⁶ Anga sobha uibhula dingi o muhetu muene, o muene hé u muʼambela-mu muene muoso; o sobha anga u katula o ngolambole imoxi, uixi: Bhangesa kuila ioso ia mutokalele a mu vutuile na-iu kumoxi ni mibhaku ioso ia mikau ié, tundé mu kizuua kia i xisa katé mu leluʼmu.

Hazaiele u jibha Benehadade

⁷ Kia bhiti imʼiii, Ilizeu uiza mu Damasku, kioso Benehadade, sobha ia Sídia kia mu kata; anga a mu tudila o hundu kuila o muthu ua Nzambi ueza kunu.

⁸ Kieneʼokio sobha uambela Hazaiele, uexi: Tambula ujitu bhu lukuaku lué, uie mu kudimona ni muthu ua Nzambi: nda uibhuile kua muene kua Jihova, uixi: Eme o ku uhaxi iú nga-nda ku disanza, inga kana?

⁹ Hazaiele-phe anga uia mu ku dimonanê muene, anga uambata ujitu bhu kuaku luê, ua ima ioso iambote iala mu Damasku, hé uambata-ku makuinhi auana a jikamelu, anga uiza, u muʼimanena, uixi: Monʼé, Benehadade, sobha ia Sídia, ua ngi tumu kokuʼé, uixi: O kuila eme ku uhaxi iú nga-nda kudisanza?

¹⁰ Ilizeu-phe u mu vutuila, uixi: Ndé u mu tangele, kuila: Ni kidi kiene, kanda kuiluka. Mukonda Jihova ua ngi londekesa kiá kuila ua-nda kúfua muene.

¹¹ Anga u mu ta muene o mesu, u mu tonginina katé sonhi ki ja mu kuata; o muthu ua Nzambi hé u dila.

¹² Kuala Hazaiele: Eie nganʼami, u didilaʼhi? Muene-phe, uixi: Mukonda o phulu i ua-nda bhanga anʼa Izalaiele nga ijiia kiá; o imbaka iâ ua-nda kua kà ioha mu túbhia, o minzangala iâ ia mala ua-nda kua kà a jibha ku xibhata, o tuana tuâ ua kà tu sanujuna, o ahetuʼâ a kà kala mu mikutu iiadi, ua-ndo kua kà a bazesa o mavumu.

¹³ Kuala Hazaiele: Mubhikʼé, ngana, kima kiahi, muene ua sokelʼé ngó ni ímbua, u tena kubhanga ima ia makotʼoio? O Ilizeu-phe, uixi: Jihova ua ngi londekeza na-kiu kiá, kuila eie ua-ndu kala u sobha ia Sídia.

¹⁴ Kieneʼokio u tunda kua Ilizeu, uiza kua ngana iê; o muene kia mu mono u muʼibhula, uixi: Kuambe? Ilizeu ua ku tangela kié? Muene uixi: Uedi kuma, ni kidi kiene ua-nda disanza.

¹⁵ O ki kuákie mu kizuua kia mukuá, muene u zangula divunga, u di betesa mu menha, anga uiza na-diu, u di vunga sobha mu pholo katé muene kiafu; Hazaiele anga u hinga ungana bhu kididi kiê.

O utuminu ua Jolamu mukua Juda

¹⁶ O mu muvu ua katanu, ua utuminu ua Jolá, monʼa Akabe, sobha ia Izalaiele, kioso hanji Jozafate kia mu tumina mua Juda, kiene kiandeka kutumina Jeholá, monʼa Jozafate, sobha ia Juda.

¹⁷ Muene ua kexile hanji mu kitala kia makuinhi a tatu a mivu ni iiadi, kioso kiandeka o kutumina, anga u tumina dinake dia mivu mu Jeluzaleme.

¹⁸ Hé uenda mu jinjila ja jisobha ja Izalaiele, kala ue kia bhanga jinga akua dibhata dia Akabe, kuma muene muhetuʼê a kexile-nê, monʼa Akabe; anga uia ni kubhanga ioso ia ibha ku mesuʼa Jihova.

¹⁹ Maji-phe, Jihova kʼandalele kusengulula Juda, mukonda dia jihenda jà kuatela Davidi, dia mubhikʼê, kala kia muʼambelele, kuila: Nga-nda ku kubhana kandeia ku anʼé, katé ku hádia ni hádia.

²⁰ Maji ue mu izuua iê, kiene kia lunguluka akua Idomo anga a dituna o ku a tumina kuala Juda, hé a di hingisila ue o sobha iâ.

²¹ Kieneʼokio-phe Jeholá u bhita, uia bhu Zaíle ni makalu moso kumoxi-nê; anga u balumuka mu usuku, hé u jibha akua Idomo oso a mu kexile mu jimbandu, kumoxi ni jikabhithangu ja makalu; o kifuẋi anga kiia mu jibalaka jâ.

²² Sumbala kiene, maji akua Idomo a xalela muene ni kubalukila o utuminu ua Juda katé mu kizuua kia lelu; kieneʼokio-phe ue Libina hé u baluka, bhu thembu iene imoxi.

²³ O ima dingi ia mukuá ia Jeholá ni ioso ia bhange, manhi ka i soneka mu divulu dia malunda a Juda?

²⁴ Jeholá anga u zeka ni jitata jê, hé a mu funda ni jitata jê mu mbonge ia Davidi, anga Akaziia dia monʼê u hinga bhu kididi kiê.

O utuminu ua Akaziia dia Juda

²⁵ Mu muvu ua kakuinhi ni kiiadi ua utuminu ua Jolá, monʼa Akabe, sobha ia Izalaiele, kiene Akaziia, monʼa Joholá, sobha ia Juda, kiandeka o kutumina.

²⁶ Kieneʼokio Akaziia uala ngó mu kitala kia makuinhi aiadi a mivu ni kiiadi, kioso kiandeka o kutumina, anga u tumina muvu umoxi mu Jeluzaleme. O dijina dia mamʼâ a muʼixana jinga exi, Ataliia, monʼa Omidi, sobha ia Izalaiele.

²⁷ Anga uenda mu jinjila ja dibhata dia Akabe, ku mesuʼa Jihova ua bhange muene kia ibha, mukuá ni dibhata dia Akabe, mbata muene ua kexile holome mu dibhata dia Akabe.

²⁸ Anga uia kumoxi ni Jolá, monʼa Akabe, bhu Lamote dia Ngiliiade, mu kúlua ita ni Hazaiele, sobha ia Sídia; akua Sídia anga a kuama Jolá.

²⁹ Kieneʼokio sobha Jolá anga u vutuka, uiza bhu Jizeleele mu ku di tumba ku italakanha ia mu bhange o akua Sídia bha Lama, kioso kia kexi mu kubhânga ni Hazaiele, sobha ia Sídia. Anga, Akaziia, monʼa Jeholá, sobha ia Juda, a kulumuka mu kuhindula Jolá, monʼa Akabe, bhu Jizeleele, kuma ua kexi ma kata.