II Jisobha 6 - O Mikanda Ikola

Ilizeu u tombokesa dikúua dia laukila mu menha

¹ Anʼa jipolofeta anga ambela Ilizeu, exi: Tala, o kididi mu tua tungu bhu pholo ié, kia tu tolela, kuma kia bhoto.

² Tua-nda kuia-phe katé bhu honga ia Njolodá ni tuiza-ku ni másoko a thungu, kala muthu mu dietu uiza-ku ni dísoko dimoxi, phala ni tu tungu o kididi ki tu tena o kukala. Kuala muene, uixi: Ndenu.

³ Umoxi mudiʼâ, uixi: Ki ku uabhele, ngana, o kuia kumoxi ni abhikʼé Muene anga u vutula, uixi: Eme ue ngiia.

⁴ Anga uia-nâ; o kia bhixila ku Njolodá, a kuata ku koka o miẋi ia thungu.

⁵ He ki bhita-phe kuila; umoxi mudiâ, kioso kia mu koka dísoko, o felu ia dikúua ia ngiobokela mu menha; muene há u dikola, uixi: Ai! Muadiʼami, tata! Kuma kúua dia kusobha.

⁶ Muthu ua Nzambi hé uibhula, uixi: Dia sonokena bhebhi? Muene anga u mu londokeza o kididi bhu dia laukila, muene hé u batula muxi, u u lauila bhobho, o felu ia dikúua anga i zeluka ku thandu dia menha.

⁷ Anga u muambela, uixi: Katula-iu kiá. Muene hé u sunununa o lukuaku luê, anga u i katula.

Ilizeu u zambula o ikutu ia sobha ia Sídia

⁸ Kieneʼokio o sobha ia Sídia u kuata kúlua ita ni Izalaiele; hé u ta kikutu ni abhikʼê, kuila: Bhanhá ni bhanhá bhene bhu nga-nda ku ta o kibhangu kiami.

⁹ Maji-phe o muthu ua Nzambi u tuma kuambela sobha ia Izalaiele, uixi: Di lange! Ku bhite bhu kididi kia nganjʼokio! Mukonda akua Sídia a kulumuka kueneʼoko.

¹⁰ Kienʼiki o sobha ia Izalaiele u di langa ku kididi kioso kia mu tangela o muthu ua Nzambi ni ku mu dimuna, hé u tumikisa-ku masoladi mê, anga u bhulaka kienʼiki, ki mu lumoxi ngó mba mu luiadi.

¹¹ O muxima ua sobha ia Sídia hé u teketa mu kumona kienʼiki, anga uixana abhikʼé, uixi: Enu nguenu ku ngʼijidisa mba nanhi mudietu uala ku mbandu ia sobha ia Izalaiele?

¹² Umoxi ku abhikʼé, uixi: Lémbue, sobha, ngana iami, tata! Maji o polofeta Ilizeu uala mu Izalaiele, muenʼiú, o sobha ia Izalaiele, u muʼijidisa katé ni maka u ua tela eie mu xilu dié dia kuzeka.

¹³ Muene-phe, uixi: Ndenu, mu tale bhuoso bhuala muene, phala eme ngi tume ku mu kuta ni kuiza-nê. Anga a muʼijidisa na-kiu, exi: Muene uala bhu Dotane.

¹⁴ Anga u tumikisa-ku jikabalu ni makalu ni kifuẋi kia dikota kia masoladi, ene anga eza ni usuku, a kondoloka o mbonge ioso.

¹⁵ O mubhika ua muthu ua Nzambi, kioso kia balumuka mu kimenemene, u tunda, u tala kuila mbonge a i kondoloka kuala kifuẋi kia dikota kia masoladi ni jikabalu ni makalu; bheneʼobho u dikola kua muadiʼê, uixi: Ai! Muadi, tata! Tua-nda kubhanga kiebhi?

¹⁶ Muene-phe, uixi: Ku kale ni uoma. Mukonda ala ni etu a beta kota, o ala ni ene ala ndenge.

¹⁷ Ilizeu hé u samba, uixi: Nga kudiondo, Jihova, mu jikule mesu phala a mone. Jihova anga u jikula o mesu a mubhika, muene hé u mona; u tula mulundu uoso uezala jikabalu ni makalu a túbhia ku jimbandu joso ja Ilizeu.

¹⁸ Mbata a muʼendela muene, Ilizeu ua sambe kua Ngana, uixi: Nga ku diondo, Ngana, athu iá a kuame ni ufofo. Anga a a kuama ni ufofo, kiene kia tange Ilizeu, kiene.

¹⁹ Bheneʼobho Ilizeu u a tangela, uixi: O njila mua i lueza, kuma iii ki iene o njila, o mbonge iii ue ki iene; ngi kaiedienu ngi mi bheke ku muthu uoso muala ku mu sota. Hé u a bheka mu Samádia.

²⁰ Anga ki bhita kiki: Kioso ene kia bhixila mu Samádia, Ilizeu, uixi: Eie Jihova, iá a jikule mesu phala a mone. O Jihova anga ua a jikula o mesu phala kumona, a tukumuka ala mu kaẋi ka mbonge ia Samádia.

²¹ O sobha ia Izalaiele kioso kia a mono, uambela Ilizeu, uixi: Ngʼa jibha kiá, ngʼa jibha kiá, Tatʼetu?

²² Muene-phe u vutula, uixi: Kuanda ku a jibha, kana. Manhi eie u xikina kujibha athu oso u u kuta, kioso ki uia ni xibhata ié ni mufula ué mu kubhânga? A bhekele jimbolo ni menha phala a die, a nue, a vutukile kua ngana iâ.

²³ Sobha anga u a bhangela kizokola kia dikota, hé a dia a nua; anga u a sulula, aia kua ngana iâ; tundé kieneʼokio mʼoxi ia Izalaiele ki mu bokona dingi masoladi a Sídia.

Mbonge ia Samádia a i konda, o mu kaii kê mu kala nzala ia kaka

²⁴ Kia bhiti ima ioso iii, Benehadade, sobha ia Sídia, u bhongolola o kifuẋi kiê kioso kia masoladi, hé u banda, u konda o mbonge ia Samádia.

²⁵ Mu Samádia anga mu kala nzala ia kaka, mukonda masoladi a i kondoloka mu izuua ia vulu, katé kia bhixila bhu ditala dia kusumbisa mútue ua bulu mu makuinhi-nake a itadi ia phalata, o mbandu ia kauana ia dibhinga dia tuji tua diembe hé i ta itadi itanu ia phalata.

²⁶ Anga ki bhita kuma kioso sobha kia mu bhita ni kuenda ku thandu dia lumbu, muhatu umoxi u mu handekela, uixi: Eie sobha, ngana iami, tata, ngi bande kunu!

²⁷ Muene-phe u muʼambela, uixi: Se Jihova u kamba ku ku bânda, eme nganda ku ku bandela bhebhi? Bhu kienda kia kuvundila o jimbutu, inga bhu dizanga dia kukamena o vinhu?

²⁸ Sobha hé u mu kumbulula dingi, uixi: Ihi iene i uala na-iu? Muene uixi: Muhatu iú ua ngʼambela, uixi: Beka monʼé, phala tu mu die lelu, o mungu, tu die ue monʼami.

²⁹ Etu-phe tua lambe monʼami, etu tua mu di; maji-phe mu kizuua kia kamukuá ki ngi muʼila: Beka monʼé phala tu mu die, muene monʼé ua mu suekʼé.

³⁰ Anga-phe ki bhita kiki, kuila, sobha kioso kievu o maka a muhatu muenʼíú, u tandula o izuatu iê, hé uia ni kuenda ku lumbu; o mundu hé a mu mona muene kuila moxi ua zuata kidinhaji ku thandu dia jixitu jê.

³¹ Hé uila, uixi: Nzambi a ngi bhange kienʼiki mu luiadi, se lelu mútue ua Ilizeu, monʼa Safate, u subhuka ku thandu diê.

³² Kieneʼokio-phe Ilizeu ua kexidié monzo iê mua xikama ni adiakimi a xikama-nê ue kumoxi. Sobha anga u tuma muthu ku mu tuamenena; maji kioso ngó o phunga kiluua i bhixila kua muene, muene uambela kiá o adiakimi, uixi: Mua ki mono kioso monʼa kimbokoto kia tumu ku ngi batula o mútue? Talenu, kioso o phunga ki ia-nda kuiza, mu jikidienu dibhitu, mu mu xinjikila bhu kanga ni dibhitu diene; manhi o mixindu ia inama ia ngana iê, ki ieneʼoio, iala mu kuiza kuema diê?

³³ Kioso muene hanhi kiʼala mu kuzuela-nâ, tala, o phunga i tula, iala mu ku tuluka kua muene; hé uila, uixi: Tala, o kuiibha kuku kua tundu kua Jihova, kima kiahi-phe dingi kia kinga kua muene?