II Jisobha 5 - O Mikanda Ikola

Naamane a mu saka dibhute

¹ O Naamane, muadiakime ua Kifuẋi kia masoladi a Sídia, ua kexile muthu ua dikota bhu pholo ia ngana iê; o muene a mu xila kiavulu; mukonda o kokué kuene Jihova kua bhuluila akua Sídia. O muthu muenʼiú hé u kala kindanda, maji mukua dibhute.

² Masoladi a Sídia hé a tunda mu kúlua ni akua ixi ia Izalaiele, hé a kuta-ku monʼa muhatu, a mu ambata, hé u kala mu kukalakalela muhatuʼa Naamane.

³ O muenʼiú hé uambela ngana iê ia muhetu, uixi: Tamanu ngana iami uele mu ku di mona ni polofeta iala mu Samádia; muene ueje ku mu saka ku dibhute diê.

⁴ Naamane bheneʼobho kioso kia kʼivu u bokona, hé u ki tangela ngana iê, uixi: Kienʼiki ni kienʼiki, kia zuela monʼa kilumba ua tokala mu ixi ia Izalaiele.

⁵ Bheneʼobho, o sobha ia Sídia u zuela, uixi: Ndoko, enda, eme nga-nda ku tumikisa mukanda kua sobha ia Izalaiele. Muene hé uia; uambata bhu ʼkuaku luê kuinhi dia talendu ja phalata, hulukaji jisamanu ja xikulu ja ulu, ni nhi dia izuatu ia fesa.

⁶ Anga uia ni mukanda kua sobha ia Izalaiele, uambe kiki: Ku pholo, kia-nda kubhiẋila o mukanda iú kokué, tuma ku kʼijiia kuila, eme nga ku tumikisa Naamane, dia mubhikʼami, phala eie u mu sake ku dibhute diê.

⁷ Hé ki bhita-phe kuila, o sobha ia Izalaiele kioso kia tange o mukanda, ua tandula o izuatu iê, uixi: Eme kífua ngala ngi Nzambi, ni ngi tene kufuisa mba kubhana muenhu, kí kia bhekesa iú ku tumikisa muthu kokuami, phala eme ngi mu sake ku dibhute diê? Talenu-kiu muene kiambote, nga mi diondo, mu ki mone, kuma muene ua-lu sota ndunge ia ku bhanga jimvunda nʼeme.

⁸ Anga ki bhita-phe kuila, o Ilizeu, muthu ua Nzambi, kioso kievu kuila o sobha ia Izalaiele ua tandula o izuatu iê, u tuma ku ambela sobha, uixi: Eie ua tanduilʼahi o izuatu iê? Muʼambule, eze kokuʼami, phala a kʼijiie kuila saimu plofeta mu Izalaiele.

⁹ Naamane-phe hé uiza ni jikabalu jê, ni dikalu diê, hé uimana bhu muelu ua inzu ia Ilizeu.

¹⁰ Bheneʼobho Ilizeu ua mu tumikisa phunga ku mu tangela, kuila: Ndé, ua kà di sukule lusambuadi mu Njolodá, nda o xitu ié ia kà ku vutuluke dingi, nda ua kà di sanze.

¹¹ Maji Naamane njinda ia vulu i mu kuata, anga uié, ni kuila, uixi: Tala, eme nga xinganekene kuila: Muene uanda ku tunda, hé uiza, uimana, anga u hingila o dijina dia Jihova Nzambi iê, hé u bhitisa o lukuaku luê bhu kididi, o mukua dibhute anga uiluka.

¹² Mbé ni Abana ni Falafala, o jingiji ja Damasku, ki ja beta kota, o menha oso a Izalaiele ndenge? Manhi eme ki ngeji kutena ku di sukula-mu ni ngi di-sanze? Anga u lunguluka, uia ni njinda.

¹³ Bheneʼobho-phe abhikʼé a mu zukama, a mu zuelela, exi: Tatʼetu, tata! Se o polofeta ua kuambelele kubhanga kima kia dikota manhi eie kuejʼu ki bhanga? Kuambe dingi ua ku tangelé ngoho, uixi: Di sukule nda u di sanze.

¹⁴ O ki evu kiki, u tuluka mu dikalu u boba lusambuadi mu Njolodá kala kia tange o kizuelu kia muthu ua Nzambi, o xitu iê anga i vutuluka, ila kala xitu ia kamona ka ndenge, hé u di sanza.

¹⁵ Bheneʼobho u vutuka kua muthu ua Nzambi, ni muene ni oso a kexile mu kuenda-nâ, hé uiza, uimana bhu pholo iê, uixi: Tala, nga kʼijiia kiá kuila mungongo ioso kana-mu Nzambi, kikale ngó mua Izalaiele, kuabhu! O kindala-phe, nga ku diondo, tambula ujitu kua mubhikʼé.

¹⁶ Maji-phe muene, uixi: Jihova a laie, uavu o pholo ie bhu ngala, kuma o ujitu ué-eie ki nga-nda ku u tambula. Hé u mu jijidika ku u tambula, maji muene-phe nguâ-ié.

¹⁷ Naamane he u zuela, uixi: Kuabhu phe! Kikale kala ki ua ki mesena eie. Sumbala kiene, maji-phe o mubhikʼé muenʼiú a mu bhane kiá ngoho dibhûbhu dia mavu a tena kimbamba kia mula jiiadi; mukonda o mubhikʼé iú ki mungu dingi a bhakuila sata ia kubhakula ni túbhia mba sata ioso-ioso ku jinzambi jengi, ki kale ngó kua Jihova.

¹⁸ Mu kienʼiki Jihova a lolokele-ku mubhikʼé; kioso o ngana iami sobha iami kiʼaia mʼonzo ia Dimone mu kubheza, o muene hé u xamenena ku lukuaku luami, eme ue hé ki ngi bhinga o kufukama mʼonzo ia Dimone, emephe kioso ki ngi fukama kienʼiki mʼonzo ia Dimone, kienʼiki Jihova a ngi lolokekiu, eme ngi mubhikʼê.

¹⁹ Muene anga u mu ambela, uixi: Ndé ni muxima ua tululuka. Naamane hé u sondoloka kiá kadikanga.

Jeazí dibhute di mu kuata

²⁰ Bhneʼobho Jeazí, mubhikʼa Ilizeu, muthu ua Nzambi, uixi: Tala, ngana iami ua fudisa kuila ku lukuaku lua Naamane iú, dia mukua Sídia u bhanaku kama ku ima iejile na-iu; nguami tata! Nganda ku mu kaiela ni lusolo, hé ngi tambula-ku kama koso-koso.

²¹ Jeazí hé uia mu ku kuata Naamane; o Naamane-phe kia mu mono uala mu kuiza ni ku mu kaiela ni makidikidi, u tuka mu dikalu mu kuia ku mu kauidila hé u mu ibhula, uixi: Kiebhi? Ioso muene ialʼê kiambote?

²² Muene-phe, uixi: Ioso ialʼê muene kiambote. Ngana iami muene ua ngi tumu ku ku tangela, kuila: Tala-ze, kindalʼki muene kueza minzangala iiadi anʼa jipolofeta, a tundu ku mulundu ua Ifalaimi, a ngʼendela; eie-phe a bhane talendu imoxi ia phalata ni izuatu iiadi.

²³ Naamane-phe, uixi: A ku katuile talendu jiiadi. Hé u mu jijidika muene, anga u kuta jitalendu jiiadi ja phalata mu nzeke jiiadi kumoxi ni izuatu iiadi, hé u i tuika abhikʼê kiiadi, ene anga a muʼ ambatela na-iu, o muene iú kaiela kuema.

²⁴ O muene-phe kia bhixila bhu kididi kioso kia tokala, bhu kamulundu, u ji tambula bhu maku mâ anga u ji bhaka mʼonzo. Athu ió anga u a xinjikila, ene hé a vutuka aia kokuʼâ.

²⁵ Muene-phe hé uiza, u bokona, hé uimana bhu pholo ia ngana iê. Kuala Ilizeu: Eie ua mu tunda kué Jeazí? Muene uixi: Mubhikʼê, ngana kʼai kuma kuoso-kuoso.

²⁶ Maji muene phe ua mu ambela, uixi: Manhi o muxima uami ki uaii kumoxi nʼeie, kioso o muthu ió kia lunguluka ku thanduʼa dikalu diê kua kexile, iú uaii ku ku kauidila? Mbé kienʼiki kima phala eie kutambula phalata, ni kutambula izuuatu, ni midívua, ni mivide, ni jimbudi, ni jingombe, ni abhika a mala ni abhika a ahatu?

²⁷ Kala kiki, o dibhute dia Naamane dia-nda ku ku naminina eie ni mbutu ié katé ku hádia, ni hádia. Hé u tunda kiá ni dibhute bhu pholo ia polofeta, uazele ni muene phé kala neve.