II Jisobha 4 - O Mikanda Ikola

Ilizeu u sokolola maji a mutudi

¹ Anga muhatu umoxi, ku ahetu a anʼa jipolofeta, u dikola kua Ilizeu, uixi: Muadi uami, mubhikʼé, ngana, uafu. Eie-phe ua kʼijiia kuila o mubhikʼé ua kexile mukua uoma ua Nzambi; o kiki-phe mukua dikongo ueza mu ku ngʼambata o anʼami kiiadi a mala, phala kukala abhikʼê.

² Kuala Ilizeu: Eme-phe ngi ku bhanga kiebhi? Ngi tangele mba mʼonzo uala-mu ni kima kiahi. Muene uixi: Kahetu ké, ngana, mʼonzo kala-mu ni kima, kikale ngó botija imoxi ia maji, kuabhu!

³ Bheneʼobho-phe muene, uixi: Ndé ua kà bhinge itabhu ia kusobha ku akuenu oso u ua tungu-nâ, itabhu ia itutu ia hatu, ki i kale iòfele.

⁴ O ki u zubha-phe kusobha o itabhu, bokona mʼonzo, u di jikile momo nʼeie ni anʼé, uende ni kulunduluila o maji mu itabhu ioso ieneʼoio; o kitabhu kioso kiezala, u di tudilila-na-kiu.

⁵ Anga u sondoloka bhu pholo ia muene, hé uia u di jikila mʼonzo ni muene ni anʼê; o anʼê aia ni ku mu bhekela o itabhu, o muene uia ni ku izalesa.

⁶ Anga ki bhita-phe kuila, kioso o itabhu ioso ki iezala kiá, uambela monʼê, uixi: Ngi bhekele-ku dingi kitabhu kimoxi. Maji muene-phe ua muʼambela, uixi: Kana-ku dingi kitabhu kioso-kioso. Kuabhu-phe, o maji ue a batuka kubhubha.

⁷ Bheneʼobho phe, muene ueza mu ki tangela o muthu ua Nzambi; o muene-phe uixi: Ndé kà sumbise o maji, u fute o dikongo dié; o kioso ki subhuka-bhu, laielenu kieneʼokio, nʼeie ni anʼé.

Muhetu ua mukua Suneme ni mon ʼê

⁸ Anga ki bhita ue kuila, kizuua kimoxi, Ilizeu uia mu Suneme; o mueneʼomo mua kexile muhatu umoxi ua mvuama; o mueneʼiú anga u mu jijila kúdia hanji mbolo; anga uia ni kuila o kioso kia bhita momo, uia hanji mueneʼomo mu kúdia o mbolo.

⁹ Muene anga uambela munumiʼê, uixi: Eme nga mono kuila o muthu iú uene mu kubhita mu bhata dietu, muthu uangene ua Nzambi.

¹⁰ Tu mu tungile-phe kanzu kòfele ku thandu dia lumbu, o mueneʼomo tu mu tele-mu hama imoxi, ni meza, ni kialu, ni kandeia; ni tuʼie ni kuila: O kioso muene kieza kokuetu, uié mueneʼomo.

¹¹ Kizuua kimoxi anga uiza, hé u sondolokela mu kanzu mueneʼomo, hé u zeka momo.

¹² Anga u tangela Jeazí dia mubhikʼê, uexi: Muhetu iú ua mukua Suneme muʼixane. O kia muʼixana, muene-phe ueza iú uemana bhu pholo iê.

¹³ Mukonda ua muʼambelele, kuila: Mu tangele, uixi: Tala, eie uene mu ku tu bhanga mbote ia ndumba; o kiki etu-phe tu ku bhangela kima kiahi? O kuila uala ni kima ki bhinga tu ku zuelela kua sobha, mba ku muadiakime ua kilombo kia masoladi? Muene iú ua vutula, uixi: Eme nga tungu mu kaẋi ka mundu uami.

¹⁴ Polofeta-phe, uixi: Abha-phe, tu mu bhangela kima kiahi? Kuala Jeazí: Tala, muene kala ni mona, o muadi uê ua kuka kiá.

¹⁵ Polofeta-phe, uixi: Muʼixane. O kia muʼixana, muene ueza iú uemana bhu muelu.

¹⁶ Kuala, Ilizeu: Bhu kithangana kia tokala, kia kà bhita o muvu, ku izuua ia muenhu, eie ua kà bhubhala mona ua diiala. O muene-phe, uixi: Kana, ngana iami, tata! Muthu ua Nzambi, o mubhikʼê ua muhatu ku mu tele makutu.

¹⁷ Anga o muhatu uimita, u vuala monʼa diiala, bhu kithangana kia tokala, ku izuua ia muenhu, kioso kia tenesa muvu, kala kia mu tangelele Ilizeu.

¹⁸ O mona kioso kia kulu kiá, kizuua kimoxi anga u tunda uia kua tatʼâ uala ni akua kumuna ku mábhia.

¹⁹ Anga uambela tatʼâ, uixi: Uaué, o mútue uami! Uaué, o mútue uami! Muene uambela munzangala umoxi, uixi: Muʼambate; uie-nê kua manhʼâ.

²⁰ Muene hé u mu zangula, u muʼambata kua manhʼâ. Anga u kala ku jiphuna katé mu kumbi dia mediia, anga u fua.

²¹ Muene anga u banda-nê u mu zekesa ku hama ia muthu ua Nzambi, hé u tunda, u mu jikila momo.

²² Hé uixana muadi uê, u muʼambela, uixi: Ngi tumikise kindala, mubhika umoxi ni bulu ia mukaji, ngi lenge kua muthu ua Nzambi, nda ngi vutuke kindala.

²³ Muene-phe, uixi: Eie u ila-hi lelu kua muene? Ki bhu mbeji ia thethama, ki bhu kumbi dia sabhalu. Muhetu-phe, uixi: Ki kʼidi kima. Ima ioso ialʼé muene kiambote.

²⁴ Anga u zuika dikombola ku bulu, uambela mubhikʼê, uixi: Ndoko, endesa na-iu kiá, o ki uia mu njila kuimane, kikale eme ngi ku tangela-kiu.

²⁵ Muene anga u katuka-phe, hé uiza kua muthu ua Nzambi, ku mulundu ua Kalamelu. Anga ki bhita kuila, kioso kia mu muena hanji mu kanga kuala o muthu ua Nzambi, uambela Jeazí dia mulekʼiê, uixi: Muhetu ua mukua Suneme, iuná.

²⁶ Kindala-phe eie lenga u mu kauidile, uixi: Eie uala kiambote? O muadi uê uala kiambote? O monʼê ue uala kiambote? Muene-phe u vutula uixi: Tualʼetu kiambote muene.

²⁷ O kia bhiẋila-phe kua muthu ua Nzambi, ku mulundu, u mu kuata mu inama; maji Jeazí ua bhixila phala ku mu sutununa; o muthu ua Nzambi phe, uixi: Muehe, mukonda o muenhu uê mʼoxi ua mu lulu ni dilamba, Jihova phe iu ua ngi suekela-na-kiu, ka ngi tukuluila-kiu luua.

²⁸ Kuala muhatu, uixi: Eie ngana iami, eme nga ku bhingi mona? Eme ki ngi kuambela-kiu, ngixi: kana ku ngi xomba?

²⁹ Anga muene uambela Jeazí, uixi: Di kute bhu kinhonga, uzangule o mbangala iami, u katuke; se u sanga muthu, kana ku mu menekena; se bhu kala muthu u ku menekena eie, eie kana ku muʼitaia; uia muene hé o kamona u mu tula o mbangala iami mu pholo iê.

³⁰ Maji-phe o manhʼâ kamona, uixi: Ki kola, Ngana, o muenhu ué u laie, kuma eme ki nga-nda ku ku xisa bhabha. Muene anga u balumuka, hé u kaiela o muhatu.

³¹ O Jeazí-phe ua a tuamenena kiá ku pholo iâ, u tula o mbangala mu pholo ia kamona; maji o kamona ka lémbua o kubhana mbimbi mba ku di zambesa; hé u vutuka mu kutakana ni Ilizeu, phala ku muʼambela kuila: O mona ka phaphumuka.

³² O Ilizeu kioso kia bhixila monzuʼomo, u tala mona iú uafu, ua zeka ku hama ié, suualalá!

³³ Bheneʼobho, muene anga u bokona, u di jikila mueneʼomo, anga u samba kua Jihova.

³⁴ Hé u banda ku hama, anga u zeka ku thandu dia kamona, o kia te dikanu diê ku dikanu dia kamona, ni mesuʼê ku mesu a kamona, ni makuʼê ku maku a kamona, u di zala ku thandu diê; anga o xitu ia kamona i tema.

³⁵ Hé u tuluka ku hama, u kuata ku ngungumba mʼonzo mueneʼomo, uia thunda, uiza luiji, uia thunda uiza luiji; anga u banda dingi ku hama, u di zala ku thandu dia kamona; kieneʼokio kamona u ta ngexexe mu lusambuadi, anga u tona o mesu.

³⁶ Bheneʼobho polofeta uixana Jeazí, uixi: Muhetu iú ua mukua Suname, muʼixane. Muene anga u muʼixana, hé uiza kua muene. Anga u muʼambela uixi: Monʼé iú, mu tambule.

³⁷ Muene anga u bokona, u di takuila bhu inama ia polofeta, u mbolomoka mu mavu, anga u zangula monʼê, u tunda.

O kúfua kua kexile m ʼombia a ku katula-mu

³⁸ Kioso Ilizeu kia vutuka ueza ku Jidingale. O mu ixi ieneʼoio mua kexile nzala; kioso anʼa jipolofeta kia xikama bhu pholo iê, muene uambela mubhikʼê, uixi: O ímbia ia dikota, ta na-iu bhu jiku u bhange muzonge ua izàza phala anʼa jipolofeta.

³⁹ Kiene ʼokio-phe, umoxi u tunda, uia ku mukáu mu ku kanza izàza, u sanga-ku lumbômbo lua muxitu, u kanza o máfue mê, hé uizalesa o homba iê, anga uiza u ma batuijila mʼombia ia muzonge, kuma ka mʼejidile.

⁴⁰ Anga aia ni kutombuela athu phala kúdia. Hé ki bhita-phe kuila, athu kia di ku muzonge ueneʼó, a dikola, exi: Muthu ua Nzambi, tata! Mʼombia muala kalunga! Anga a lémbua o kudia,

⁴¹ Maji muene-phe, uixi: Ngi bhekedienu-ku, fuba. Hé u i kuua mʼombia, uixi: Tombolenu o kúdia, phala athu a die. Kuabhu-phe; mu imbia ki mu kexile dingi kima kioso-kioso kia ibha.

Makuinhi aiadi a mbolo ekutisa hama ia muthu

⁴² Anga kuiza muthu ua tundu ku Balesalixa, anga uiza kua muthu ua Nzambi mu kubheka jimbolo ja mutomo, makuinhi aiadi a mbolo ja sevada, ni mítue ia uisu hanji mu isaxi iê. Ilizeu uixi: Bhana o mundu phala a die.

⁴³ Kuala mubhikʼê: O hama ia muthu, ngʼa tela kiebhi kudiʼuku? Maji muene-phe, uixi: Bhana-ku o mundu phala a die; mukonda Jihova uambe kiki: Anda kúdia hé a lémbua.

⁴⁴ Kieneʼokio-phe u a tudila-na-ju, ádia hé ji subhuka, kala kia tange o kizuelu kia Jihova.