II Jisobha 3 - O Mikanda Ikola

O utuminu ua sobha Jolá mua Izalaiele

¹ O Jolá monʼa Akabe anga uandeka o kutumina Izalaiele mu Samádia, mu muvu ua kakuinhi ni nake ua utuminu ua Jozafate, sobha ia Juda; anga u tumina kuinhi dia mivu ni kiiadi.

² Anga u bhanga ima ia ibhila Jihova; maji ka soko ni tatʼâ, mba u soka ni mamʼâ; mukonda o kiteka kia Bahale kia iudikile tatʼâ, o muene ua ki katula.

³ Ní kienhokio, hanji ua di bundile ku ituxi ia Jelubouamu, monʼa Nebate, ua bhangesele Izalaiele kuta ituxi; o ituxi ka i eha.

Ilizeu u zambula kuila Mouabhi a-nda ku mu tolola

⁴ Kieneʼokio Meza, sobha ia akua Mouabhi, ua kexile muvi a ibhaku, ua kexile mu kufuta hamʼa midi ia tumbudi ni hama ia ilumbe kumoxi ni kindemba kiê, kua sobha ia Izalaiele.

⁵ Anga kibhita-phe kuila, kioso kia fu Akabe, sobha ia akua Mouabhi ua bilukila sobha ia Izalaiele.

⁶ Kiene kia bhangesa Jolá ku tunda mu kithangana kieneʼokio mu Samádia iú ua talela kiambote mu Izalaiele ioso.

⁷ Iú uai, iú ua tumu kutangela Jozafate sobha ia Juda, uixi: O sobha ia Mouabhi ua ngi lungulukila; eie-phe uia nʼeme ku ita mu kúlua ni akua Mouabhi? O muene-phe, uixi: Nga-nda kubanda. Kioso ki uala eie, eme kiene ki nga-ndu kala; o mundu uami u kala kala kiala o mundu ué, o tubalu tuami kala kiala o tubalu tué.

⁸ Muene-phe, uixi: Tu bandela njila iebhi? Kuala Jozafate: Tu ila mu njila ia kikangalakata kia Idomo.

⁹ Ni sobha ia Izalaiele ni sobha ia Juda ni sobha ia Idomo anga a katuka; ai ni kuenda ni kukondoloka, o kiende sambuadi dia kizuua, menha a kúnua phala o kifuẋi ni ibhaku, ia mu a kaiela, kʼa moneka.

¹⁰ Bhenhobho sobha ia Izalaiele u di kumuna, uixi: Aué! Kífua Jihova uexana jisobha jitatu jiii phala ku a bhakula bhu maku ma akua Mouabhi!

¹¹ Maji Jozafate uebhula, uixi: O bhabha Kana-bhu polofeta ia Nzambi ni tuʼibhuila Jihova kua muene? Bhenhobho ku abhikʼa sobha ia Izalaiele, ku kala umoxi u vutula, uixi: Uala bhabha Ilizeu, monʼa Safate, ua kexi mu kulunduluila o menha ku makuʼa Elija.

¹² Jozafate uamba, uixi: O kizuelu kia Jihova uala na-kiu muene. Bhenhobho ni sobha ia Izalaiele, ni Jozafate, ni sobha ia Idomo a kulumuka kua muene.

¹³ Maji Ilizeu uambela sobha ia Izalaiele, uixi: Eme ngala ni kima kiahi nʼeie? Ndé ku jipolofeta ja tatʼenu ni ku jipolofeta ja mamʼenu. Maji-phe o sobha ia Izalaiele u vutula, uixi: Kanʼé, mukonda o Nzambi uexana o jisobha jitatu jiji phala ku ji bhakula bhu maku ma akua Mouabhi.

¹⁴ Anga Ilizeu uamba, uixi: Jihova dia Ifuxi a laie, uavu o pholo iê bhu ngala, kuila se eme ki ngi kexile mu ku bhana ujitu kua Jozafate sobha ia Juda, uala bhabha, eie hinu ki ngeji ku ku suua, mba ngi ku tonginina ngó.

¹⁵ Uila kiki, ngi bhekedienu Kixikilu. Anga ki bhita-phe kuila, o muene kioso kia xiki ku kixikilu, lukuaku lua Jihova lueza muene ku thandu diê.

¹⁶ Anga u zuela, uixi: Jihova uambe kiki: Mu honga mumu bhangenu-mu makungu a vulu.

¹⁷ Mukonda Jihova uambe kiki: Ki muanda ku mona kitembu, ki mua-nda kumona mvula; maji-phe o mu honga mumu mua-nda kuizala ni menha u mua-nda kunua enu ni ibhaku ienu ni ima ienu ioso.

¹⁸ O kik-phe hanji ki kima ku mesu ma Nzambi; kuma uanda ku mi bhakuila ue akua Mouabhi bhu maku menu.

¹⁹ O jimbonge joso ja nguzu mua-nduʼjinemeka, kumoxi ni jimbonge joso jʼòsole; o miẋi ioso iambote mua kà i koka, o ixima ioso ia menha mua kà i lamba, o mábhia oso a mbote a idima mua kà a zanga-zanga ni matadi.

²⁰ Anga ki bhita-phe kuila, kutula mu kimenemene, kioso kia mu bhakula o mubhaku ua makúdia, tala, o menha iá ejiia mu njila ia Idomo; anga ixi ioso izala ni menha.

Akua Mouabhi a a tolola

²¹ Akua Mouabhi oso kioso kievu kuila o jisobha ja bande mu kúlua-nâ, a bhongolola ene oso a tenene kiá o kudikuta o phonda, tundé ku mona ndenge katé ku muadiakimi anga a a ta mu jimbambe ja ixi iâ.

²² O kia balumuka mu kimenemene, mitengeji ia dikumbi dia mu tunda ia tula ku menha, akua Mouabhi a mono ku pholo iâ, o menha ma kusuka kala manhinga.

²³ Anga a zuela, exi: Iá, manhinga muene; nga fika o jisobha a di jikinisa ku xibhata ia a di jibha-jibha ene mudiâ! Ndokuenu-phe! O mbole iii kiabhuʼoio, akua Mouabhi!

²⁴ Maji-phe, kioso ene kia bhixila bhu kilombo kia akua Izalaiele, anʼa Izalaiele a balumuka, anga a kuama akua Mouabhi, ene-phe a biluka ni kulenga bhu pholo iâ. Akua Izalaiele-phe anga aia ni ku a kaiela muene katé mʼoxi iâ Mouabhi, ni mueneʼomo hanji muene a a kuamena-mu.

²⁵ Anga a sengulula o jimbonge; kala muthu u takula ditadi diê mu kuzanga o mábhia ma mbote ma idima hé a ma vumbika, o ixima ia menha a i lamba, o miẋi ioso iambote a i koka, katé-phe ngó kia bhixila mu Kidihalesete matadi a ma xisa, maji akua jibalafunda a mu kondo ia a mu kuama ue.

²⁶ Maji sobha ia Mouabhi, kioso kia mono kuila o mvunda ku mbandu iê ki ia mu kuenda kiambote, ua zangula hama sambuadi ia mala a fomeka jixibhata, phala ku di sunga mu ku takana ni sobha ia Idomo, maji a lémbua.

²⁷ Bheneʼobho-phe u zangula monʼê ua phande-kumbi, muene ueji kuhinga ungana bhu kididi kiê, anga u mu satela ku thanduʼa lumbu; mua Izalaiele anga mu kala njinda ia vulu; kienʼiki akua Izalaiele a mu xa, a vutuka kʼoxi iâ.