II Jisobha 21 - O Mikanda Ikola

O kubhuma kua Manasa ni ikusu ia Nzambi

¹ O Manasa kioso ki andeka o kutumina ua kexi mu kitala kia kuinhi dia muvu ni kiiadi, iú ua tumina mu Jeluzaleme makuinhi a tanu a mivu ni kitanu; o dijina dia mamʼâ Hefeziba.

² Iu ua bhanga jinga ima ia ibha ku mesu ma Jihova, kala kiene o maufusa oso a matumbu, a a kaiesa kuala Jihova bhu pholo ia anʼa Izalaiele mu jixi ja mautuminu mâ.

³ Mbata ua tona dingi o kutunga o matala a muangene tatʼâ Ezekiia, o Baale ua mu tungila jikalatódio, iu ua bhange muxitu kala kia Akabe, sobha ia Izalaiele; o kilômbo kioso kia diulu, ua ki fukamena iu ua ki bhikila.

⁴ O mʼonzo ia Jihova ua tungumu ue jikalatódio, onzo ioio iambele Jihova, kuila: O mu Jeluzaleme muene mu nga-nda ku-ta o dijina diami.

⁵ O mu malumbu ma iadi ma inzu ia Jihova muene mua tungu jikalatódio phala o kifuẋi kioso kia diulu.

⁶ Katé ni monʼé muène ua mu bhitisa ue mu túbhia; ua kexi ue mu kuzambuila mu matuta; ua kexile ue mu xingila, iú ua lumbile ue ndumba dia azambuidi ni imbanda; anga u suina muene mu kubhanga kia ibha bhu mesu ma Jihova, mbé o ku mu lokalala o njinda iê.

⁷ Ua-te ue kiteka kia kusonga kia muxitu ua iudikile muene mu inzu ioio ia Jihova ia tangelele Davidi ni monʼê Solomá, kuila: Mʼonzo mumu ni mu Jeluzaleme i nga solo mu miji ioso ia Izalaiele, muene mu nga-nda ku-ta o dijina diami, katé ku hádia.

⁸ O Izalaiele ki nga-nda ku mu bhangesa dingi kuzangula o kinama kiê mʼoxi iii i nga bhana ku jitata jâ; kabasa a kala ngó ni muanu ua kubhanga ioso i nga a tendelela, kala ki iala mu kitumu kia Mozé dia mubhikʼami kia a lekelela.

⁹ Maji-phe ene a tokoka o kuívua; mukonda o Manasa ua somboka mu ku a tondalesa katé ene a beta o kubhanga ufusa, o matumbu a akua jixi a jimisa Jihova bhu pholo ia anʼa Izalaiele, ala ndenge.

O difundisilu dia Juda

¹⁰ Kienhokio o Jihova iú ua zuelela mu ukunji ua abhikʼê, o misesedi, uixi:

¹¹ Mukonda o Manasa, sobha ia Juda, ua bhange maufusa mosuʼama, iú ua beta o kubhanga kia ibha o jimamodi ndenge, a mu diangelelè-ku, katé ni Juda ua mu bhangesa, ni mahamba mê, ku-ta ituxi;

¹² kala kiki, o Jihova Nzambi ia Izalaiele, uambe kiki: Tala-phe nga-nda kubheka kima kia ibha mu Jeluzaleme ni mua Juda, kia bhingi kuila uoso u kʼivua, o mátui ene kiiadi kiâ aia ni ku mu di-taiela.

¹³ O ku thandu dia Jeluzaleme ngi tandeleka-ku ka mukolo ka Samádia ni pulumu ia dibhata dia Akabe; o Jeluzaleme ngi mu kondona kala muthu kia kondona ima ia bolo bhu lubaki, u i kondona hé uiboleka bhu pholo iê.

¹⁴ O iá a subhuka ku undundu uami, nga-nda kua ehelela; nga-nda ku a bhakula muene bhu lukuaku lua jinguma jâ; a kà a bhanga uii ni dibhundilu ku jinguma jâ joso;

¹⁵ mukonda a bhange kia ibha ku mesuʼami a kumona, ia a ngi lokalala o njinda iami, tundé mu kizuua kià tunda o jitata jâ mu Ijitu katé mu kizuua kia lelu.

¹⁶ O kia di-te-ku dingi o Manasa ue ua zunza manhinga a vulu a athu a bene katé Jeluzaleme kia mu izalesa ngó ni manhinga tundé kua tundu katé kua suku; katu-ku hanji o kituxi kiê kia bhangesa na-kiu Juda o ku-ta kituxi ni kubhanga ima ki ia fuama bhu mesu ma Jihova.

O kufua kua Manasa

¹⁷ Tala, o ima ia mukua dingi ia Manasa ni ioso muene ia bhange, ni kituxi kiê, kia tele, manhi iene iosuʼiii ka i soneka mu divulu dia malunda a jisobha ja Juda?

¹⁸ Anga Manasa uzeka ku mukânda ua mavu ni jitata jê; hé a mu funda mu dibakala diê dia itulu ia dibhata diê; mu dibakala dia Uza; anga Amone dia monʼê u hinga bhu kididi kiê mu kutumina.

Utuminu ua Amone mu Juda ni kuiibha kuê. O abhikʼé a mu jibha

¹⁹ Amone ua kexile mu kitala kia makuinhi aiadi a mivu ni kiiadi kioso kiandeka o kutumina, iú ua tumina mivu iiadi mu Jeluzaleme; o dijina dia manhʼâ Mezulemete, monʼa Haluze, mu Joteba.

²⁰ Anga uenda ni kubhanga ima ia ibha ku mesu ma Jihova kala kia bhanga jinga tatʼâ Manasa.

²¹ Mukonda uende muene mu jinjila joso jenda jinga tatʼâ; iu ua bhikila ue o iteka ia bhikila jinga tatʼâ, ni ku i fukamena.

²² Kienhiki iú ua xisa Jihova, Nzambi ia jitata jê, iu ua fulu kuenda mu njila ia Jihova.

²³ Maji o abhikʼé muene, sobha Amone, a mu te kikutu kia ufe, iá a mu jibhila mʼonzo iê muene.

²⁴ Inda ue akuaʼxi a sota muene oso a tele kikutu kia kujibha sobha Amone ià a a jibha ue, anga a hingisa Joziia dia monʼê ku usobha bhu kididi kiê.

²⁵ Tala, ku ioso ia bhiti na-iu Amone ni iosololo kiá ia bhange, mbé ka i soneka mu divulu dia malunda a jisobha ja Juda?

²⁶ Muene iá a mu fundu mu mbila iê mu dibakala dia itulu mu Uza; o Joziia, dia monʼê, muene ua hingi ungana bhu kididi kiê.