II Jisobha 16 - O Mikanda Ikola

O utuminu ua Akâji, sobha ia Juda

¹ Mu muvu ua kakuinhi ni sambuadi, ua utuminu ua Peka, mona ua Lemadiia, muene mu andeka Akâji, sobha ia Juda, monʼa Jotamu, o kutumina.

² Akâji kioso kia mateka o kutumina ua kexile mu kitala kia makuinhi a iadi a muvu, iú ua tumina kuinhi dia muvu ni kisamanu mu Jeluzaleme. Ka bhanga jinga ima ia iuka ku mesu a Jihova Nzambi ié, kala kia bhanga jinga Davidi, dia tatʼâ.

³ Mukonda muene uende mu jinjila ja jisobha ja Izalaiele; kí kia bhingi kuila ni monʼê ua mu bhitisa mu túbhia, kala kiene o ufusa ua akua matumbu, a a kaiesela kuengi kuala Jihova iá a tundu bhu mesu ma akua Izalaiele.

⁴ Ua bhana ue jisata ni kuohela o uasu ua dizumba ku matala ni ku tumilundu ni bhoxi dia ixina ia miẋi ioso ia di zandela.

Akâji u di kola kua sobha ia Asídia

⁵ Kieneʼokio kiene kia bande Lejime, sobha ia Sídia, kumoxi ni Peka, monʼa Lemadiia, sobha ia Izalaiele, mu kúlua ni Jeluzaleme. Anga a kondela Akâji mu jimbandu joso maji a lémbua ku mu tolola.

⁶ Mu thembu ieneʼoio, o Lejime, sobha ia Sídia, kiene kia vutuila dingi Elate ku Sídia, iú ua Kaiesa-mu, o jijudé joso ja kexile-mu; mu Elate mú mueza akua Sídia mu kutunga-mu, iá ene momo katé mu kizuua kia lelu.

⁷ O Akâji-phe anga u tumikisa jiphunga kua Tiglate-Pilesele, sobha ia Asídia, mu ku mu ambela, kuila: Eme, ngana, ngala ngi mubhikʼé, ngi monʼé; banda kunu, u ngi kudile bhu maku a sobha ia Sídia, ni bhu maku a sobha ia Izalaiele, kuma ene a balumuka ni ku ngi balukila.

⁸ Anga Akâji u zangula o phalata ni ulu uoso ua sange mʼonzo ia Jihova ni mu malundilu ma dibhata dia sobha, iú ua i tumikisa mu ku i bhanga ujitu kua sobha ia Asídia.

⁹ O sobha ia Asídsia iú ua mu ivu muene; mbata o sobha ia Asídia ua bande iú ueza mu kukonda Damasku, iú ua mu tolola; o mundu ia keximu ua ambata iú uai-nâ ku Kîdi, o Lejime ua mu jibha.

Kalatódio ka mahamba ma Akâji

¹⁰ Kia bhiti imʼiii, o sobha Akâji uai ku Damasku mu ku di-mona ni Tiglate-Pilesele, sobha ia Asídia; o kia mono o Kalatódio ka kexile mu Damasku, sobha Akâji ua tumikisa o kidifua kiê nu ulungu uê, kua nganga Udiia, kioso muene kia ka iudika kene koso.

¹¹ Udiia, o nganga, hé u tunga o Kalatódio muene, kala kioso kia tumu ku mu ambela kuala sobha Akâji mu Damasku; kioso kia mu ambela, kiene muene kia bhange Udiia, kioso o sobha Akâji kiluua hanji a vutuka mu kutunda ku Damasku.

¹² Sobha kioso kia tundu ku Damasku, uedi sui ku Kalatódio, anga u ka zukama u bhela-ku o jisata.

¹³ Anga uohela-ku o sata iê ia kubhakula ni túbhia ni mubhaku uê ua makudia anga u lunduluila-ku ue o mubhaku uê ua makunua; iú ua sangela ue o manhinga a jisata ja kubatama ku Kalatódio keneʼoko.

¹⁴ Maji o Kalatódio ka utadi ua Kobidi ka kexile bhu pholo ia Jihova, ua ka katula ku pholo iaʼnzu, bhu kaẋi ni inzu ia Jihova ni Kalatódio ka iudika muene iú ua ka tula bhu mbanduʼa Kalatódio kê-muène, ku mbandu ia kusuku.

¹⁵ Sobha Akâji iú uambela Udiia, o nganga, uixi: O sata ia kubhakula ni túbhia mu kimenemene u i ohela jinga ku Kalatódio kaka ka dikota; kiene ue kimoxi ni mubhaku ua makudia mu ngoloxi, ni sata ia sobha ia kubhakula ni túbhia ni mubhaku ue ua makudia ni sata joso ja kubhakula ni túbhia ja kifuẋi kioso mʼoxi, ni ujitu uâ ua makudia ni makunua; o manhinga oso a jisata ja kuoha ni manhinga oso a jisata ja mutululuku u a sangela kueneʼoko. Maji o Kalatódio kaka ka utadi ua Kobidi, kuma eme nga-nda kumona kioso ki ngi ka bhanga.

¹⁶ Anga o nganga Udiia u bhanga muene iene ioso kala kia mu tendelela na-iu kuala sobha Akâji.

¹⁷ Anga o sobha Akâji u batula o jiphonda ja kuata o ixikikilu, o dilonga dia menha-a-pholo anga u di sungila bhu thala ié kiki, o musanza ua kalunga ua u katula ku thandu dia jingombe ja utadi ua Kobidi, ja kexile kiki bhoxi diê, iú ua u xikika ku thandu dia dixikamenu dia ditadi.

¹⁸ Ni kitelembe ue kia tungila ku inzu anga kiia muene katé bhu kanga bhu muelu ua sobha, ku inzu ia Jihova ua ki bulu-ku mukonda dia sobha ia Asídia.

O ufilu ua Akâji

¹⁹ Tala o ima dingi ia bhiti na-iu Akâji ni iosololo muene ia bhange, manhi ka i soneka mu divulu dia Malunda a jisobha ja Juda?

²⁰ Akâji anga u zeka ni mukànda ua mavu kumoxi ni jitata jê, iá a mu fundu bhu kidindu bhuʼaia jitata jê mu Sanzala ia Davidi, anga Ezekiia dia monʼê u hinga ungana bhu kididi kiê.