II Jisobha 12 - O Mikanda Ikola

O utuminu ua Jouaji ni kutuma kutungulula o tembulu

¹ Mu muvu ua kasambuadi ua utuminu ua Jehu, kiene kiandeka Jouaji o kutumina; iú ua tumina makuinhi auana a mivu mu Jeluzaleme; o dijina dia mamʼâ Zibiia, mukua Beleseba.

² Jouaji anga uenda ni kubhanga ima ia iuka ku mesu ma Jihova; izuua iê ioso ia mu bhana jinga o mulongi kuala Joiada, o nganga.

³ Inda ngó o matala ka ma katuile; mukonda hanji o mundu a kexile mu ku bhela jisata ni kuoha uasu ua dizumba bhu ididi ia dileka.

⁴ Jouaji anga uambela o jinganga, uixi: O kitadi kioso kia ima ikôla ieza na-iu mʼonzo ia Jihova, o kitadi kia oso a bhita ku disonekenu dia mundu, o kitadi kia muthu ni muthu kala kiá kioso kiate o suilu iê-muene ki mu mu talesa, ni kitadi kioso muthu ni muthu kia di fikisila kubheka phala o inzu ia Jihova.

⁵ O jinganga a ki tambule, ku muthu ni muthu uoso a dʼijiia-nê; nda ene a tene o kuxita o mazungu ala ku inzu ia Jihova kala kia soko o mazungu oso ala-ku.

⁶ Anga ki bhita-phe kuila, mu ku tula ku muvu ua makuinhi aiadi ni kitatu, a utuminu ua sobha Jouaji, hanji o mazungu iá-ué kʼonzo ia Jihova, kiluua a a xita.

⁷ Bheneʼobho o sobha Jouaji uexana nganga Joiada ni jinganga ja mukuá anga u ambela, uixi: Enu ki mu xitilaʼhi o mazunga ala ku inzu? O kiki-phe, athu oso u mua dʼijiia-nâ, kana dingi ku a tambula kitadi, maji o kitadi kiene bhanenu-kiu phala o mazungu ala ku inzu.

⁸ O jinganga anga a xikina o ku kamba kutambula kitadi ku mundu, maji ue a di tunuʼâ o ku xita o mazungu ala ku inzu.

⁹ Maji-phe o nganga Joiada ua zangula mbaúlu hé u i kubula dizungu ku thanduʼa kivunginu kiê; hé u i tula bhu mbandu ia kalatódio, ku lukuaku lua kadilu lua oso a bokona mʼonzo ia Jihova. O jinganga ja kexi mu kulangidila bhu dibhitu dia kubokuena, aia ni ku ta mueneʼomo o kitadi kioso kia kexi mu bheka athu kʼonzo ia Jihova.

¹⁰ O kioso ene kia mono kiá kuila o kitadi kia vulu kiala kiá mu mbaúlu, o musoneki ua sobha ni nganga ia dikota, a banda jinga phala ku kiʼalula ni ku ki ta mu jinzeke, kitadi kioso kia sanga jinga mʼonzo ia Jihova.

¹¹ O kiela jinga kitadi a ki mono kiá o munemu uê, a ki bhana jinga bhu maku ma iá a kexile mu kubhanga o kikalakalu, a a bhele o kutumina ku inzu ia Jihova; o ene, ene kiá a kexile mu ku ki uanena ku asongia-mabaia ni jithungi a kexi mu kutungulula o inzu ia Jihova.

¹² Ni akua kutunga ni matadi ni akua kukanda o mixinda, ni kusumba o miẋi ni matadi òiudike kiambote phala kuxita na-u o mazungu a inzu ia Jihova ni ioso kiá muene ia bhana jinga ku inzu mbé a tene o ku i tungulula.

¹³ Maji-phe ku kitadi kieneʼokio kia bheka jinga mu inzu ia Jihova, ka bhanga jinga-ku jikopho ja phalata, mba jingalufu, mba malonga a menhʼa pholo, mba jikoloneta, mba kitutu kioso-kioso kia ulu mba kitutu kia phalata phala mʼonzo ia Jihova.

¹⁴ Mukonda a kexi mu ku ki bhana ku iá a kexile mu ku bhanga o kikalakalu, nʼai ni kuiudika na-kiu o inzu ia Jihova.

¹⁵ Athu a kexi mu ku a bhana o kitadi bhu maku mâ phala ku ki uanena oso a kexi mu bhanga o kikalakalu, ka kexi mu kuʼebhula muoso mua ila o kitadi, mbata ene o ima ioso a kexile mu ku i bhanga ni kitongola kioso.

¹⁶ Maji o kitadi kia sata ia mulonga ni kitadi kia sata ia ituxi, o kiókio ka kexi mu kuiza na-kiu kʼonzo ia Jihova, maji kia kexi mu kala kiangene kia jinganga.

¹⁷ Kieneʼokio-phe Hazaiele, sobha ia Sídia, u banda, anga uiza mu kúlua ni Ngate, anga u mu tolola, u mu bua; Hazaiele anga u lunguluka, u sota kuendela ue Jeluzaleme.

¹⁸ Maji-phe o Jouaji, sobha ia Juda, ua zangula o ima ioso ikôla ia lumbile Jozafate, ni Jolá, ni Akaziia, o jitata jê jisobha ja Juda, kumoxi kiá ni ulu uoso ua sangele mu mabhakelu a inzu ia Jihova, ni a inzu ia sobha, hé u u tumikisa kua Hazaiele, sobha ia Sídia, o muene hé u fula kuiza mu Jeluzaleme, u vutuka kʼoxi iê.

¹⁹ Tala, o ibhangelu ia Jouaji ima ia mukuá dingi ioso ia bhange, mbé ka i soneka mu divulu dia malunda a jisobha ja Juda?

Jouaji a mu jibha

²⁰ Anga abhikʼê a fundumuka a mu ta kikutu kia ufe; hé a mu jibhila mʼonzo ia Milu iala mu kulumuka bhu Sila.

²¹ Mukonda ni Jozakale, monʼa Simeiate, ni Jozabade, monʼa Somele, abhikʼê, ene a mu kuama, anga u fua, hé a mu funda ni jitata jê mu mbanza ia Davidi; anga Amaziia, monʼê, u hinga ungana bhu kididi kiê.