II Jisobha 11 - O Mikanda Ikola

Ataliia u bhûnda o kiandu kia ungana

¹ Ataliia, manhʼâ Akaziia, kioso kia mono kuila o monʼê a mu jibha, ua balumuka iú ua jimisa o mbutu o musala uoso ua sobha.

² Maji o Jozabate, mona ua muhetu, ua sobha Jolá, phange ia muhetu ia Akaziia, u zangula Jouaji monʼa Akaziia anga u mu nhana muʼaxaxi ka ana a sobha a kexile mu ku a jibha, anga u a sueka ni muene ni kiledi kiê, mu xilu, ua ki bhangela o ku mu sueka ku a Ataliia uila kiki ka mu jibha dingi.

³ Anga a mu sueka kuala o muhatu mueniʼó, mʼonzo ia Jihova, mu mivu isamanu; o Ataliia u kala mu tumina mʼoxi.

Jouaji a mu unda ku usobha ua Juda

⁴ Kubhikila mu muvu ua kasambuadi, Joiada u tuma kuixana o jikabhitangu ja jihama, ni jikabhitangu ja mukuá kumoxi ni akua kilangidilu, u bokona-nâ mʼonzo ia Jihova, hé u ta-nâ kikutu; o mʼonzo ia Jihova mueneʼomo u a tesa muloko hé u a londekeza monʼa sobha.

⁵ Anga u a tendelela, kuila: O kikalakalu enu ki mua-nda bhanga kienʼiki: Mu di uana mu mbandu jitatu: Mbandu imoxi ene mu bokona mu jisabhalu, a kà ta kilangidilu ku inzu ia sobha.

⁶ Mbandu ia mukuá a kà kala bhu dibhitu dia Sule; o mbandu ia katatu a kà kala bhu muelu, kuema dia iá ala bhu kilangidilu; kienʼiki ki mua kà bhanga o kilangidilu kia inzu ienʼiii, mu tene kuia ni kusandula ene oso mu kanga.

⁷ O ibuka iene kiiadi kiâ, iene mu kutunda kia sabhalu, a kà ta kilangidilu kia inzo ia Jihova bhua kexila sobha.

⁸ O sobha mua kà mu kondoloka, muthu ni muthu ni mata mê bhu maku; o uoso u bokona mu mikalatata ienu a kà mu jibha; enu-phe mua kà kala ni sobha kioso kia tunda ni kioso kia bokona.

⁹ O jikabhitangu ja jihama anga a bhanga kala kia a tendelela nganga Joiada, muthu ni muthu u zangula kibuka kia athuʼê, kutale iá a kexi mu bokona kia sabhalu, uixi iá a kexi mu tunda kia sabhalu ku kilangidilu, anga eza kua nganga Joiada.

¹⁰ O nganga Joiada hé u bhana ku jikabhitangu ja jihama, o jisosa ni jingubu ja kexile ja sobha Davidi jí ja kexile mʼonzo ia Jihova.

¹¹ O akua kilangidilu anga a di zeleka muthu ni muthu ni ibhakatu iê ia ita bhu maku, tundé ku mbandu ia kadilu ia inzu katé ku mbandu ia kiasu, ni ku mbandu ia kalatódio katé ku tembulu, phala o sobha ku mu ta mu kaẋi.

¹² Muene-phe anga u zangula monʼa sobha, u mu ta o kitundu ku mútue hé u mu bhana o umbangi; anga u mu bhanga sobha, a mu unda ni maji, a beta jimbanda ni kudikola, exi: A tane-ku, sobha!

Ataliia a mu jibha

¹³ O Ataliia kioso kievu o dízui dia kudikola kua akua kilangidilu ni dia kifuẋi, uijiia mu mundu, u bokona mʼonzo ia Jihova.

¹⁴ O kia tale, u mona sobha iú bhu mbandu ia philadi, kala kiá kiene o kífua, ni jikabhitangu ni jikoloneta bhu mbandu ia sobha; o kifuẋi kioso mu ixi kia sanguluka, ki kala mu xika o jikoloneta. Bheneʼobho Ataliia u tandula o izuatu iê ni kudikola, uixi: Ufiʼé! Ufiʼé!

¹⁵ Maji o nganga Joiada ua tendelela o jikabhitangu ja kexile mu kutumina o masoladi, uixi: Mu katudienu mu kaẋi ka mikalatata ia athu, muienê bhu kanga, se bhu kala muthu u mu kaiela, mu jibhienu ni xibhata. Mukonda o nganga ua ambelele, uixi: Kana ku mu jibhila mʼonzo ia Jihova.

¹⁶ Anga a mu ta maku; maji o muene-phe ua di tela o njila ia dibokuenu dia jikabalu, uia mʼonzo ia sobha, hé a mu jibhila mueneʼomo.

O kikutu kia Joiada

¹⁷ Joiada anga u ta kikutu bhu kaẋi ka Jihova ni sobha ni mundu, phala ene kukala ngó mundu uangene ua Jihova; kiene kimoxi ue bhu kaẋi ka sobha ni mundu uene.

¹⁸ Bheneʼobho o kifuẋi kioso kia tokala mu ixi, ki bokona mʼonzo ia Bale hé a i bula; Kiene ue kimoxi ni jikalatódio jê ni iteka iê ioso muene a i bula-bula; o Matane, nganga ia Bale, a mu jibhila bhu pholo ia jikalatódio jene. Bheneʼobho o nganga Joiada, hé u tá athu mu inzu ia Jihova aia ni kutumina.

¹⁹ Anga u zangula ni jikabhitangu ja jihama, ni jikabhitangu, ni akua kilangidilu, kumoxi ni kifuẋi kioso kiaʼxi, aia mu bheka sobha tundé mʼonzo ia Jihova, a di tela o njila ia muelu ua kilangidilu, anga eza mʼonzo ia sobha, anga Jouaji u xikama ku kiandu kia jisobha.

²⁰ O kifuẋi kioso kiaʼxi anga ki kala mu tana; o mbonge ue ia tululuka, tundé Ataliia kia mu jibha ni xibhata bhu mbandu ia inzu ia sobha.

²¹ O Jouaji ua kexile ngó mu kitala kia sambuadi dia mivu kioso kia mu bhange sobha.