II Jisobha 10 - O Mikanda Ikola

Jehu u jikinisa o dibhata dia Akabe

¹ Akabe anga u kala ni makuinhi sambuadi a mona mu Samádia: anga Jehu u soneka mikanda, u i tumikisa mu Samádia ku atumini bu dizelele, ni ku ikulakaji, ni ku iá a kexi ma sasa o ana a Akabe, uixi:

² O kioso ki mua-ndu tambula o mukanda iú kuma anʼa nganʼenu muala-nâ kueneʼoko, kiene ue kimoxi ni makalu mê, ni jikabalu jê, o mbonge ia kuata ia kolo, ni mata muala-nâ.

³ Talenu-ku-phe uoso ua beta kota, uala ni kuiuka kuavulu, mu ana oso a ngana ienu, mu mu tule ku kiandu kia tatʼâ, nda mu zokele o dibhata dia ngana ienu.

⁴ Maji-pphe ene a teketa kiavulu, kuma exi: O sobha jiiadi a lémbua kuimana bhu pholo iê, o etu-phe tua-nda kutena kiebhi o kubhânga-nê?

⁵ Bheneʼobho-phe o iú ua kexile ku pholo ia dibhata, ni iú ua kexile ku pholo ia mbonge ioso, kumoxi ni adiakime ni iá a kexi mu sasa o ana a Akabe, a tuma kuambela Jehu, exi: Etu tuala tu jiselevende jé; iene ioso i u tu tangela, etu tua-ndu i bhanga. Sé-ku muthu tua-ndu mu ta ku usobha; o ioso i ua mono o kuiuka ku mesu mé, iene i u bhanga.

⁶ Muene-phe anga u tona dingi o ku a sonekena mukanda ua kaiadi, kuila: Se enu mua ngi tokala eme, anga muivua muene o dízui diami, Zangulenu o mítue ioso ia mala, anʼa nganʼenu, o mungu, bhu kumbi kala didi, mu ngi sange na-iu bhu Jizelele. Tala, o ana oso a sobha, makuinhi sambuadi a muthu, a kexile ni athu ònene mu mbonge, ene a kexile mu ku a dikila,

⁷ Anga-phe ki bhita muene, kuila: O kia bhixila o mukanda ua sobha kua ene, a zangula ana oso a sobha iâ, hé a a jibha, makuinhi sambuadi oso a muthu; o mítue iâ a i te mu inda, ià a i tumikisa kua muene bhu Jizelele.

⁸ Kuiza mukunji umoxi, u mu tudila, uixi: O mítue ia anʼa sobha eza-na-iu; kuala muene: Tulenu-na-iu ku ndunji jiiadi bhu mbanduʼa muelu, katé mungu mu kimene.

⁹ Kutula mu kimenemene, muene kia tundu, uimana anga u tangela mundu uoso, uixi: Enu mu athu a iuka; talenu, eme nga te o kikutu kia ufe kua ngana iami, eme nga mu jibha, maji-phe nanhi ua jibha oso iá?

¹⁰ Tumenu-phe ku kʼijiia, kindala, kuila, o ku kizuelu kia Jihova, kia tange muene mu kuzoka ni dibhata dia Akabe, ki kuandu sonoka kama kòfele ngó mu mavu, mukonda Jihova ua-lu bhanga o ima ioso ia tange muene ku ukunji ua selevende iê Elija.

¹¹ Jehu anga u jibha ue oso a subhuka mu dibhata dia Akabe bhu dizelele kutale o athuʼê onène uixi iá a muʼijidile ngoho, uixi o jinganga jê, katé ka mu xila-ku ngó muthu umoxi u subhuka.

¹² Bheneʼobho u balumuka kiua, anga u katuka, uia ku Samádia. O kioso kiala hanji mu njila, bhu Bete-Ekedi dia tubhila,

¹³ Jehu ua sange o jiphange ja Akaziia, sobha ia Juda, anga u a ebhula, uixi: Enu a nanhi? Kuala, ene: Etu tu jiphange ja Akaziia; etu tua kulumuka mu ku hindula ana a sobha ni anʼa Ngana dia mama.

¹⁴ Kieneʼokio muene uixi: A kuatienu ni muenhu. Ene anga a a kuata ni muenhu uâ, hé a a jibhila bhu mbanduʼa kixima kia Bete-Ekedi, makuinhi a uana ni kiiadi kia muthu osuʼá; ka xisa-ku né ngó muthu umoxi ua subhuka.

Jehu u takana ni Jonadabe

¹⁵ O kia tundu bheneʼobho, u takana ni Jonadabe, monʼa Lekabe, ua kexi mu kuiza mu ku mu kauidila; Jehu anga u mu menekena, hé u muʼibhula, uixi: Eie o muxima ué kokuʼami ua iuka muene kala o muxima uami ki ua iuka kokuʼé? Kuala Jonadabe: Kiene. Jehu, uixi: Kuabhu-phe, se kiene, ngi bhane ʼkuaku lué. Jonadabe anga u mu bhana lukuaku, o muene hé u mu sungila mu dikalu,

¹⁶ hé u muʼambela, uixi: Zá tuie nʼeme, ua kà mone o muanu uami u ngala na-u kua Jihova. Anga a mu ta mu dikalu diê.

¹⁷ O kioso Jehu kia bhijiẋila mu Samádia, ua jibha ene oso a subhukile mu Samádia, a tokala ni Akabe, katé kia a sengulula, kala kia tange o kizuelu kia Jihova, kia zuelela kua Elija.

Jehu u jibha akua kubheza o dihamba dia Bale

¹⁸ Jehu anga u bhongolola o mundu uoso, u ambela, uixi: Akabe o dihamba dia Bale ka di bhikila kia soko. Maji-phe o Jehu ua-nda beta o kubhikila Bale.

¹⁹ Uila kiki, ngʼixanenienu kindala muene, o jipolofeta joso ja Bale, ni jiselevende jê joso ja mu tokala ni jinganga jê joso; ki bhu kambe muthu, kuma ngala ni sata ia dikota i nga-ndu bhangela Bale; o ió-phe uoso kʼeza-ku, kandu tena ku kola muenhu. Maji-phe, o kienʼiki, Jehu ua kexi mu ku ki bhangela jindunge ja kujimisa mbutu iá ió oso a kexi mu bhikila Bale.

²⁰ Jehu anga uamba dingi uixi: O Bale mu bhangedienu kionge kiònene ki mu mu lumbila. Anga a ki kola kuoso.

²¹ Jehu anga u tuma ue jiphunga mu Izalaiele ioso; o ene oso ene mu kubhikila Bale hé eza, ni muthu umoxi ngó ka xala-ku mudiâ ua kambe kuiza; ene oso a bokona mʼonzo ia Bale, o inzu ia Bale anga izala tundé ku mbandu kuku katé ku mbandu ia mukuá.

²² Kieneʼokio uambela iú ua kexi mu bhaka o izuatu ia akua kubhikila Bale, uixi: Katula izuatu phala ene oso a mu bhikila Bale. Muene anga u ki bhanga, u a bhekela o izuatu ku kanga.

²³ Jehú anga u bokona kumoxi ni Jonadabe, monʼa Lekabe, mʼonzo ia Bale anga u ambela o jiselevende ja Bale, kuila: Tongololenu mu tale kiambote, sumba mu kaẋi kenu mu kala oso ene mù bhikila Jihova, iá ala mumu kumoxi ni enu, kuma kala ngó oso ene mù bhikila Bale.

²⁴ Ene kioso kia bokona mu bhana jisata ni mibhaku ia túbhia, o Jehu, ku kanga kunu, ua sota iú ua lungila makuinhi nake a muthu, hé u a tangela, uixi: Se kuʼomboloka ngó muthu umoxi, ku mala iá u nga bhakula bhu makuʼenu, o muenhu uenu u kala bhu kididi kia muenhu uê muene.

²⁵ Anga ki bhita kuila, kioso ene kia zubha o kubhakula sata ia túbhia, Jehu uambela akua kilangidilu kiê ni jikabhitangu, uixi: Bokonenu, muʼa jibhe. Ki bhu kale umoxi ngó u mi lenga. Anga a a jibha muene ku mazu a xibhata; anga a a texila ku kanga kuala o jikabhitangu ni akua kilangidilu hé a bokona muene mu xiluèlele dia inzu ia Bale.

²⁶ Anga a katula-mu o iteka ia tokalele mʼonzo ia Bale anga a i oha.

²⁷ O kiteka kiene kia Bale ue a ki bulu, o inzu iê hé a i lundumuna anga a i kitula inzu ia dixidisilu katé mu kizuua kia lelu.

²⁸ Kienʼiki Jehu kia sengulula Bale mua Izalaiele.

²⁹ Maji-phe, o Jehu muene ka batuka mu ku kaiela o ituxi ia Jelobouamu, monʼa Nebate, ua bhangesele Izalaiele ku ta ituxi, iene-phe ia tungombe tua ulu tua kexila mu Betele ni mu Dane.

³⁰ Ki kia bhangesa Jihova kuambela Jehu, kuila: Mukonda ki ua bhangʼiki kiene kia iuka bhu pholo iami, kuma ni ioso ia ngi kexile ku muxima uami iene muene i ua bhange ku dibhata dia Akabe, o anʼé eie a mala katé ku muiji ua kauana, a kà xikama muene bhu kiandu kia Izalaiele.

³¹ Maji o Jehu-phe, ku kala ni muanu ua kuenda ni muxima uê uoso mu ngonge ia Jihova, Nzambi ia Izalaiele, ua ki tokoka, o ku di batuka ue ni ituxi ia Jelobouamu ua bhangesele Izalaiele o ku ta ituxi, ua ki lémbua.

³² Mu izuua mueneʼomo, Jihova uandeka o kutununa o jimbambe joso ja Izalaiele; mukonda Hazaiele, mu jimbambe joso ja Izalaiele, ua bhita jinga-mu ni ku a tolola.

³³ Tundé ku Njolodá, ku mbandu ia mu tundila kumbi, ixi ioso ia Ngiliiade; ni akua Ngadi, ni akua Lubene, ni akua Manasa, tundé bhu Alouele iala bhua lulama ni kangiji ka Anone, ene-phe kiá a Ngiliiade ni Basane.

³⁴ Tala ima ioso kiá ia ibhangelu ia Jehu, ni ima ioso ia bhange muene, ni undandu uê uoso, manhi ki iòsoneke mu divulu dia misendu ia jisobha ja Izalaiele?

³⁵ Jehu anga u zeka ni jitata jê anga a mu funda mu Samádia; o Jouahaji dia monʼê anga u hinga ungana bhu kididi kiê.

³⁶ O izuua ia tumina Jehu ku usobha ua Izalaiele mu Samádia, makuinhi aiadi a mivu ni nake.