II Jisobha 1 - O Mikanda Ikola

Mouabhi u lunguluka mu kuzoka ni Izalaiele; Akaziia u kata. Akaziia ni polofeta Ilija

¹ Kioso Akabe kia zubha o kúfua, Mouabhi ua di vunza mu kuzoka ni izalaiele.

² Akaziia anga u sonoka, ua laukila mu mazungu ma inzo ia di leka ia kexile na-iu mu Samádia, anga u kata; anga u tumikisa jiphunga u a tangela, uixi: Ndenu, mua kʼebhule kua Bale-Zebubu, nzambi ia Ekolone, se nga-nda kudisanza ku uhaxi iú mba kana.

³ Maji o anju ia Jihova i ambela Ilija, o tejibita, kuila: Ndoko, balumuka u bande mu kutakana ni jiphùnga ja sobha ia Samádia, u a tangele, uixi: Manhi mu Izalaiele kana-mu Nzambi, ki mi bhekesa enu kuia mu kuibhula Bale-zebubu, nzambi ia Ekolone?

⁴ Mukonda dia kienʼiki, Jihova uambe kiki: Bhu hama bhu ua bandeʼobho kua-ndu tuluka-bhu dingi; maji sé kufula, ua-ndu fua muene. Kuabhu, Elija bhenhobho hé u sulukʼé.

⁵ O jiphunga hé ji vutuka kua muene, o muene u a kumbulula, uixi: Kualaʼhi, ki mua vutukʼiki?

⁶ Ene a mu ambela, exi: Muthu ueza mu kutakana nʼetu iú ua tu tangela, uexi: Ndokuenu, Vutukenu kua sobha ua mi tumu mu muʼambele, muexi: Jihova uambe kiki: Manhi mu Izalaiele kanamu Nzambi, phala eie u tume o kuibhula kua Bale-Zebubu, nzambi ia Ekolone? Uila kiki, bhu hama bhu ua bandeʼobho kua-nda ku tuluka-bhu dingi, maji u fua muene sé kufula.

⁷ Muene anga u a kumbulula, uixi: O muthu ueza mu kutakana nʼenu iú ua miʼambela o maka eneʼó, ua zuata ihi?

⁸ Ene-phe a muʼambela, exi: Muthu ió ua zuata kindemba, iú ua di kutu phonda ia kibha mu mbunda. Muenephe, uixi: Ahi Ió Elija, mukuaʼxi iengi.

Ilija ni tubhitangu tutatu. Tubhia tua diulu tuʼoha hama ia muthu

⁹ Bheneʼobho, ua mu tumikisa kabhitangu kamoxi ni makuinhiʼé a tanu a disoladi; o kia bande kua muene, (mbata muene ua xikamene bhu thalʼa mulundu), uexi: Eie u muthu ua Nzambi, sobha uedi: Tuluka.

¹⁰ Maji Elija ua vutula, uambela kabhitangu ka makuinhi a tanu, uixi: Se eme-phe ngi muthu ua Nzambi, ku diulu ku lauke túbhia tu ku jikinise nʼeie ni makuinhiʼé a tanu. Bheneʼobho-phe túbhia tua tundu mu diulu, tu tua a jikinisa ni muene ni makuinhʼé a tanu.

¹¹ Anga u mu tumikisa dingi kabhitangu ka mukuá ka makuinhi a tanu ni makuinhʼé a tanu a disoladi; o muenʼiú hé u muʼambela, uixi: ÉʼMuthu ua Nzambi, sobha uambe kiki: Tuluka lusolo.

¹² Elija-phe u mu vutuila, uexi: Se eme-phe ngi Muthu ua Nzambi, ku diulu ku tuluke túbhia tu ku jikinise eie ni makuinhʼé a tanu a disoladi. Bheneʼobho o túbhia tua Nzambi tua tuluka mu diulu, tu tua mu jikinisa ni muene ni makuinhʼé a tanu a disoladi.

¹³ Anga u tona dingi o ku mu tumikisa kabhitangu ka makuinhi a tanu lua katatu ni makuinhʼé a tanu; bhenhobho o kabhitangu ka makuinhi a tanu ua bande, iú ueza, iú ua fukama bhu pholo ia Elija, ni ku mu dionda, uixi: Muthu ua Nzambi, tata! Muenhu uami, nga ku diondo, ni muenhu ua abhikʼé o makuinhi a tanu iá, u di bhange phelu ia nzaji ku mesu mé.

¹⁴ Kuma, tala, o túbhia tua tundu mu diulu, tua jikinisa kiá akuetu kiiadi ió a dianga, o jikabhitangu ja makuinhi a tanu ni makuinhʼé a tanu; o kiki-phe ku mesu mé muenhu uami uile kala phelu ia nzaji.

¹⁵ Bheneʼobho o anju ia Jihova uambela Elija, uixi: Iú, tuluka-nê, ku kale ni uoma. Hé u fundumuka, u kulumuka-nê kua sobha.

¹⁶ Anga u mu ambela, uixi: Jihova uambe kiki: Eie ua tumikixina-hi jiphunga mu kuibhula kua Bale-Zebubu, nzambi ia Ekolone? Mbé mukonda dia kuila kana-mu Nzambi mua Izalaiele, nʼa mu ibhule o kizuelu kiê? Kala kiki, o ku hama iii ku ua sambela, kua-nda ku tuluka-ku dingi, maji ni kidi muene ua-nda kufua.

O kufua kua Akaziia

¹⁷ Kienʼiki, anga u fua muene, kala kiambe o kizuelu kia Jihova, kia zuela Elija; o bhu kididi kiê, Jolá hé uandeka o kutumina mu muvu ua kaiadi ua Jeholá, monʼa Jozafate, sobha ia Juda; kuma o muene kakexile ni mona.

¹⁸ O ima ia mukuá ia di te-ku dingi ia bhanga jinga Akaziia, manhi ka i soneka mu divulu dia malunda ma jisobha ja Izalaiele?